Lugalbanda: composite text

¹lugal-ban₃-da kur ki su₃-ra₂ ja₂-la ba-ni-in-dag
²ici za-bu^ki-a nir ba-ni-in-jal₂
³ama nu-mu-un-da-an-ti na nu-mu-un-ri-ri
⁴a-a nu-mu-un-da-an-ti inim nu-mu-un-di-ni-ib-be₂
⁵zu-a kal-la-ni nu-mu-un-da-an-ti
⁶lu₂ inim cag₄-ga-na-ke₄ inim nu-um-mi-ib₂-sig₁₀-sig₁₀-ge
⁷cag₄ ni₂-te-na-ka inim am₃-mi-ib₂-sig₁₀-ge
⁸mucen nam-me-te-a ba-ni-in-ak
⁹anzud^mucen nam-me-te-a ba-ni-in-ak
¹⁰dam-a-ni-da gu₂-da ba-ni-in-la₂
¹¹dam anzud^mucen-de₃ dumu anzud^mucen-de₃
¹²jicbun-na um-ma-ni-in-dur₂-ru-un
¹³an-ne₂ nin-gu₂-en-na-ka
¹⁴hur-saj-ja₂-ni-ta um-ma-da-an-ri
¹⁵munus tuku-tuku ama-ra me-te jal₂
¹⁶^dnin-ka-si tuku-tuku ama-ra me-te jal₂
¹⁷^na₄gakkul-a-ni ^na₄za-gin₃ dur₅-ru
¹⁸^gilam-sa₂-a-ni kug-me kug-sig₁₇
¹⁹kac-a gub-ba-a-ni nij₂-giri₁₇-zal
²⁰kac-ta tuc-a-ni mud₅-me-jar-ra
²¹sagi-a kac sa₂-sa₂-da-ni DU.DU nu-kuc₂-u₃
²²^dnin-ka-si ^jicbunij(SUG) zag-ga-ta ib₂^?-ba-ta
²³jectin ne-saj-ja₂-ju₁₀ me-te-a-ac he₂-em-mi-ib-jal₂
²⁴mucen kac naj-ja₂ ul ti-a
²⁵anzud^mucen kac naj-ja₂ ul ti-a
²⁶ki unug^ki ba-jen-na ha-ma-an-pad₃-de₃
²⁷anzud^mucen-de₃ har-ra-an cec-ju₁₀-ne-ka he₂-em-mi-ib-sig₁₀-sig₁₀-ge
²⁸ud-ba giri₁₇-zal jic hu-ri₂-in ^den-ki-ke₄
²⁹hur-saj ^na₄gug igi-gun₃ ^dinana-ka
³⁰ugu-ba u₁₈-ru-gin₇ ki he₂-us₂-sa-ba
³¹a-ru-gin₇ siki la₂-la₂-a-ba
³²kur-ra jissu-bi ki-mah-ba
³³tug₂-gin₇ i-im-dul gada-gin₇ i-im-bur₂
³⁴^jici-ri₉-na-bi muc saj-kal-gin₇
³⁵id₂ ka 7 ^dutu-ka cag₄-ba mu-un-ce₂₁-ce₂₁
³⁶da-da-ba ha-cu-ur₂ nu-zu kur-ra-ka
³⁷muc nu-un-sul-sul jir₂ nu-sa-sa
³⁸cag₄-ba buru₅-az^mucen-e
³⁹gud₃ im-ma-ni-ib-us₂ nunus-bi ba-ab-jar
⁴⁰da-da-ba mucen anzud^mucen-de₃
⁴¹gud₃ im-ma-ni-ib-jar amar-bi ba-e-ceg₁₁
⁴²jic-bi jic-li jic ^jictaskarin-na-kam
⁴³mucen-e pa mul-mul-la-bi an-dul₃-ce₃ ba-ab-ak
⁴⁴mucen-e a₂ ud zal-le-da-ka ni₂ un-gid₂
⁴⁵anzud^mucen-de₃ ^dutu ed₂-a-ra ceg₁₁ un-gi₄
⁴⁶ceg₁₁ gi₄-bi-ce₃ kur-ra lu₅-lu₅-bi-a ki mu-un-ra-ra-ra
⁴⁷umbin kucu₂^ku₆-e hu-ri₂-in^mucen-na-kam
⁴⁸ni₂-bi-ta am-e kur ur₂-ce₃ ni₂-bi im-sar-re
⁴⁹tarah-e kur-bi-ce₃ zi-bi im-sar-re
⁵⁰lugal-ban₃-da gal in-zu gal in-ga-an-tum₂-mu
⁵¹ninda mu-ud-gi dijir-re-e-ne-ke₄
⁵²saj-sig₁₀-ga-ba saj-sig₁₀ ba-an-tah
⁵³ninda gi-ze-ec-ta-ba lal₃ ba-an-du₈-du₈ lal₃ ba-an-tah-tah
⁵⁴amar-gud₃ amar anzud^mucen-da-ka igi-bi-ce₃ mu-un-jar
⁵⁵amar-e ^uzusul₂ bi₂-in-gu₇ ^uzu;i₃-udu bi₂-in-pec₅
⁵⁶ninda-i₃-de₂-a ka-bi-ce₃ sa₂ bi₂-in-dug₄
⁵⁷amar anzud^mucen-da-ka gud₃-ba mi-ni-ceg₁₁
⁵⁸igi-bi cim-bi-zid-da mi-ni-gun₃
⁵⁹saj-ba ^jicerin bar₆-bar₆ bi₂-in-du₃-du₃
⁶⁰mu-du-li-a cu gur-gur-ra-bi saj-bi-ce₃ mu-un-jar
