The Electronic Text Corpus of Sumerian Literature

ETCSLtransliteration : c.4.19.1

A balbale to Ninĝišzida (Ninĝišzida A)

1.	[ur]-saj en cag₄-tum₂ a-gar₃ ur-mah kur sud-[da]
2.	^dnin-jic-zid-da muc-mah ucumgal-a-/da\ [tab-ba]
3.	am gal cen-cen-na gaba guz-a-ba a-ji₆ X [...]
4.	ama-ni ki aj₂ ^dnin-girid₂-<da>-a cag₄ hi-/li\-[a tud-da]
5.	[ubur] kug-ga-na ga zid gu₇-a uc₁₁ pirij sub-sub-ba
6.	abzu-a buluj₃-ja₂ icib mah-am₃ ec₂-da kug cu du₈
7.	saj₅-ja₂ dub kalag-ga-ba nij₂-zid zu₂ kece₂-da
8.	lugal am ur₅ un₃ eme si sa₂ nij₂-erim₂-e hul gig
9.	uru₂ idim hur nu-mu-un-gi₄-gi₄ cu suh₃-a di-de₃
10.	^dnin-jic-zid-da idim hur nu-mu-un-gi₄-gi₄ cu suh₃-a di-de₃
11.	erim-erim-ma cu-zu ma-ra-ci-jal₂
12.	sipad saj gig₂-ga cid-bi mu-e-zu
13.	u₈ sila₄-bi kij₂-kij₂-de₃ ma-ra-ci-jen
14.	ud₅-de₃ mac₂-bi jidru ud su₃-ra₂ tum₂-tum₂-mu-bi mu-e-zu
15.	^dnin-jic-zid-da jidru ud su₃-ra₂ tum₂-tum₂-mu-bi mu-e-zu
16.	lugal cag₄-la₂ sug₄ cag₄-ta e₃-a inim cudu₃-zu cu-a he₂-eb-gi₄
17.	nam-til₃ u₃-tud za-da ca-mu-un-jal₂
18.	nun hi-li sud-sud ^dnin-jic-zid-da
19.	/barag\ ki-tuc mah-a tuc-a-ni en dijir cul a₂ zid-da
20.	[X] X-zu-ur tug₂ mur₁₀ jidru za-gin₃ cu u₃-mu-e-ti
21.	[cir₃]-/nam\-cub ad mi-ri-ib-dug₄ ni₂-te-na mi-ni-/ib\-[be₂]
	1 line missing
23.	[...]-/bi\ ka lul-la bal-bal-[am₃ cag₄] mu-na-te-en-[te-en]
24.	[X] X car₂-car₂-ra ca-mu-cub^ub-be₂-en izi-gin₇ ba-ra-ma₅-ma₅-an
25.	lugal en cag₄ su₃-ra₂ barag mah-za nam dug₃ mu-ri-in-tar
26.	dijir nij₂-si-sa₂-e ki aj₂-e inim dug₃-bi mu-un-e
27.	palil gal-zu unken-na PA-PA-a he₂-du₇
28.	lugal ni₂ ri-a ildum₂ ud-bi saj-ba du-a
29.	an-bar an-ta a-ba de-jen-ne₂ a-na an-da-sa₂-a
30.	ur-saj me₃ igi jal₂ taka₄-a kur un₃-na i₃-a-e₃
31.	^dnin-jic-zid-da me₃ igi jal₂ taka₄-a kur un₃-na i₃-a-e₃
32.	lugal ki gu-la a₂ aj₂-ja₂ tum₂ ki DU-bi tum₂-mu-de₃
33.	cul dijir tuku ki a₂ aj₂-ja₂-ni igi-bi ma-ra-ci-jal₂
34.	lugal ka lal₃ dijir-re-e-ne ^den-ki za₃-mi₂
35.	^dnin-jic-zid-da dumu ^dnin-a-zu
36.	a-a ^den-ki za₃-mi₂
37.	bal-bal-e ^dnin-jic-zid-da-kam

Print sources

van Dijk 1960, p. 81-107: score transliteration, translation, commentary

Electronic sources

Krecher 1996b: translation, score transliteration

Cuneiform sources

AO 5390 (TCL 15 25; photo Parrot Assur fg. 352 mislabelled)

Revision history

30.vii.1999-11.viii.1999: JAB, editor: standardisation
10.viii.2000: GC, editor: proofreading
11.viii.2000: GC, editor: SGML tagging
08.xii.2000: ER, editor: proofreading SGML
28.x.2000: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published