| ETCSLtransliteration : c.2.1.7 |
|
| 1. | (A1.1) ud /an ki\-a nam tar-[re]-/da\ |
| 2. | (A1.2) /lagac\[ki]-e me gal-la [saj] an-ce3 mi-ni-ib2-il2 |
| 3. | (A1.3) den-lil2-e en dnin-jir2-su2-ce3 igi zid mu-ci-bar |
| 4. | (A1.4) iri-me-a nij2-du7 pa nam-e3 |
| 5. | (A1.5) cag4 gu2-bi nam-gi4 |
| 6. | (A1.6) cag4 den-lil2-la2 gu2-bi nam-gi4 |
| 7. | (A1.7) cag4 gu2-bi nam-gi4 |
| 8. | (A1.8) a-ji6 uru16 nam-mul ni2 il2-il2 |
| 9. | (A1.9) cag4 den-lil2-la2-ke4 id2idigna-am3 a dug3-ga nam-de6 |
| 10. | (A1.10) e2-e lugal-bi gu3 ba-de2 |
| 11. | (A1.11) e2-ninnu me-bi an ki-a pa e3 mu-ak-ke4 |
| 12. | (A1.12) ensi2 lu2 jectug3 dajal-kam jectug3 i3-ja2-ja2 |
| 13. | (A1.13) nij2 gal-gal-la cu mi-ni-mu2-mu2 |
| 14. | (A1.14) gud du7 /mac2\ du7-re6 |
| 15. | (A1.15) ceg12 nam tar-ra saj mu-ci-ib2-il2 |
| 16. | (A1.16) e2 kug du3-de3 gu2-bi mu-ci-ib2-zig3 |
| 17. | (A1.17) lugal-ni-ir ud ne mac-ji6-ka |
| 18. | (A1.18) gu3-de2-a en dnin-jir2-su2-ra igi mu-ni-du8-am3 |
| 19. | (A1.19) e2-a-ni du3-ba mu-na-dug4 |
| 20. | (A1.20) e2-ninnu me-bi gal-gal-la-am3 |
| 21. | (A1.21) igi mu-na-ni-jar |
| 22. | (A1.22) gu3-de2-a cag4-ga-ni su3-ra2-am3 |
| 23. | (A1.23) inim-e mi-ni-kuc2-u3 |
| 24. | (A1.24) ga-na ga-na-ab-dug4 ga-na ga-na-ab-dug4 |
| 25. | (A1.25) inim-ba ha-mu-da-gub |
| 26. | (A1.26) sipad-me nam-nun-ne2 saj ma-ab-cum2-cum2 |
| 27. | (A1.27) nij2 mac-ji6-ke4 ma-ab-de6-a-ja2 |
| 28. | (A1.28) cag4-bi nu-zu |
| 29. | (A1.29) ama-ju10 ma-mu-ju10 ga-na-de6 |
| 30. | (A2.1) ensi kug-zu me-te-na-ju10 |
| 31. | (A2.2) dnance nin9 dijir sirara6-ta-ju10 |
| 32. | (A2.3) cag4-bi ha-ma-pad3-de3 |
| 33. | (A2.4) ma2-gur8-ra-na jiri3 nam-mi-gub |
| 34. | (A2.5) iri-ni nijin6ki-ce3 id2-nijin6ki-du-a ma2 mu-ni-ri |
| 35. | (A2.6) id2-de3 hul2-la-e kur-ku4 i3-si-il-e |
| 36. | (A2.7) ba-gara2 e2 id2-de3 la2-a-e im-ti-a-ta |
| 37. | (A2.8) ninda jic bi2-tag a sed6 i3-de2 |
| 38. | (A2.9) lugal ba-gara2-ra mu-na-jen cudu3 mu-na-ca4 |
| 39. | (A2.10) ur-saj pirij zig3-ga gaba-cu-jar nu-tuku |
| 40. | (A2.11) dnin-jir2-su2 abzu-a /gal-di\ |
| 41. | (A2.12) nibruki-a nir-/jal2\ |
| 42. | (A2.13) ur-saj /ma\-a-dug4 cu zid ga-mu-ra-ab-jar |
| 43. | (A2.14) dnin-jir2-su e2-zu ga-mu-ra-du3 |
| 44. | (A2.15) me cu ga-mu-ra-ab-du7 |
| 45. | (A2.16) nin9-zu dumu eridugki-ge tud-da |
| 46. | (A2.17) nir-jal2 me-te-na nin ensi3 dijir-re-ne-ke4 |
| 47. | (A2.18) dnance nin9 dijir sirara6-ta-ju10 |
| 48. | (A2.19) jiri3-bi ha-ma-ja2-ja2 |
| 49. | (A2.20) gu3 de2-a-ni jic ba-tuku-am3 |
| 50. | (A2.21) lugal-a-ni sizkur2 ra2-zu-ni gu3-de2-a-ac2 |