⁶¹gud₃ anzud^mucen-da-ka ba-ra-zig₃
⁶²ha-cu-ur₂-ra nu-zu kur-ra-ka ki-gub mu-un-na-ak-en
⁶³ud-ba mucen-e am kur-ra-ka gu₂ mi-ni-ib-gur-gur
⁶⁴anzud^mucen-de₃ am kur-ra-ka gu₂ mi-ni-ib-gur-gur
⁶⁵am ti-la cu-bi-ce₃ i-im-la₂
⁶⁶am ug₅-ga gu₂-ba i-im-la₂
⁶⁷a 10^! gur^!-am₃ ze₂^!-bi mu-un-de₂
⁶⁸mucen zag dic am₃-ma-da-lu-ga
⁶⁹anzud^mucen zag dic am₃-ma-da-lu-ga
⁷⁰mucen-e gud₃-bi-ce₃ ceg₁₁ un-gi₄
⁷¹amar-bi gud₃-bi-ta inim nu-um-ma-ni-ib-gi₄
⁷²2-kam-ma-ce₃ mucen-e gud₃-bi-ce₃ ceg₁₁ un-gi₄
⁷³amar-bi gud₃-bi-ta inim nu-um-ma-ni-ib-gi₄
⁷⁴ud na-an-ga-ma mucen-e gud₃-bi-ce₃ ceg₁₁ un-gi₄
⁷⁵amar-bi gud₃-bi-ta inim ba-ni-ib-gi₄-gi₄
⁷⁶i₃-ne-ce₃ mucen-e gud₃-bi-ce₃ ceg₁₁ un-gi₄
⁷⁷amar-bi gud₃-bi-ta inim nu-um-ma-ni-ib-gi₄
⁷⁸mucen-e a-nir i-im-jar an-e ba-tej₃
⁷⁹dam-bi u₈ bi₂-in-dug₄ engur-ra ba-tej₃
⁸⁰mucen-e u₈ dug₄-ga-bi-ce₃
⁸¹dam-bi a-nir jar-ra-bi-ce₃
⁸²^da-nun-na dijir hur-saj-ja₂
⁸³kici₈-gin₇ ki-in-dar-ra ba-an-di-ni-ib-kur₉-re-ec-am₃
⁸⁴mucen-e dam-bi-ir gu₃ am₃-ma-de₂-e
⁸⁵anzud^mucen-de₃ dam-bi-ir gu₃ am₃-ma-de₂-e
⁸⁶gud₃-ju₁₀-ta tur₃ gal ^dnanna-gin₇ ni₂ huc he₂-em-da-ri
⁸⁷pirij kur-ra tec₂-bi du₇-du₇-gin₇ su-zi he₂-em-du₈-du₈
⁸⁸amar-ju₁₀ gud₃-ba a-ba-a ba-ra-ab-tumu₃
⁸⁹anzud^mucen gud₃-ba a-ba-a ba-ra-ab-tumu₃
⁹⁰mucen-e gud₃-bi-ce₃ he₂-em-ma-tej₃-je₂₆-da-ka
⁹¹anzud^mucen-de₃ gud₃-bi-ce₃ he₂-em-ma-tej₃-je₂₆-da-ka
⁹²ki dijir til₃-la-gin₇ im-ak giri₁₇-zal im-du₈-du₈
⁹³amar-bi gud₃-bi-a i-im-ceg₁₁
⁹⁴igi-bi cim-zid-da mu-un-gun₃
⁹⁵saj-ba ^jicerin bar₆-bar₆ mu-un-du₃-du₃
⁹⁶mu-du-li-a cu gur-gur-ra-bi saj-bi-ce₃ mu-un-jar
⁹⁷mucen-e ni₂-bi silim-e-ce₃ iri in-ga-am₃-me
⁹⁸anzud^mucen-de₃ ni₂-bi silim-e-ce₃ iri in-ga-am₃-me
⁹⁹id₂ hal-hal-la nun nam tar-re-bi-me-en
¹⁰⁰zid du cag₄ kuc₂-u₃ ^den-lil₂-la₂-ka ^jicigi-tab-bi-me-en
¹⁰¹a-a-ju₁₀ ^den-lil₂-le mu-un-de₆-en
¹⁰²kur-ra ^jicig gal-gin₇ igi-ba bi₂-in-tab-en
¹⁰³nam u₃-mu-tar a-ba-a cu mi-ni-ib-bal-e
¹⁰⁴inim u₃-bi₂-dug₄ a-ba-a ib₂-ta-bal-e
¹⁰⁵lu₂ gud₃-ja₂ ne-en ba-e-a-ak-a
¹⁰⁶dijir he₂-me-en inim ga-mu-ra-ab-dug₄
¹⁰⁷gu₅-li-ja₂ nam-ba-e-ni-kur₉-re-en
¹⁰⁸lu₂-ulu₃ he₂-me-en nam ga-mu-ri-ib-tar
¹⁰⁹kur-re gaba cu jar nam-mu-ri-in-tuku-un
¹¹⁰mes anzud^mucen-de₃ a₂ cum₂-ma he₂-me-en
¹¹¹lugal-ban₃-da ni₂ dic-ta hul₂-la dic-ta
¹¹²ni₂ dic cag₄ hul₂-la dic-ta
¹¹³mucen-e mi₂ iri im-me
¹¹⁴anzud^mucen-de₃ mi₂ iri im-me
¹¹⁵mucen cu-ur₂ sig₇ nijin₅-a tud-da
¹¹⁶anzud^mucen cu-ur₂ sig₇ nijin₅-a tud-da
¹¹⁷sug-a a tu₅-tu₅-zu-a a-ne dug₄-dug₄
¹¹⁸pa-bil₂-ga-zu nun hal-hal-la-ke₄
¹¹⁹an cu-zu-ce₃ mu-un-jar ki jiri₃-zu-ce₃ mu-un-jar
¹²⁰pa-zu an-na sa am₃-ci-im-la₂-la₂-en nu-mu-[...]
