Enlil in the E-kur (Enlil A): composite text

¹^den-lil₂ su₃-ra₂-ce₃ dug₄-ga-ni mah inim-ma-ni (1 ms. has instead:dug₄-ga-ni) kug-ga-am₃
²nij₂ nu-kur₂-ru ka-ta ed₂-a-ni nam ul-ce₃ tar-re
³igi il₂-la-ni kur-re di-di
⁴^jicnu₁₁ il₂-la-ni kur cag₄-ga igi jal₂
⁵a-a ^den-lil₂ barag kug barag (some mss. have instead: engur) mah-a dajal-bi tuc-a-ni
⁶^dnu-nam-nir nam-en nam-nun-na cu gal du₇-a-ni
⁷dijir ki ni₂-ba mu-un-na-gur₂-e-ec
⁸dijir-dijir ^da-nun-na mu-un-na-sun₅-sun₅-ne-ec (1 ms. has instead: mu-un-na-sug₂-sug₂-ge₄-ec)
⁹a₂ aj₂-ja₂ zid-de₃-ec im-ma-sug₂-ge-ec
¹⁰en ururu gal an ki-a dirig di-zu gal-an-zu-e
¹¹dur-an-ki-ka dur₂ ba-an-jar jectug₂ dajal-la-ke₄
¹²nam-nun-na ni₂ pa ed₂-a ci-bi₂-in-ak ki-ur₃ ki gal-la
¹³nibru^ki ud₅-saj mah an ki-ka ki-tuc im-ma-ni-in-du₃
¹⁴iri igi-bi ni₂ me-lem₄ huc-a
¹⁵bar-bi dijir ururu-na saj nu-ja₂-ja₂-dam
¹⁶cag₄-bi ka jir₂ kij-a ka garac₂-a-ka
¹⁷^jices₂-ad ki-bal-a ub₄ sa ak-a
¹⁸gal-bi dug₄-ga-bi ud la-ba-ni-ib-su₃-ud-de₃
¹⁹di-da inim erim₂-jal₂ nu-mu-ni-ib-be₂
²⁰cag₄-a bar-a eme (some mss. have instead: inim) si nu-sa₂
²¹inim kur₂ nij₂-kur₂ u₃-nu-jar-ra
²²LU₂xKAR₂ (some mss. have instead: LU₂)-ec₂ di nij₂-erim₂ i-^dutu
²³igi bal nij₂-a₂-jar inim eme (1 ms. has instead:inim) sig dug₄-dug₄
²⁴sun₇-na inim bur₂-ra ni₂-buluj₅ di silim-ce₃ di
²⁵iri nij₂-gig-ga nu-mu-ni-ib-dib-be₂
²⁶nibru^ki a₂-bi sa-par₃ gal-la-am₃
²⁷cag₄-ba hu-ri₂-in^mucen-e dug₃ mu-un-bad-ba₉-re₇
²⁸lu₂ erim₂ lu₂ hul-jal₂ cu-bi la-ba-ra-ed₂
²⁹iri nij₂-gen₆-na saj-e-ec rig₇-ga
³⁰nij₂-zid nij₂-si-sa₂ gi₁₆-sa-ce₃ ak-a
³¹tug₂ tan₂-tan₂-na kar-ra jal₂-la
³²cec gal cec ban₃-da dugud-de₃-da nam-lu₂-ulu₃ ak-da
³³inim ab-ba-ce₃ jizzal ak-de₃ ni₂ cu-a gi₄-gi₄-dam
³⁴dumu ama-ni-ir sun₅-na ni₂ tej₃-je₂₆-da nam-ab-ba sud-de₃
³⁵iri a₂-dam kug ^den-lil₂-la₂-kam
³⁶nibru^ki ec₃ ki aj₂ a-a kur gal-la-kam
³⁷barag nam-he₂ e₂-kur e₂ za-gin₃ sahar-ta ca-ba-ra-an-il₂
³⁸hur-saj il₂-la-gin₇ ki sikil-la bi₂-in-mu₂
³⁹nun-bi kur gal a-a ^den-lil₂
⁴⁰e₂-kur ec₃ mah-a barag-ba dur₂ bi₂-in-jar
⁴¹e₂-a me-bi dijir sag₂ nu-di