| 51. | (A2.22) en dnin-jir2-su-ke4 cu ba-ci-ti |
| 52. | (A2.23) e2 ba-gara2!-ka ec3-ec3 i3-ak |
| 53. | (A2.24) ensi2-ke4 dja2-tum3-dug3-ce3 ki-nu2-a-ni ba-gub |
| 54. | (A2.25) ninda jic bi2-tag a sed6 i3-de2 |
| 55. | (A2.26) kug dja2-tum3-dug3-ra mu-na-jen |
| 56. | (A2.27) sizkur2 mu-na-be2 |
| 57. | (A2.28) nin-ju10 dumu an kug-ge tud-da |
| 58. | (A2.29) nir-jal2 me-te-na dijir saj zig3 |
| 59. | (A3.1) kalam-ma til3-la |
| 60. | (A3.2) nu-du-zu iri-na |
| 61. | (A3.3) nin ama lagacki ki jar-ra-me |
| 62. | (A3.4) igi uj3-ce3 u3-ci-bar-ra-zu ni2-a he2-jal2-la-am3 |
| 63. | (A3.5) cul zid lu2 igi mu-bar-ra-zu nam-til3 mu-na-sud |
| 64. | (A3.6) ama nu-tuku-me ama-ju10 ze2-me |
| 65. | (A3.7) a nu-tuku-me a-ju10 ze2-me |
| 66. | (A3.8) a-ju10 cag4-ga cu ba-ni-dug4 unu6-a i3-tud-e |
| 67. | (A3.9) dja2-tum3-dug3 mu kug-zu dug3-ga-am3 |
| 68. | (A3.10) ji6-a ma-ni-nu2 |
| 69. | (A3.11) jicjiri2 gal-ju10-me zag-ju10 mu-us2 |
| 70. | (A3.12) NE.GI.BAR a gal-la du3-a-me |
| 71. | (A3.13) zi cag4 mu-ci-ni-jal2 |
| 72. | (A3.14) an-dul3 dajal-me jissu-zu-ce3 |
| 73. | (A3.15) ni2 ga-ma-ci-ib2-te |
| 74. | (A3.16) /cu mah\-za sa-ga a2 zid-da-bi |
| 75. | (A3.17) nin-ju10 dja2-tum3-dug3 ja2-ra ha-mu-u3-ru |
| 76. | (A3.18) iri-ce3 i3-du-e jickim-ju10 he2-sag9 |
| 77. | (A3.19) kur a-ta il2-la nijin6ki-ce3 |
| 78. | (A3.20) u2(source: sukkal)-dug4 sag9-ga-zu igi-ce3 ha-ma-jen |
| 79. | (A3.21) dlamma sag9-ga-zu jiri3-a ha-mu-da-jen |
| 80. | (A3.22) ga-na ga-na-ab-dug4 |
| 81. | (A3.23) ga-na ga-na-ab-dug4 |
| 82. | (A3.24) inim-ba ha-mu-da-gub |
| 83. | (A3.25) ama-ju10 ma-mu-ju10 ga-na-de6 |
| 84. | (A3.26) ensi3 kug-zu me-te-na-ju10 |
| 85. | (A3.27) dnance nin9 dijir sirara6-ta-ju10 |
| 86. | (A3.28) cag4-bi ha-ma-pad3-de3 |
| 87. | (A3.29) gu3 de2-a-ni jic ba-tuku-am3 |
| 88. | (A4.1) nin-a-ni sizkur2 ra2-zu-ni |
| 89. | (A4.2) gu3-de2-a-ac2 kug dja2-tum3-dug3-ge cu ba-ci-ti |
| 90. | (A4.3) ma2-gur8-ra-na jiri3 nam-mi-gub |
| 91. | (A4.4) iri-ni nijin6ki-ce3 <ma2 mu-ni-ri> kar nijin6ki-na-ke4 ma2 bi2-us2 |
| 92. | (A4.5) ensi2-ke4 kisal dijir sirara6-ta-ka saj an-ce3 mi-ni-il2 |
| 93. | (A4.6) ninda jic bi2-tag a sed6 i3-de2 |
| 94. | (A4.7) dnance mu-na-jen cudu3 mu-na-ca4 |
| 95. | (A4.8) dnance nin uru16 nin me dkal-dkal-la |
| 96. | (A4.9) nin den-lil2-gin7 nam tar-tar-re |
| 97. | (A4.10) dnance-ju10 dug4-ga-zu zid-dam |
| 98. | (A4.11) saj-bi-ce3 e3-a-am3 |
| 99. | (A4.12) ensi dijir-re-ne-me |
| 100. | (A4.13) nin kur-kur-ra-me ama inim-ju10 ud-da ma-mu-da |
| 101. | (A4.14) cag4 ma-mu-da-ka lu2 1(DIC)-am3 an-gin7 ri-ba-ni |
| 102. | (A4.15) ki-gin7 ri-ba-ni |