¹²¹ki-ce₃ umbin-zu am kur-ra cilam kur-ra ^jices₂-ad^!-am₃ ba-nu₂
¹²²murgu-zu dub sar-sar-re-me-en
¹²³ti-ti-zu ^dnirah dar-a-me-en
¹²⁴ca₃-su₃-zu kiri₆ sig₇-ga u₆-e gub-ba-me-en
¹²⁵ca-dug₄-ga-ta zi-ju₁₀ mu-ri-de₆ zag-ju₁₀ mu-ri-us₂
¹²⁶dam-zu ama-ju₁₀ he₂-am₃ bi₂-in-dug₄
¹²⁷za-e ad-da-ju₁₀ he₂-me-en bi₂-in-dug₄
¹²⁸di₄-di₄-la₂-zu-ne cec-ju₁₀-ne-ka nam-ba-e-ni-in-ku₄-ku₄
¹²⁹ca-dug₄-ga-ta ha-cu-ur₂-ra nu-zu kur-ra-ka ki-gub mu-ra-ak-e
¹³⁰dam-zu silim-ja₂ he₂-mu-e-da-gub
¹³¹silim-ju₁₀ ga-mu-ra-dug₄ nam tar-ra-ju₁₀ ga-mu-ra-ab-[bur₂]-ra-a
¹³²mucen-e ni₂-bi mu-un-na-ra-ba-e ul mu-un-ci-ak-e
¹³³anzud^mucen-de₃ ni₂-bi mu-un-na-ra-ba-e ul mu-un-ci-ak-e
¹³⁴anzud^mucen-de₃ kug lugal-ban₃-da-ar gu₃ mu-na-de₂-e
¹³⁵ja₂-nu lugal-ban₃-da-ju₁₀
¹³⁶^jicma₂ kug-gin₇ ^jicma₂ ce-gin₇
¹³⁷^jicma₂ ^jichachur bal-bal-e-gin₇
¹³⁸^jicma₂ ukuc₂-a an-dul₃ ak-a-gin₇
¹³⁹^jicma₂ ki buru₁₄ hi-li du₈-du₈-a-gin₇
¹⁴⁰sig₄ kul-aba₄^ki-ce₃ saj il₂-la jen-na
¹⁴¹lugal-ban₃-da lu₂ numun-e ki aj₂-am₃ cu nu-um-<ma>-gid₂-de₃
¹⁴²^dcara₂ dumu ki aj₂ ^dinana-gin₇
¹⁴³ti zu₂-zu-a ud-gin₇ ed₂-i₃
¹⁴⁴GIL.AK iti₆-gin₇ ed₂-i₃
¹⁴⁵ti zu₂ lu₂ ra-ra-bi muc cag₄-tur₃ he₂-e
¹⁴⁶ku₆ ^uruddur₁₀ ra-gin₇ tu₆ kud he₂-e
¹⁴⁷ad ^uruddur₁₀ ra-gin₇ nij₂-KEC₂ he₂-ak-e
¹⁴⁸lugal-ban₃-da lu₂ numun-e ki aj₂-am₃ cu nu-um-ma-gid₂-de₃
¹⁴⁹^dnin-urta dumu ^den-lil₂-la₂-ke₄
¹⁵⁰^tug₂sagcu pirij me₃-a ugu-za he₂-eb-dul
¹⁵¹LUM^? BU TUKU kur gal-la gaba nu-gi₄ gaba-za he₂-eb-tab
¹⁵²kur-ra sa u₃ NE₂ KA sa UC [...]
¹⁵³iri im-ci-du-u₅ ki X [...]
¹⁵⁴lugal-ban₃-da lu₂ numun-e ki [aj₂-am₃ cu nu]-/um\-ma-/gid₂\-[de₃]
¹⁵⁵he₂-jal₂ ^dugcakir kug ^ddumu-zid-da-[ka-ka]
¹⁵⁶i₃-bi ki-car₂-ra-ke₄ ca-ra-X [...]
¹⁵⁷gara₂-bi ki-car₂-ra-ke₄ ca-ra-X [...]