⁴²cu-luh sikil-bi ki-gin₇ nu-cilig-ge
⁴³me-bi me abzu lu₂ igi nu-bar-re-de₃
⁴⁴cag₄-bi ab su₃-ra₂ an-zag nu-zu-a
⁴⁵KA (1 ms. has instead KI) uri₃ ru₂-a uri₃ mul-la-ba
⁴⁶di-ir-ga me ul-e cu im-ta-du₇-du₇
⁴⁷inim-inim-ma-bi cud₃-cud₃-de₃
⁴⁸tu₆-tu₆ (1 ms. has instead: tu₆ dug₄)-bi inim sizkur-ra-kam
⁴⁹inim-bi i₅-jar sag₉ bar-cu (1 ms. adds: jic) cub-cub-bu-da
⁵⁰jarza nij₂-kal-kal-la-kam (1 ms. adds the Akkadian gloss: ^{cu-qu₃-ru-/tum\}) ( Another ms. has the Akkadian gloss: ^{cu-qu-ru-u₂-/tum\})
⁵¹ezen i₃ gara₂ sud he₂-jal₂-la du₈-a
⁵²jic-hur-bi giri₁₇-zal cag₄ hul₂-la di-bi nij₂-gal-gal-la-kam
⁵³ud cu₂-uc ezem-ma ud zal-le buru₁₄ mah-am₃
⁵⁴e₂ ^den-lil₂-la₂ kur he₂-jal₂-la-kam
⁵⁵cu gid₂ igi tum₃ la₂ cu sur₂ nij₂-gig-ga
⁵⁶e₂-a en-bi e₂-da mu₂-a
⁵⁷lagar^!-bi (1 ms. has the Akkadian gloss: ^{ca? ka-ra-bi}) cu silim-ma he₂-du₇-am₃
⁵⁸abzu gudu₄-bi cu-luh-ha (1 ms. adds:-zu) tum₂-ma-me-ec
⁵⁹nu-ec₃-bi cita kug-ge du₇-me-ec
⁶⁰engar mah-bi sipad zid kalam-ma
⁶¹ud dug₃-ga zid-de₃-ec tu-ud-da-am₃
⁶²engar gana₂ dajal-la he₂-du₇-am₃
⁶³ci-im-da-jen nidba gal-gal-la-da
⁶⁴jic-la₂-bi nu-mu-un-DU e₂-kur za-gin₃-ce₃
⁶⁵^den-lil₂ a₂-dam kug ki-a hur-ra-za
⁶⁶nibru^ki iri ni₂-za ci-im-mi-du₃-du₃-am₃
⁶⁷ki-ur₃ kur ki sikil-zu a bi₂-dug₃-ga
⁶⁸ub-da 4-ba murub₄-ba dur-an-ki-ka ki ba-e-ni-tag-ge
⁶⁹sahar-bi zi kalam-ma zi kur-kur-ra-ka
⁷⁰sig₄-bi kug huc-a uru₄ ^na₄za-gin₃-na-ka
⁷¹am-gin₇ ki-en-gi-ra si mul ba-ni-ib-be₂ (some mss. have instead:ba-ni-ib-il₂)
⁷²kur-kur-re saj im-ma-da-sig₃-ge
⁷³ezen gal-gal-ba uj₃-e nam-he₂-a ud-bi mu-un-di-ni-ib-zal-e
⁷⁴^den-lil₂ ^durac kug hi-li du₈-du₈-a-zu
⁷⁵abzu barag (1 ms. has instead: engur) kug-ga gal-bi tum₂-ma-zu
⁷⁶kur sig itima kug ki ni₂ te-en-te-en-zu
⁷⁷e₂-kur e₂ za-gin₃ ki-tuc mah ni₂ gur₃-ru-zu
⁷⁸ni₂ me-lem₄-bi an-ne₂ im-us₂
⁷⁹jissu-bi kur-kur-ra ca-mu-un-la₂
⁸⁰suh₁₀-bi an-cag₄-ga-ac ca-mu-un-bad-ba₉-re₇
⁸¹en-en-e barag-barag-ge₂-ne
⁸²nidba kug-ge si mu-ni-in-sa₂-ec
⁸³cud₃ (some mss. have instead: inim) sizkur-ra u₃-gul mu-na-ja₂-ja₂
⁸⁴^den-lil₂ sipad igi zid bar-ra-zu
⁸⁵gu₃ zid de₂-a kalam-ma il₂-la-zu