| 103. | (A4.16) a-ne saj-ja2-ni-ce3 dijir-ra-am3 |
| 104. | (A4.17) a2-ni-ce3 anzud2mucen-dam |
| 105. | (A4.18) sig-ba-a(source: ni)-ni(source: a)-ce3 a-ma-ru-kam |
| 106. | (A4.19) zid-da gabu2-na pirij i3-nu2-nu2 |
| 107. | (A4.20) e2-a-ni du3-da ma-an-dug4 |
| 108. | (A4.21) cag4-ga-ni nu-mu-zu |
| 109. | (A4.22) ud ki-car2-ra ma-ta-e3 |
| 110. | (A4.23) munus 1(DIC)-am3 a-ba me-a nu a-ba me-a-ni |
| 111. | (A4.24) saj-ja2 e3 ki garadin9 mu-ak |
| 112. | (A4.25) gi-dub-ba kug NE-a cu im-mi-du8 |
| 113. | (A4.26) dub mul-an dug3-ga im-mi-jal2 |
| 114. | (A5.1) ad im-dab6-gi4-gi4 |
| 115. | (A5.2) 2(MAN)-kam ur-saj-ja2-am3 |
| 116. | (A5.3) a2 mu-gur le-um za-gin3 cu im-mi-du8 |
| 117. | (A5.4) e2-a jic-hur-bi im-ja2-ja2 |
| 118. | (A5.5) igi-ju10-ce3 dusu kug i3-gub |
| 119. | (A5.6) jicu3-cub kug / |
| 120. | (A5.7) ceg12 nam tar-ra jicu3-cub-ba ma-an-jal2 |
| 121. | (A5.8) ildag2 zid-da igi-ju10 gub-ba |
| 122. | (A5.9) ti-gid2mucen-lu2 a ud mi-ni-ib2-zal-zal-e |
| 123. | (A5.10) dur3 a2 zid-da lugal-ja2-ke4 ki ma-hur-hur-e |
| 124. | (A5.11) ensi2-ra ama-ni dnance mu-na-ni-ib2-gi4-gi4 |
| 125. | (A5.12) sipad-ju10 ma-mu-zu je26 ga-mu-ra-bur2-bur2 |
| 126. | (A5.13) lu2 an-gin7 ri-ba ki-gin7 ri-ba-ece2 |
| 127. | (A5.14) saj-ja2-<ni>-ce3 dijir a2-ni-ce3 |
| 128. | (A5.15) anzud2mucen-ece2 sig-ba-a-ni-ce3 a-ma-ru-ece2 |
| 129. | (A5.16) zid-da gabu2-na pirij i3-nu2-nu2(source: SA4-SA4)-a |
| 130. | (A5.17) cec-ju10 dnin-jir2-su2 ga-nam me-am3 |
| 131. | (A5.18) ec3 e2-ninnu-na du3-ba za-ra ma-ra-an-dug4 |
| 132. | (A5.19) ud ki-car2-ra ma-ra-ta-e3-a |
| 133. | (A5.20) dijir-zu dnin-jic-zid-da ud-gin7 ki-ca-ra ma-«ra-da»-ra-ta-e3 |
| 134. | (A5.21) ki-sikil saj-ja2 e3 ki garadin9 mu-ak |
| 135. | (A5.22) gi-dub-ba kug NE cu bi2-du8-a |
| 136. | (A5.23) dub mul dug3-ga bi2-jal2-la-a |
| 137. | (A5.24) ad im-da-gi4-a |
| 138. | (A5.25) nin9-ju10 dnisaba ga-nam me-am3 |
| 139. | (A6.1) e2-a du3-ba mul kug-ba |
| 140. | (A6.2) gu3 ma-ra-a-de2 |
| 141. | (A6.3) 2(MAN)-kam-ma ur-saj-am3 a2 mu-gur8 |
| 142. | (A6.4) le-um za-gin3 cu bi2-du8-a |
| 143. | (A6.5) dnin-dub-kam e2-a jic-hur-ba im-mi-sig10-sig10-ge |
| 144. | (A6.6) igi-zu-ce3 dusu kug gub-ba u3-cub kug |
| 145. | (A6.7) ceg12 nam tar-ra u3-cub-ba jal2-la |
| 146. | (A6.8) ceg12 zid e2-ninnu ga-nam me-am3 |
| 147. | (A6.9) ildag2 zid-da igi-zu gub-ba |
| 148. | (A6.10) ti-gid2mucen-lu2 a ud mi-ni-ib2-zal-a-ece2 |
| 149. | (A6.11) e2 du3-de3 igi-zu u3 dug3-ga nu-ci-ku4-ku4 |
| 150. | (A6.12) ancedur9 a2 zid-da lugal-zak-ke4 ki ma-ra-hur-hur-a-ece2 |