¹⁵⁸lugal-ban₃-da lu₂ numun-e ki aj₂-am₃ cu nu-um-ma-gid₂-de₃
¹⁵⁹ki-ib^mucen ki-ib^mucen engur-ra sug gid₂-i-gin₇ inim-ma /mu\-[na]-ni-ib-gi₄
¹⁶⁰mucen-e jectug₂ mu-un-ci-ja₂-ar
¹⁶¹anzud^mucen-de₃ kug lugal-ban₃-da-ar gu₃ mu-na-de₂-e
¹⁶²ja₂-nu lugal-ban₃-da-ju₁₀
¹⁶³inim cag₄-ga sig₁₀-ge ur₅-gim-ma-am₃
¹⁶⁴gud erim₂ du-us₂-a sig₁₀-ge₅-dam
¹⁶⁵ance dug₃ guz-za har-ra-an si sa₂ dab₅-be₂-dam inim-inim ma-gub ga-ri-gub
¹⁶⁶nam tar-ra cag₄-ge gur₇-a-zu je₂₆-e ga-mu-ri-ib-tar
¹⁶⁷kug lugal-ban₃-da mu-na-ni-ib-gi₄-gi₄
¹⁶⁸za₃-ce-ja₂ kas₄ he₂-jal₂ nam-ba-kuc₂-u₃-de₃-en
¹⁶⁹a₂-ja₂-a lirum he₂-jal₂
¹⁷⁰a₂-ju₁₀ ga-sud-sud a₂-ju₁₀ na-an-gig-ge
¹⁷¹ud-gin₇ du ^dinana-gin₇
¹⁷²ud 7-e ud ^dickur-ra-gin₇
¹⁷³izi-gin₇ ga-il₂ nim-gin₇ ga-jir₂
¹⁷⁴igi du₈-a bar-ra-ja₂ ga-jen
¹⁷⁵igi il₂-la-ja₂ jiri₃-ju₁₀ ga-ab-gub
¹⁷⁶cag₄-ge gur₇-ja₂ an-ta ga-ab-gi₄
¹⁷⁷ki cag₄-ju₁₀ na-an-ga-ma-ab-be₂-a ^kuce-sir₂-[ju₁₀] ga-du₈
¹⁷⁸^dutu iri-ju₁₀ kul-aba₄^ki-ce₃ am₃-ku₄-ku₄-de₃-ne-a
¹⁷⁹lu₂ ac₂ dug₄-ga-ju₁₀ nam-ba-e-ci-hul₂-e-en
¹⁸⁰lu₂ du₁₄ mu₂-a-ju₁₀ he₂-du-ju₁₀ nam-me
¹⁸¹alan-zu jic-dim₂-ba um-mi-dim₂ u₆-e gub-ba-me-en
¹⁸²mu-zu ki-en-gi-ra pa ed₂ ha-bi₂-ak
¹⁸³e₂ dijir gal-gal-e-ne-ka me-te-ac bi₂-[ib]-jal₂
¹⁸⁴anzud^mucen-de₃ kug lugal-ban₃-da-ra /gu₃\ [mu-na]-de₂-e
¹⁸⁵za₃-ce-za kas₄ he₂-jal₂ nam-[ba-kuc₂-u₃-de₃]-/en\
¹⁸⁶a₂-zu-a lirum [he₂-jal₂]
¹⁸⁷a₂-zu sud-sud-a a₂-[zu na-an-gig-ge]
¹⁸⁸ud-gin₇ du ^d[inana-gin₇]
¹⁸⁹ud 7 ^d[ickur-ra]-/gin₇\
¹⁹⁰izi-gin₇ il₂-la nim-gin₇ jir₂-a
¹⁹¹igi du₈-a bar-ra-za jen-na
¹⁹²igi il₂-la-za jiri₃-zu gub-bi₂-ib
¹⁹³cag₄-ge gur₇-a-zu an-ta gi₄-bi₂
¹⁹⁴ki cag₄-zu na-an-ga-ra-ab-be₂-e-a ^kuce-sir₂-zu du₈-a
¹⁹⁵^dutu iri-zu kul-aba₄^ki-ce₃ am₃-ku₄-ku₄-de₃-en-na-a
¹⁹⁶lu₂ ac₂ dug₄-ga-zu nam-ba-e-ci-hul₂-le-en
¹⁹⁷lu₂ du₁₄ mu₂-a-zu he₂-du-zu nam-me
¹⁹⁸[alan]-ju₁₀ jic-dim₂-ba um-mi-dim₂ u₆-e um-mi-gub
¹⁹⁹[mu]-ju₁₀ ki-en-gi-ra pa ed₂ ba-ni-ak
²⁰⁰[e₂] /dijir\ gal-gal-e-ne-ka me-te-ac im-mi-ib-jal₂
²⁰¹[X] X ^kuce-sir₂-gin₇ ni₂-ba hu-mu-ra-an-dub₂-dub₂-be-ec
²⁰²[X] ^id₂buranun-na pa₅ ubur-gin₇ jiri₃-zu pa₄-pa₄ mi₂ am₃-me
²⁰³[ninda] kaskal-la-ka-ni nu-um-ka-ac
²⁰⁴^jictukul-a-ni dic-bi cu im-ma-an-ti
²⁰⁵anzud^mucen an-ta i₃-jen
²⁰⁶lugal-ban₃-da ki-ta i₃-jen
²⁰⁷[mucen-e an]-ta igi mi-ni-in-il₂ erin₂-e igi bi₂-in-du₈-ru
²⁰⁸[lugal]-/ban₃\-da ki-ta igi mi-ni-in-il₂ sahar erin₂-e du₈-a igi bi₂-in-du₈-ru
²¹⁹mucen-e kug lugal-ban₃-da-ar gu₃ mu-na-de₂-e
²¹⁰ja₂-nu lugal-ban₃-da-ju₁₀
²¹¹na ga-e-ri na-ri-ju₁₀ he₂-e-dab₅
²¹²inim ga-ra-ab-dug₄ jizzal he₂-em-ci-ak
²¹³gu₃ i-ri-de₂-a nam i-ri-tar-ra
²¹⁴gu₅-li-zu-ne-er nam-mu-ni-ib-be₂-en
²¹⁵cec-zu-ne-er pa nam-bi₂-ib-ed₂-en
²¹⁶sag₉-ga hul cag₄-ga jal₂-la ur₅ he₂-na-nam-ma
²¹⁷je₂₆-e gud₃-ju₁₀-ce₃ he₂-me-en za-e erin₂-zu he₂-me-en
²¹⁸mucen-e gud₃-bi-ce₃ cu am₃-ma-nijin
²¹⁹lugal-ban₃-da ki cec-a-ne-ne-ce₃ jiri₃ im-ma-gub-be₂
²²⁰u₅^mucen jic-gi kug-ta ed₂-a-gin₇
²²¹la-ha-ma abzu-ta re₇-e-gin₇
²²²lu₂ an-ta ki-a gub-ba-gin₇
²²³lugal-ban₃-da ka KEC₂ jar-ra cec-a-ne-ne-ka murub₄-ba ba-an-gub^?