⁸⁶kur cu-ni-ce₃ kur jiri₃-ni-ce₃
⁸⁷kur-ra ki-su₃-ra₂-bi gu₂ mu-na-ab-ja₂-ja₂
⁸⁸a ced₁₀-gin₇ du₈-a nij₂-ki-car₂-ra-ka
⁸⁹mac₂-da-ri-a gu₂-un dugud-da-bi
⁹⁰sa₂ bi₂-in-dug₄ e₂ nij₂-gur₁₁-ra-ka
⁹¹kisal mah-ha nidba si bi₂-in-sa₂
⁹²e₂-kur e₂ za-gin₃-na ma-sar-re-ec im-mi-in-tum₃
⁹³^den-lil₂ sipad zid tec₂-ba (1 ms. has instead: ni₂-ba) lu-a
⁹⁴na-gada mas-su nij₂-zi-jal₂-la-ka
⁹⁵nam-nun gal-la-ni ni₂ pa ed₂-a-ac bi₂-in-ak (some mss. have instead: pa ed₂ ci-bi₂-in-ak)
⁹⁶men muc₃ kug-ga mu-ni-in-sig₇ (1 ms. has instead: mu-ni-in-sig₁₀)
⁹⁷tum₉ hur-saj-ja₂ barag-ge si-a-na
⁹⁸^dtir-an-na-gin₇ an-e ci-in-gi₄
⁹⁹dungu dirig-ga-gin₇ ni₂-bi-a mu-un-jen
¹⁰⁰an-na dili nun-bi-im ki-a ucumgal-bi-im
¹⁰¹^da-nun-na-ke₄-ne dijir mah-bi-im
¹⁰²nam ni₂-te-a-ni ci-im-mi-in-tar-re
¹⁰³dijir na-me igi nu-mu-ni-in-du₈
¹⁰⁴sukkal-mah-a-ni kingal (1 ms. has instead: kindagal) ^dnuska
¹⁰⁵dug₄-ga inim cag₄-ga jal₂-la-ni
¹⁰⁶mu-un-da-an-zu cag₄ mu-da-an-kuc₂-u₃
¹⁰⁷a₂ aj₂-ja₂ dajal-bi mu-un-na-da-an-tum₂
¹⁰⁸cita kug me kug-ga cu mu-un-na-mu₂-mu₂
¹⁰⁹kur gal ^den-lil₂-da nu-me-a
¹¹⁰iri nu-du₃ a₂-dam ki li-bi₂-ib-jar
¹¹¹tur₃ nu-du₃ amac nu-jar-jar
¹¹²lugal nu-il₂-e en nu-u₃-tud
¹¹³lu₂-mah nin-dijir mac₂-e nu-mu-un-dab₅-be₂
¹¹⁴erin₂-e cagina ugula nu-tuku-tuku
¹¹⁵id₂-da a-ectub^ku₆ u₃-bi nu-dun-dun
¹¹⁶ejer-bi ab-ta ed₂ si li-bi₂-in-sa₂ kun-bi nu-mu-un-sud-e
¹¹⁷ab-e erim₃ dugud ni₂-ba nu-mu-un-u₃-tud
¹¹⁸ku₆ engur-ra-ke₄ jic-gi-a nunuz nu-mu-ni-ib-nu₂-nu₂
¹¹⁹mucen an-na-ke₄ ki dajal-la gud₃ la-ba-ni-ib-u₂-us₂
¹²⁰an-na dungu sir₂-ra ka-bi nu-du₈-e
¹²¹a-cag₄-ga ce gu-nu a-gar₃-ra nu-si-si
¹²²edin-na giri₁₇-zal-bi u₂ cim nu-mu₂-mu₂
¹²³^jickiri₆-a jic dajal (1 ms. has instead: ^jictir) kur-ra-ke₄ kurun nu-il₂-e
¹²⁴kur gal ^den-lil₂-da nu-me-a
¹²⁵^dnin-tud nu-ug₅-ge saj jic nu-ra-ra
¹²⁶ab₂-e e₂-tur₃-ra amar-bi nu-cub-be₂
¹²⁷u₈-e amac-bi-a sila₄ ja₂ gig nu-ed₂
¹²⁸a-za-lu-lu ni₂-ba lu-a
¹²⁹TUG₂-bi KUL-ba nu-mu-ni-ib-nu₂-nu₂ (1 ms. has instead: tuc-bi cag₄-ba nu-mu-un-ib-tuc-tuc)
¹³⁰mac₂-ance nij₂-ur₂-4-e numun nu-mu-ni-ib-ed₂ e-ne su₃-ud-bi nu-mu-un-u₅