| 151. | (A6.13) ze2-me e2-ninnu-/uc2?\ ni-is-ku-gin7 ki im-ci-hur-e |
| 152. | (A6.14) na ga-de5 na de5-ju10 he2-dab5 |
| 153. | (A6.15) jir2-suki e2 saj ki lagacki-ce3 jiri3-zu ki i3-bi2-us2 |
| 154. | (A6.16) e2 nij2-gur11-<ra>-za kicib u3-mi-kur2 jic u3-ma-ta-jar |
| 155. | (A6.17) lugal-zu jicgigir u3-mu-DI |
| 156. | (A6.18) ancedur9ur3 u3-ci-la2 |
| 157. | (A6.19) jicgigir-bi kug NE za-gin3-na cu u3-ma-ni-tag |
| 158. | (A6.20) ti mar-uru5-a ud-gin7 i3-e3 |
| 159. | (A6.21) an-kar2 a2 nam-ur-saj-ka mi2 u3-ma-ni-dug4 |
| 160. | (A6.22) cu-nir ki aj2-ni u3-mu-na-dim2 |
| 161. | (A6.23) mu-zu u3-mi-sar |
| 162. | (A6.24) balaj ki aj2-ni ucumgal kalam-ma |
| 163. | (A6.25) jic-gu3-di mu tuku nij2 ad gi4-gi4-ni |
| 164. | (A6.26) ur-saj nij2-ba-e ki aj2-ra |
| 165. | (A7.1) lugal-zu en dnin-jir2-su2 |
| 166. | (A7.2) e2-ninnu anzud2mucen babbar2-ra u3-mu-na-da-kur9-re |
| 167. | (A7.3) tur dug4-ga-zu mah dug4-ga-am3 cu ba-a-ci-ib2-ti |
| 168. | (A7.4) en-na cag4 an-gin7 su3-ra2-ni |
| 169. | (A7.5) dnin-jir2-su2 dumu den-lil2-la2-ka za-ra ma-ra-huj-je26-e |
| 170. | (A7.6) jic-hur e2-a-na ma-ra-pad3-pad3-de3 |
| 171. | (A7.7) ur-saj-e me-ni gal-gal-la-am3 |
| 172. | (A7.8) cu ma-ra-ni-ib2-mu2-mu2 |
| 173. | (A7.9) sipad zid gu3-de2-a |
| 174. | (A7.10) gal mu-zu gal i3-ga-tum2-mu |
| 175. | (A7.11) inim dnance-e mu-na-dug4-ga-ac |
| 176. | (A7.12) saj sig ba-ci-jar |
| 177. | (A7.13) e2 nij2-gur11-ra-na kicib bi2-kur2 |
| 178. | (A7.14) jic im-ma-ta-jar |
| 179. | (A7.15) gu3-de2-a jic-a mu-DU.DU |
| 180. | (A7.16) jic-e mi2 im-e |
| 181. | (A7.17) jicmec3-e saj bi2-sag9 |
| 182. | (A7.18) jicha-lu-ub2-ba tun3 bi2-bar |
| 183. | (A7.19) jicgigir za-gin3-ce3 mu-na-a-DI |
| 184. | (A7.20) dur9ur3-bi pirij-kac4-e-pad3-da |
| 185. | (A7.21) im-ma-ci-la2-la2 |
| 186. | (A7.22) cu-nir ki aj2-ni mu-na-dim2 |
| 187. | (A7.23) mu-ni im-mi-sar |
| 188. | (A7.24) balaj ki aj2-e ucumgal kalam-ma |
| 189. | (A7.25) jic-gu3-di mu tuku nij2 ad gi4-gi4-ni |
| 190. | (A7.26) ur-saj nij2-ba-e ki aj2-ra |
| 191. | (A7.27) lugal-ni en dnin-jir2-su-ra |
| 192. | (A7.28) e2-ninnu anzud2mucen babbar2-ra |
| 193. | (A7.29) mu-na-da-ku4-ku4 |
| 194. | (A7.30) e2-a hul2-la i3-na-ni-kur9 |
| 195. | (A8.1) gu3-de2-a ec3 e2-ninnu-ta zalag-ga nam-ta-e3 |
| 196. | (A8.2) 2(MIN)-kam-ma e2-ce3 ud-u3-de3 bi2-dib |
| 197. | (A8.3) ji6-ji6 ba-an-dib |
| 198. | (A8.4) du6-du6 mu-si-ig inim-jar mu-gi4 |
| 199. | (A8.5) ah dug4-ga jiri2-ta im-ta-jar |
| 200. | (A8.6) cu-ga-lam ki huc ki |
| 201. | (A8.7) ki dnin-jir2-su-ke4 kur-kur-ra igi mi-ni-jal2-la-ce3 |
| 202. | (A8.8) udu-i3 gukkal mac2 niga ensi2-ke4 |