²²⁴cec-a-ne-ne gu₃ ba-ab-ra-ra-ra-/ac\ [X] erin₂-e gu₃ ab-ra-ra-ac
²²⁵cec-a-ne-ne gu₅-li-ne-ne
²²⁶en₃ tar-re im-mi-in-kuc₂-u₃-ne
²²⁷ja₂-nu lugal-ban₃-da-ju₁₀ za-e jal₂-la-zu-ne
²²⁸lu₂ me₃-a jic ra-gin₇ erin₂-e he₂-en-taka₄-nam
²²⁹i₃ dug₃-a tur₃-ra ba-ra-mu-un-gu₇
²³⁰ga luh-ha amac-a ba-ra-mu-un-gu₇
²³¹hur-saj gal lu₂ dili nu-du-u₃-da
²³²lu₂-bi lu₂-ra nu-gi₄-gi₄-da a-gin₇ im-da-du-de₃-en
²³³2-kam-ma-ce₃ cec-a-ne-ne gu₅-li-ne-ne
²³⁴en₃ tar-re im-mi-in-kuc₂-u₃-ne
²³⁵id₂ kur-ra ama he₂-nun-na-ra
²³⁶pec₁₀-pec₁₀-bi pec₁₀-ta sur-ra-am₃
²³⁷a-bi a-gin₇ mu-e-naj-a-gin₇ mu-e-bal-e
²³⁸kug lugal-ban₃-da mu-un-na-ni-ib-gi₄-gi₄
²³⁹id₂ kur-ra ama he₂-nun-na-ra
²⁴⁰pec₁₀-pec₁₀-bi pec₁₀-ta sur-ra-am₃
²⁴¹za₃-ce-ja₂ ki um-ma-ni-us₂ a ^kucummud-gin₇ u₃-mu-naj
²⁴²ur-bar-ra-gin₇ gum₃-ga-am₃ mi-ni-za u₂-sal i₃-gu₇-en
²⁴³tu-gur₄^mucen-gin₇ ki im-ri-ri-ge-en i-li-a-nu-um kur-ra i₃-gu₇-[en]
²⁴⁴lugal-ban₃-da cec-a-ne-ne gu₅-li-ne-ne
²⁴⁵inim in-ne-en-dug₄-ga cag₄-ga-ne-ne-a ba-an-cub-bu-uc
²⁴⁶i-gi₄-in-zu buru₅^mucen-e ud gid₂-da tec₂-bi KEC₂-da-gin₇
²⁴⁷gu₂-ni gu₂-da im-da-la₂-e-ne ne mu-un-su-su-ub
²⁴⁸amar gam₃-gam₃^mucen gud₃-ba tuc-a-gin₇
²⁴⁹mu-ni-ib-gu₇-u₃-ne mu-ni-ib-na₈-na₈-ne
²⁵⁰kug lugal-ban₃-da tu-ra-ni mu-un-ta-ab-ed₃-ne
²⁵¹ud-ba unug^ki-ga lu₂ dili-gin₇ ejer-bi-ir bi₂-ib-us₂
²⁵²muc zar-ra-gin₇ hur-saj-ta im-me-re-bal-bal
²⁵³iri danna 1-am₃ am₃-da-jal₂-la-ba
²⁵⁴dim-dim-e aratta^ki-ka
²⁵⁵unug^ki kul-aba₄^ki-bi ur₂ ba-an-dun-dun
²⁵⁶iri-ta gi-bar-bar-re im-gin₇ im-cej₃
²⁵⁷im-dug-ge im mu-a jen-na-gin₇
²⁵⁸bad₃ aratta^ki-ka gu₃-nun-bi im-me
²⁵⁹ud ba-zal-zal iti ba-sud-sud mu ama-bi-ir ba-gi₄
²⁶⁰buru₁₄ sig₇-ga an-na ba-e-a-ed₃-de₃
²⁶¹a-cag₄-ga igi ba-ab-hul ni₂ su-e bi₂-ib-us₂
²⁶²im-dug-ge im mu-a jen-na-gin₇
²⁶³kaskal-la ki ba-ni-ib₂-u₂-us₂
²⁶⁴^jicU₂.JIR₂ kur-ra-ke₄ ka ba-ni-ib₂-KEC₂
²⁶⁵ucumgal tec₂-bi mu-un-tag-tag-ge
²⁶⁶lu₂ iri-ce₃ du-u₃ nu-um-zu
²⁶⁷kul-aba₄^ki-ce₃ du-u₃ saj nu-mu-da-ab-cum₂-mu
²⁶⁸cag₄-ba en-me-er-kar₂ dumu ^dutu-ke₄
²⁶⁹ni₂ ba-ni-in-te zi ba-ni-in-ir za-pa-aj₂-bi ba-ni-in-BAD
²⁷⁰lu₂ iri-ce₃ mu-un-gi₄-gi₄-a ki mu-ci-kij₂-kij₂