¹³¹^den-lil₂ nij₂-galam-ma-galam-ma-zu nij₂-me-jar sug₄-ga
¹³²cag₄-bi gu suh₃-a si nu-sa₂-e-dam
¹³³gu-gu gilim-ma igi nu-pad₃-de₃-dam
¹³⁴nam-dijir-zu-ce₃ nir im-te-jal₂
¹³⁵cag₄ kuc₂-u₃ ad gi₄-gi₄ en ni₂-te-na-me-en
¹³⁶nij₂-ak-zu a-ba i₃-zu-zu
¹³⁷me-zu me pa nu-ed₂-de₃
¹³⁸muc₃-za dijir igi nu-bar-re-dam
¹³⁹en dijir lugal ^den-lil₂-la₂-me-en
¹⁴⁰di-kud ka-ac bar an ki-me-en
¹⁴¹inim mah-zu an-gin₇ dugud-da-gin₇ zig₃-zig₃ nu-e-zu
¹⁴²inim-zu-ce₃ dijir ^da-nun-na tu₅ im-ma-an-ak-ec
¹⁴³inim-zu an-ce₃ idim-ma ki-ce₃ temen-am₃
¹⁴⁴an-ce₃ idim gal an-ne₂ us₂-sa
¹⁴⁵ki-ce₃ temen sag₂ nu-di-dam
¹⁴⁶an-e um-ma-tej₃ he₂-jal₂-la-am₃
¹⁴⁷an-ta he₂-jal₂ im-da-cej₃-cej₃
¹⁴⁸ki-a um-ma-tej₃ giri₁₇-zal-am₃
¹⁴⁹ki-ta giri₁₇-zal im-da-mu₂-mu₂
¹⁵⁰inim-zu gu-am₃ inim-zu ce-am₃
¹⁵¹[inim]-zu a-ectub zi kur-kur-ra-kam
¹⁵²nij₂-zi-jal₂ nij₂-ki^! u₅-a
¹⁵³zi dug₃-ga u₂ cim im-da-pa-an-pa-an
¹⁵⁴^den-lil₂ sipad zid-me-en DU.DU-bi mu-un-zu
¹⁵⁵X-ga dug₃ tuku-am₃ mul gun₃-gun₃-a
¹⁵⁶^dnin-lil₂ nitalam kug inim-ma-ni cag₄-ga
¹⁵⁷^tug₂ma₆ kug ulutim₂-ta nir-ra alan me-dim₂-ta sig₁₀-ga
¹⁵⁸munus zid igi il₂-la ba-e-de₃-du₁₂-dam
¹⁵⁹ul gur₃-ru e₂-kur-ra nin me-te-jal₂ zu
¹⁶⁰ad gi₄-gi₄ inim-ma ba-ab-du₇
¹⁶¹inim-ma-ni su-a bi₂-dug₃-ga-bi i₃-li cag₄-ga-kam
¹⁶²barag kug barag sikil-da ci-im-mu-e-da-an-til₃ (1 ms. has instead: ca-mu-da-an-tuc)
¹⁶³ad ci-mu-da-an-gi₄-gi₄ cag₄ ci-mu-da-an-kuc₂-u₃
¹⁶⁴nam tar-re ki ^dutu ed₂-a nam ci-mu-da-ab-tar-re
¹⁶⁵^dnin-lil₂ nin an ki nin kur-kur-ra-ke₄
¹⁶⁶za₃-mi₂ kur gal-la-ka mi₂ dug₄-ga
¹⁶⁷mah di inim-ma-ni ki-bi-ce₃ jar
¹⁶⁸dug₄-ga a₂-tah-a-ni nij₂-nu-kur₂-ru
¹⁶⁹ka-ta ed₂-a-ni saj ba-an-gub
¹⁷⁰jic-hur-hur-ra-ni inim ge-en-ge-en
¹⁷¹kur gal a-a ^den-lil₂ za₃-mi₂-zu mah-am₃

Top | translation | bibliography

Revision history

05.x.1998-10.x.1998 : GZ : standardisation
29.xi.1998-30.xi.1998 : JAB : proofreading
14.ii.1999 : JAB : SGML tagging
12.iii.1999 : ER : proofreading SGML
12.iii.1999 : ER : converting to HTML 4.0
7.ix.2001 : ER : header and footer reformatted; substantive content of file not changed