| 203. | (A8.9) fecgar jic nu-zu kuc-ba mi-ni-durunx(KU.KU) |
| 204. | (A8.10) lijic u2 sikil kur-ra-kam izi-a bi2-si-si |
| 205. | (A8.11) cim erin ir-sim dijir-ra-kam |
| 206. | (A8.12) i3-bi2-bi mu-du3 |
| 207. | (A8.13) lugal-<ni>-ir uj3-ja2 mu-na-zig3 cudu3 mu-na-ca4 |
| 208. | (A8.14) ub-cu-kin-na-ka mu-na-jen giri17 cu mu-na-jal2 |
| 209. | (A8.15) lugal-ju10 dnin-jir2-su2 en a huc gi4-a |
| 210. | (A8.16) en zid a kur gal-e ri-a |
| 211. | (A8.17) cul ka tar <gaba-ri> nu-tuku |
| 212. | (A8.18) dnin-jir2-su e2-zu ma-ra-du3-e |
| 213. | (A8.19) jickim-ju10 nu-ju10 |
| 214. | (A8.20) ur-saj nij2-du7-e gu3 ba-a-de2 |
| 215. | (A8.21) dumu den-lil2-la2 en dnin-jir2-su |
| 216. | (A8.22) cag4-bi nu-mu-u3-da-zu |
| 217. | (A8.23) cag4 ab-gin7 zi-zi-zu |
| 218. | (A8.24) iz-zi8-gin7 ja2-ja2-zu |
| 219. | (A8.25) a e3-a-gin7 gu3 nun di-zu |
| 220. | (A8.26) a-ma-ru12-gin7 u2-uru18 gul-gul-zu |
| 221. | (A8.27) ud-gin7 ki-bal-ce3 du7-du7-zu |
| 222. | (A9.1) lugal-ju10 cag4-zu a e3-a u2 nu-la2-zu |
| 223. | (A9.2) ur-saj cag4 an-gin7 su3-ra2-zu |
| 224. | (A9.3) dumu den-lil2-la2 en dnin-jir2-su |
| 225. | (A9.4) je26 a-na mu-u3-da-zu |
| 226. | (A9.5) 2(MIN)-kam-ma-ce3 nu2-a-ra nu2-a-ra |
| 227. | (A9.6) saj-ja2 mu-na-gub ul4 mu-tag-tag-e |
| 228. | (A9.7) ma-du3-na ma-du3-na |
| 229. | (A9.8) ensi2 e2-ju10 ma-du3-na |
| 230. | (A9.9) gu3-de2-a e2-ju10 du3-da jickim-bi ga-ra-ab-cum2 |
| 231. | (A9.10) jarza-ja2 mul-an kug-ba gu3 ga-mu-ra-a-de2 |
| 232. | (A9.11) e2-ju10 e2-ninnu an-ne2 ki jar-ra |
| 233. | (A9.12) me-bi me gal-gal me-me-a dirig-ga |
| 234. | (A9.13) e2 lugal-bi igi sud il2-il2 |
| 235. | (A9.14) anzud2mucen-gin7 ceg12 gi4-a-bi-ce3 |
| 236. | (A9.15) an im-ci-dub2-dub2 |
| 237. | (A9.16) me-lem4 huc-bi an-ne2 im-us2 |
| 238. | (A9.17) e2-ja2 ni2 gal-bi kur-kur-ra mu-ri |
| 239. | (A9.18) mu-bi-e an-zag-ta kur-kur-re gu2 im-ma-si-si |
| 240. | (A9.19) ma2-gan me-luh-ha kur-bi-ta im-ma-ta-ed3-de3 |
| 241. | (A9.20) je26 dnin-jir2-su a huc gi4-a |
| 242. | (A9.21) ur-saj gal ki den-lil2-la2-ka |
| 243. | (A9.22) en gaba-ri nu-tuku |
| 244. | (A9.23) e2-ju10 e2-ninnu je26-en kur-ra ab-dirig |
| 245. | (A9.24) tukul-ju10 car2-ur3 kur cu-ce3 jar-jar |
| 246. | (A9.25) igi huc-a-ju10 kur-re nu-um-il2 |
| 247. | (A9.26) a2(source: DA) bad-a-ju10 lu2 la-ba-ta-e3 |
| 248. | (A10.1) a ugu4-ju10 nam gal ki aj2-da |
| 249. | (A10.2) lugal a-ma-ru den-lil2-la2 |
| 250. | (A10.3) igi huc-a-ni kur-da nu-il2 |
| 251. | (A10.4) dnin-jir2-su ur-saj den-lil2-la2 |
| 252. | (A10.5) mu-ce3 mu-sa4 |