²⁷¹kul-aba₄^ki-ce₃ mu-un-gi₄-gi₄-a ki mu-ci-kij₂-kij₂
²⁷²lu₂ iri-ce₃ je₂₆-e ga-jen nu-mu-un-na-ab-be₂
²⁷³kul-aba₄^ki-ce₃ je₂₆-e ga-jen nu-/mu\-[un-na-ab]-/be₂\
²⁷⁴ugnim kur-kur-ra-ka /mu\-[un-ed₂]
²⁷⁵lu₂ iri-ce₃ je₂₆-e ga-jen nu-mu-/na\-[ab-be₂]
²⁷⁶kul-aba₄^ki-ce₃ je₂₆-e ga-jen nu-mu-na-/ab\-[be₂]
²⁷⁷ka-KEC₂ igi bar-ra-ka mu-un-ed₂
²⁷⁸lu₂ iri-ce₃ je₂₆-e ga-jen nu-mu-na-ab-be₂
²⁷⁹kul-aba₄^ki-ce₃ je₂₆-e ga-jen /nu\-[mu-na-ab-be₂]
²⁸⁰2-kam-ma-ce₃ ugnim kur-kur-ra-ka mu-un-ed₂
²⁸¹lu₂ iri-ce₃ je₂₆-e ga-jen nu-mu-na-ab-be₂
²⁸²kul-aba₄^ki-ce₃ je₂₆-e ga-jen nu-/mu\-[na-ab-be₂]
²⁸³ka-KEC₂ igi bar-ra-ka mu-un-ed₂
²⁸⁴lugal-ban₃-da dili-ni uj₃-ja₂ mu-na-an-zi gu₃ mu-na-de₂-e
²⁸⁵lugal-ju₁₀ je₂₆-e iri-ce₃ ga-jen lu₂ nam-mu-da-an-du
²⁸⁶kul-aba₄^ki-ce₃ dili-ju₁₀-ne ga-jen lu₂ nam-mu-da-an-du
²⁸⁷ud-da iri-ce₃ i₃-du-un lu₂ nu-mu-e-da-du-u₃
²⁸⁹zi an-na zi ki-a i₃-pad₃ me gal-gal kul-aba₄^ki-a cu-zu ba-ra-ba-ra-ed₂
²⁹⁰unkin jar-ra si sa₂-a-na
²⁹¹cag₄ e₂-gal-la kur gal-gin₇ ki he₂-us₂-a-ba
²⁹²en-me-er-kar₂ dumu ^dutu-ke₄
²⁹³eme sig ^dinana ba-ni-in-gu₇
²⁹⁴ki ud-ba nin₉ e₅-ju₁₀ kug ^dinana-ke₄
²⁹⁵kur cuba^?-ta cag₄ kug-ga-ni-a he₂-em-ma-ni-pad₃-de₃-en
²⁹⁶sig₄ kul-aba₄^ki-ce₃ he₂-em-[ma-ni]-in-kur₉-re-en
²⁹⁷unug^ki-e sug he₂-me-am₃ a he₂-em-de₂-a
²⁹⁸bar₂-rim₄ he₂-me-am₃ ^jicasal he₂-mu₂-a
²⁹⁹jic-gi he₂-me-am₃ gi-uc₂ gi-henbur he₂-<mu₂-a>
³⁰⁰^den-ki lugal eridug^ki-ga-ke₄
³⁰¹gi-uc₂-bi ha-ma-an-ze₂ a-bi ha-ma-an-uc₂
³⁰²mu ninnu-uc hu-mu-du₃ mu ninnu-uc hu-mu-di
³⁰³ki-en-gi ki-uri nijin₂-na-a-ba
³⁰⁴mar-tu lu₂ ce nu-zu hu-mu-zig₃
³⁰⁵bad₃ unug^ki-ga gu mucen-na-gin₇ edin-na he₂-ni-la₂-la₂
³⁰⁶i-da-al-la-ba ki-jal₂-la-ba hi-li-ju₁₀ ba-til
³⁰⁷ab₂cilam amar-bi la₂-a-gin₇ erin₂-ju₁₀ mu-da-la₂
³⁰⁸dumu ama-ni-ir hul gig-ga iri-ta ed₂-a-gin₇
³⁰⁹nin₉ e₅-ju₁₀ kug ^dinana-ke₄
³¹⁰sig₄ kul-aba₄^ki-ce₃ cu ma-ra-an-dag
³¹¹ud-da iri-ni ki ha-ba-an-aj₂ ja₂-a-ra hul ha-ba-an-gig
³¹²iri ja₂-da a-na-ac am₃-da-la₂-e
³¹³ud-da iri-ni hul ha-ba-an-gig ja₂-a-ra ki ha-ba-an-aj₂
³¹⁴je₂₆-e iri-da a-na-ac am₃-da-la₂-e-en
³¹⁵nu-gig-ge anzud^mucen amar-ra-gin₇
³¹⁶ni₂ te-a-ni sag₂ um-ma-an-di^!