| 253. | (A10.6) me 50-a zag mi-ni-kece2 |
| 254. | (A10.7) jicbancur mu-il2 |
| 255. | (A10.8) cu-luh |
| 256. | (A10.9) cu |
| 257. | (A10.10) nij2 cu-ja2 dug3-ga-am3 |
| 258. | (A10.11) a ugu4-ju10 dug3-ga-bi mu-gu7 |
| 259. | (A10.12) an lugal dijir-re-ne-ke4 |
| 260. | (A10.13) dnin-jir2-su lugal icib an-na |
| 261. | (A10.14) mu-ce3 mu-sa4 |
| 262. | (A10.15) ti-ra-ac2 abzu-gin7 |
| 263. | (A10.16) nam-nun-na ki im-ma-ni-jar |
| 264. | (A10.17) cag4-bi-a /itid\-da ud-sakar-ra |
| 265. | (A10.18) me gal-gal ezen an-na-ju10 cu gal ma-du7-du7 |
| 266. | (A10.19) e2-huc ki huc-ju10 |
| 267. | (A10.20) muc-huc-gin7 ki sumur-ra bi2-du3 |
| 268. | (A10.21) ki-bal-ja2 nu-mi-ib2-dug4-ga |
| 269. | (A10.22) ud cag4-ju10 um-ci-mi-ri2-a |
| 270. | (A10.23) muc ze2 guru5-a-gin7 uc ma-a-u3-ku-e |
| 271. | (A10.24) e2-babbar2 ki a2 aj2-ja2-ja2 |
| 272. | (A10.25) ki dutu-gin7 dalla-a-ja2 |
| 273. | (A10.26) ki-ba dictaran-gin7 di iri-ja2 |
| 274. | (A10.27) e2-ba-gara2 ki bancur-ra-ju10 |
| 275. | (A10.28) dijir gal-gal lagacki-a-ke4-ne |
| 276. | (A10.29) gu2 ma-si-si-ne |
| 277. | (A11.1) e2-ju10 e2 saj-kal kur-kur-ra |
| 278. | (A11.2) a2 zid-da lagacki |
| 279. | (A11.3) anzud2mucen an-car2-ra ceg12 gi4-gi4 |
| 280. | (A11.4) e2-ninnu e2 nam-lugal-ju10 |
| 281. | (A11.5) sipad zid gu3-de2-a |
| 282. | (A11.6) ud cu zid ma-ci-tum3-da |
| 283. | (A11.7) an-ce3 tum9 duru5-e gu3 ba-de2 |
| 284. | (A11.8) an-ta he2-jal2 ha-mu-ra-ta-du |
| 285. | (A11.9) kalam-e he2-jal2-la cu he2-a-da-pec-e |
| 286. | (A11.10) e2-ja2 uc ki jar-ra-bi-da |
| 287. | (A11.11) he2-jal2 he2-da-jen |
| 288. | (A11.12) gana2 gal-gal-e cu ma-ra-ab-il2-e |
| 289. | (A11.13) eg2 pa5 gu2-bi ma-ra-ab-zi-zi |
| 290. | (A11.14) du6-du6 ki a nu-ed3-da |
| 291. | (A11.15) a ma-ra-ed3-de3 |
| 292. | (A11.16) ki-en-gi-ra2 i3 dirig mu-da-de2 |
| 293. | (A11.17) siki dirig mu-da-la2 |
| 294. | (A11.18) ud temen-ju10 ma-sig9-ge4-na |
| 295. | (A11.19) e2-ju10 ud cu zid ma-ci-tum3-da |
| 296. | (A11.20) hur-saj ki tum9mir tuc-a-ce3 |
| 297. | (A11.21) jiri3-ju10 ki i3-bi2-us2 |
| 298. | (A11.22) nitah a2 dirig-ke4 tum9mir-e hur-saj ki sikil-ta |
| 299. | (A11.23) tum9 |
| 300. | (A11.24) kalam-e zi-cag4-jal2 u3-ma-cum2 |
| 301. | (A11.25) lu2 dili lu2 2(MIN)-da kij2 mu-da-ak-ke4 |
| 302. | (A11.26) ji6-a-na i3-ti ma-ra-e3-e3 |
| 303. | (A11.27) e-bar7-gana2 ud-«ma»-dam ma-ra-e3-e3 |
| 304. | (A12.1) e2 ud-de3 ma-ra-du3-e |
| 305. | (A12.2) ji6-e ma-ra-ab-mu2-mu2 |
| 306. | (A12.3) sig-ta jicha-lu-ub2 |
| 307. | (A12.4) jicNE-ha-an! mu-ra-ta-ed3-de3 |
| 308. | (A12.5) igi-nim-ta jicerin jiccu-ur2-men2 jicza-ba-lum ni2-bi-a ma-ra-an-tum3 |
| 309. | (A12.6) kur jicesi-a-ka |
| 310. | (A12.7) jicesi ma-ra-ni-tum3 |
| 311. | (A12.8) kur na-ka na gal hur-saj-ja2 |
| 312. | (A12.9) lagab-ba ma-ra-kud-e |
| 313. | (A12.10) ud-bi-a a2-zu izi bi2-tag |
| 314. | (A12.11) jickim-ju10 ha-mu-u3-zu |
| 315. | (A12.12) gu3-de2-a i3-zig3 u3-sa-ga-am3 |
| 316. | (A12.13) i3-ha-luh ma-mu-dam |
| 317. | (A12.14) inim dug4-ga dnin-jir2-su-ka-ce3 |
| 318. | (A12.15) saj sig ba-ci-jar |
| 319. | (A12.16) mac2 babbar2-ra cu mu-gid2-de3 |
| 320. | (A12.17) mac2-a cu i3-gid2 mac2-a-ni i3-sag9 |
| 321. | (A12.18) gu3-de2-a cag4 dnin-jir2-su-ka |
| 322. | (A12.19) ud-dam mu-na-e3 |
| 323. | (A12.20) gal mu-zu gal i3-ga-tum2-mu |
| 324. | (A12.21) ensi2-ke4 iri-na lu2 dili-gin7 |
| 325. | (A12.22) na de5 ba-ni-jar |
| 326. | (A12.23) ki lagacki-e dumu ama dili-a-gin7 cag4 mu-na-AC-e |
| 327. | (A12.24) jic-cu mu-du8 jic-jiri2 mu-zig3 |
| 328. | (A12.25) u2-guru5 mu-jar inim dug4-ga bi2-gi4 |
| 329. | (A12.26) cer7-da e2-ba im-ma-an-gi4 |
| 330. | (A13.1) u3-sa-an bar-us2-sa eme i3-du8 |
| 331. | (A13.2) siki udu gan-na-kam cu-a mi-ni-jar-jar |
| 332. | (A13.3) ama-a dumu-da gu3 nu-ma-da-de2 |
| 333. | (A13.4) dumu-u3 ama-ni-ra ka du3-a |
| 334. | (A13.5) nu-ma-na-dug4 |
| 335. | (A13.6) arad2 a2 jic tag tuku-ra |
| 336. | (A13.7) lugal-a-ni saj nu-ma-da-dub2 |
| 337. | (A13.8) geme2 lu2 nam-ra2 hul mu-na-ak |
| 338. | (A13.9) nin-a-ni igi-na nij2 nu-mu-na-ni-ra |
| 339. | (A13.10) ensi2 e2-ninnu du3-ra |
| 340. | (A13.11) gu3-de2-a-ar inim-jar-bi lu2-u3 nu-ma-ni-jar |
| 341. | (A13.12) ensi2-ke4 iri mu-kug |
| 342. | (A13.13) izi im-ma-ta-la2 |
| 343. | (A13.14) uzug3-ga ni2-jal2 lu2-GI.AN |
| 344. | (A13.15) iri-ta ba-ta-e3 |
| 345. | (A13.16) pisaj u3-cub-ba-ce3 mac2 ba-ci-nu2 |
| 346. | (A13.17) ceg12 mac2-e bi2-pad3 |
| 347. | (A13.18) ka-al-bi-ce3 igi zid ba-ci-bar |
| 348. | (A13.19) sipad mu pad3-da dnance-ke4 nam-nun-na i3-jar |
| 349. | (A13.20) pisaj u3-cub-ba-<ka> jic bi2-hur-ra-ni |
| 350. | (A13.21) ka-al nam-nun-na mu-ni-jar-ra-ni |
| 351. | (A13.22) anzud2mucen cu-nir lugal-la-na-kam |
| 352. | (A13.23) urin-ce3 bi2-mul |
| 353. | (A13.24) u5 bur3 ece3-ce3 iri mu-na-kug-ge |
| 354. | (A13.25) u5 mu-na-sikil-e |
| 355. | (A13.26) lijic u2 sikil kur-ra-kam izi-a bi2-si-si |
| 356. | (A13.27) cim erin ir-sim dijir-ra-kam i3-bi2-bi mu-du3 |
| 357. | (A13.28) ud sizkur2-ra mu-na-a-jal2 |
| 358. | (A13.29) ji6 cudu3-de3 mu-na-zal-e |
| 359. | (A14.1) da-[nun-na] ki lagacki |
| 360. | (A14.2) e2 dnin-jir2-su-ka du3-de3 |
| 361. | (A14.3) gu3-de2-a sizkur2 ra2-/zu\-[(X)] |