³¹⁷bar kug-ga-ni-a um-ma-an-cub-be₂-en
³¹⁸sig₄ kul-aba₄^ki-ce₃ he₂-em-ma-ni-in-kur₉-re-en
³¹⁹^jicgid₂-da-ju₁₀ ud ne ba-an-de₆
³²⁰^kucE.IB₂.UR₂-ju₁₀ ud ne e-ne ba-an-zur-zur-re
³²¹nin₉ e₅-ju₁₀ kug ^dinana-ra ur₅-gin₇ dug₄-mu-na-ab
³²²kug lugal-ban₃-da e₂-gal-ta im-ma-da-ra-ta-ed₂
³²³cec-a-ne-ne gu₅-li-ne-ne
³²⁴ur gir₅ ur-ra kur₉-ra-gin₇ hu-un-ha mu-un-ci-ib-za-na-ac
³²⁵dur₃ gir₅ dur₃-a kur₉-ra-gin₇ galam mu-un-na-ta-ed₂
³²⁶en-ra unug^ki-ce₃ gi₄-mu-un-ci-ib
³²⁷en-me-er-kar₂ dumu ^dutu-ra
³²⁸kul-aba₄^ki-ce₃ dili-ju₁₀-ne ga-jen lu₂ nam-mu-da-du a-gin₇ mu-un-ne-dug₄
³²⁹me-na-am₃ dili-zu-ne kaskal-e saj ba-ra-mu-ri-ib-us₂
³³⁰^dudug sag₉-ga-me nam-ba-e-de₃-gub-ba
³³¹^dlama sag₉-ga-me nam-ba-e-de₃-jen-na
³³²ki-gub-ba-me-a nam-ba-e-de₃-gub-bu-nam
³³³ki-tuc-a-me-a nam-ba-e-de₃-tuc-u₃-nam
³³⁴sahar jiri₃-me-a jiri₃ nam-ba-e-de₃-us₂-e
³³⁵hur-saj gal lu₂ dili nu-du-u₃-dam
³³⁶lu₂-bi lu₂-ra nu-gi₄-gi₄-da ba-ra-gi₄-gi₄-nam
³³⁷ud zal-le in-zu-ta ki-gal-la ba-ra-da-ni-in-sug₂-ge-en-za-na
³³⁸lugal-ban₃-da cag₄ gu₃ di cec-a-ne-ne-ta
³³⁹cag₄ sig₃ gu₅-li-ne-ne-ta
³⁴⁰ninda kaskal-la-ka-ni nu-um-ka-ac
³⁴¹^jictukul-a-ni dic-bi dic-bi cu im-ma-an-ti
³⁴²kur ur₂-ra kur bad₃-da ma-du-um-e
³⁴³zag an-ca₄-na-ta saj an-ca₄-an^ki-na-ce₃
³⁴⁴hur-saj 5 hur-saj 6 hur-saj 7 im-me-re-bal-bal
³⁴⁵ji₆-sa₉-a ^jicbancur kug ^dinana-ke₄ nu-um-ma-tej₃-a-ac
³⁴⁶sig₄ kul-aba₄^ki-ce₃ jiri₃ hul₂-la mi-ni-in-gub
³⁴⁷nin-a-ni kug ^dinana-ke₄
³⁴⁸ca₃-da-ga-na mu-na-an-tuc
³⁴⁹i₃-gur₂ ki-a mu-na-ab-za
³⁵⁰su₈-ba ^dama-ucumgal-an-na mu-na-ci-bar-gin₇
³⁵¹kug lugal-ban₃-da igi mu-na-ci-bar-re
³⁵²dumu-na en ^dcara₂ mu-na-de₂-a-gin₇
³⁵³kug lugal-ban₃-da gu₃ mu-un-na-da-de₂-e
(1 ms. has instead of ll. 350-353:
^A igi ca₃ hul₂-la ^dinana-ke₄
^Bsu₈-ba ama-ucumgal-an-na-ra mu-un-ci-bar-ra-gin₇
^Ckug ^dlugal-ban₃-da mu-un-ci-bar
^Dgu₃ cag₄ [hul₂-la] ^dinana-ke₄
^Edumu-ni [en] [^d]/cara₂\ mu-un-na-de₂-a-gin₇
^F[kug] ^d[lugal]-/ban₃\-da mu-un-na-da-de₂-a)
³⁵⁴ja₂-nu lugal-ban₃-da-ju₁₀
³⁵⁵iri-ta a₂ aj₂-ja₂ a-na-ac mu-e-de₆
³⁵⁶aratta^ki dili-zu-ne a-gin₇ im-da-jen-ne-en
³⁵⁷kug lugal-ban₃-da mu-na-ni-ib-gi₄-gi₄
³⁵⁸cec-zu a-na bi₂-in-dug₄ a-na bi₂-in-tah
³⁵⁹en-me-er-kar₂ dumu ^dutu-ke₄ a-na bi₂-in-dug₄ a-na bi₂-in-tah
³⁶⁰ki ud-ba nin₉ e₅-ju₁₀ kug ^dinana-ke₄
³⁶¹kur cuba^?-ta cag₄ kug-ga-ni-a he₂-em-ma-ni-pad₃-de₃
³⁶²sig₄ kul-aba₄^ki-ce₃ he₂-em-ma-ni-in-kur₉-re-en
³⁶³unug^ki-e sug he₂-me-am₃ a he₂-em-de₂-a
³⁶⁴bar₂-rim₄ he₂-me-am₃ ^jicasal he₂-mu₂-a
³⁶⁵jic-gi he₂-me-am₃ gi-uc₂ gi-henbur he₂-mu₂-a
³⁶⁶^den-ki lugal eridug^ki-ga-ke₄
³⁶⁷gi-uc₂-bi ha-ma-an-ze₂ a-bi ha-ma-an-uc₂
³⁶⁸mu ninnu-uc hu-mu-du₃ mu ninnu-uc hu-mu-di
³⁶⁹ki-en-gi ki-uri nigin₂-na-a-ba
³⁷⁰mar-tu lu₂ ce nu-zu hu-mu-zig₃
³⁷¹bad₃ unug^ki-ga gu mucen-na-gin₇ edin-na he₂-ni-la₂-la₂
³⁷²i-da-la-ba ki-jal₂-la-ba hi-li-ju₁₀ ba-til
³⁷³ab₂cilam amar-bi la₂-a-gin₇ erin₂-ju₁₀ mu-da-la₂
³⁷⁴dumu ama-ni-[ir] hul gig-ga iri-ta ed₂-a-gin₇
³⁷⁵nin₉ e₅-ju₁₀ kug ^dinana-ke₄
³⁷⁶sig₄ kul-aba₄^ki-ce₃ cu ma-ra-an-dag
³⁷⁷ud-da iri-ni ki ha-ba-an-aj₂ ja₂-a-ra hul ha-ba-an-gig
³⁷⁸iri ja₂-da a-na-ac am₃-da-la₂-e
³⁷⁹ud-da iri-ni hul ha-ba-an-gig ja₂-a-ra ki ha-ba-an-aj₂
³⁸⁰ja₂-a iri-da a-na-ac am₃-da-la₂-e-en
³⁸¹nu-gig-ge anzud^mucen amar-ra-gin₇
³⁸²ni₂ te-a-ni sag₂ um-ma-an-di^!
³⁸³bar kug-ga-ni-a um-ma-an-cub-be₂-en
³⁸⁴sig₄ kul-aba₄^ki-ce₃ he₂-em-ma-ni-in-kur₉-re-en
³⁸⁵^jicgid₂-da-ju₁₀ ud ne ba-an-de₆
³⁸⁶^kucE.IB₂.UR₂-ju₁₀ ud ne e-ne ba-an-zur-zur-re
³⁸⁷nin₉ e₅-ju₁₀ kug ^dinana-ra ur₅-gin₇ dug₄-mu-na-ab
³⁸⁸kug ^dinana-ke₄ mu-na-ni-ib-gi₄-gi₄
³⁸⁹i₃-ne-ce₃ id₂ cen-na id₂ a cen-na-ka
³⁹⁰id₂ ^kucummud za-gin₃ ^dinana-ke₄
³⁹¹kun-ba pec₁₀-pec₁₀-ba u₂-sal-u₂-sal-ba
³⁹²suhur-mac^ku₆-e u₂ lal₃ i₃-gu₇-e
³⁹³kij₂-tur^ku₆-e ^u₂i-li-a-nu-um kur-ra i₃-gu₇-e
³⁹⁴JIC.CEC^ku₆ dijir suhur-mac₂^ku₆-a-ke₄
³⁹⁵cag₄-ba a-ne hul₂-la mu-un-e kun-bi mu-un-sud-e
³⁹⁶kun cika ri-ba gi-uc₂ ki kug-ga im-mi-ib₂-us₂-e
³⁹⁷^jiccinig ma-da a-na-me-a-bi
³⁹⁸ambar-bi-a a ib₂-na₈-na₈
³⁹⁹dili-bi i₃-du₃ dili-bi i₃-du₃
⁴⁰⁰^jiccinig-e bar-ta dili-bi i₃-du₃
⁴⁰¹en-me-<er>-kar₂ dumu ^dutu-ke₄
⁴⁰²^jiccinig-bi un-sig₃ ^jicbunij(SUG)-ce₃ un-dim₂
⁴⁰³gi-uc₂ ki kug-ga ur₂-ba mi-ni-bu cu im-ma-an-ti
⁴⁰⁴JIC.CEC^ku₆ dijir suhur-mac₂^ku₆-a-ke₄ cag₄-ba u₃-ba-ra-ed₂-a
⁴⁰⁵ku₆-bi un-dab₅ un-cej₆ un-sud
⁴⁰⁶a₂-an-kar₂ a₂ me₃ ^dinana-ka u₃-bi₂-in-gu₇
⁴⁰⁷erin₂-na-ni cu-bi he₂-en-di-ni-ib-sud-sud
⁴⁰⁸zi aratta-ka engur-ra he₂-ni-in-til
⁴⁰⁹iri kug dim₂-bi kug-dim₂ u₃-bi₂-in-dab₅
⁴¹⁰za dim₂-ma-bi za-dim₂ u₃-bi₂-in-dab₅
⁴¹¹iri-da u₃-gibil-la₂ um-ma-an-di-ni-ib-jar-jar
⁴¹²aratta^ki agarin₄-agarin₄-ba cu hu-mu-na-nijin
⁴¹³aratta^ki zag-ed₂-bi ^na₄za-gin₃ dur₅-ru-am₃
⁴¹⁴bad₃-bi sig₄ saj-zi-bi huc-am₃
⁴¹⁵im-bi im nagga
⁴¹⁶kur ha-cu-ur₂-ra-ta im-kid₂-a
⁴¹⁷kug lugal-ban₃-da za₃-mi₂

Top | Home This composition: translation | bibliography

Revision history

25.iii.1998-27.iii.1998 : JAB : standardisation
14.iv.1998 : GZ : proofreading
09.iv.1999 : GZ : SGML tagging
30.iv.1999 : ER : proofreading SGML
30.iv.1999 : converting to HTML 4.0
7.ix.2001 : ER : header and footer reformatted; substantive content of file not changed