| 362. | (A14.4) mu-da-an-cu4-cu4-ge-ec2 |
| 363. | (A14.5) sipad zid gu3-de2-a hul2-la-gin7 |
| 364. | (A14.6) im-ma-na-ni-ib2-jar |
| 365. | (A14.7) ud-ba ensi2-ke4 kalam-ma-na zig3-ga ba-ni-jar |
| 366. | (A14.8) ma-da gu2-saj car2-car2-ra-na |
| 367. | (A14.9) gu2-edin-na dnin-jir2-su-ka-ka |
| 368. | (A14.10) zig3-ga ba-ni-jar |
| 369. | (A14.11) iri du3-a a2-dam jar-ra-na |
| 370. | (A14.12) gu2-jic-bar-ra dnance-ka |
| 371. | (A14.13) zig3-ga ba-ni-jar |
| 372. | (A14.14) gud huc zig3-ga gaba gi4 nu-tuku |
| 373. | (A14.15) jicerin babbar2-ra lugal-bi-ir dab6-ba |
| 374. | (A14.16) im-ru-a dnin-jir2-su-ka-ka |
| 375. | (A14.17) zig3-ga mu-na-jal2 |
| 376. | (A14.18) cu-nir mah-bi lugal-kur-dub2 saj-bi-a mu-gub |
| 377. | (A14.19) pec10-jal2 gaba-jal2 a-ta e3-a |
| 378. | (A14.20) id2 mah a dirig he2-jal2-bi barag2-barag2 |
| 379. | (A14.21) im-ru-a dnance-ka |
| 380. | (A14.22) zig3-ga mu-na-jal2 |
| 381. | (A14.23) u5 kug cu-nir dnance-kam saj-bi-a mu-gub |
| 382. | (A14.24) gu mac2-ance edin-na la2-a |
| 383. | (A14.25) ni-is-ku erin2 mu tuku erin2 dutu ki aj2 |
| 384. | (A14.26) im-ru-a dinana-ka zig3-ga mu-na-jal2 |
| 385. | (A14.27) ac-me cu-nir dinana-kam saj-bi-a mu-gub |
| 386. | (A14.28) e2 dnin-jir2-su-ka du3-de3 |
| 3 lines missing | |
| 390. | (A15.4) [...] TE [...] |
| 391. | (A15.5) cu /NI\ [...] /UC\ [...] jar |
| 392. | (A15.6) elam elam-ta mu-na-jen |
| 393. | (A15.7) cucin ki cucin-ta mu-na-jen |
| 394. | (A15.8) ma2-gan me-luh-ha kur-bi-ta gu2 jic mu-na-ab-jal2 |
| 395. | (A15.9) e2 dnin-jir2-su-ka du3-de3 |
| 396. | (A15.10) gu3-de2-a iri-ni jir2-suki-ce3 gu2 mu-na-si-si |
| 397. | (A15.11) dnin-zag-ga-da a2 mu-da-aj2 |
| 398. | (A15.12) urud-da-ni ce mah de6-a-gin7 |
| 399. | (A15.13) gu3-de2-a lu2 e2 du3-a-ra |
| 400. | (A15.14) mu-na-ab-us2-e |
| 401. | (A15.15) dnin-sikil-a-da a2 mu-da-aj2 |
| 402. | (A15.16) jicha-lu-ub2 gal-gal jicesi jic-ab-ba-bi |
| 403. | (A15.17) ensi2 e2-ninnu du3-ra |
| 404. | (A15.18) mu-na-ab-us2-e |
| 405. | (A15.19) kur jicerin-na lu2 nu-ku4-ku4-da |
| 406. | (A15.20) gu3-de2-a en dnin-jir2-su-ke4 |
| 407. | (A15.21) jiri2 mu-na-ni-jar |
| 408. | (A15.22) jicerin-bi tun3 gal-e im-mi-kud |
| 409. | (A15.23) car2-ur3 a2 zid-da lagacki-a |
| 410. | (A15.24) tukul a-ma-ru lugal-la-na-ce3 |
| 411. | (A15.25) tun3 im-ma-bar |
| 412. | (A15.26) muc-mah-am3 a-e im-dirig-ga-am3 |
| 413. | (A15.27) hur-saj jicerin-<na-ta> ad jicerin-na |
| 414. | (A15.28) hur-saj jiccu-ur2-men2-ta |
| 415. | (A15.29) ad jiccu-ur2-men2 |
| 416. | (A15.30) hur-saj jicza-ba-lum-ma-ta |
| 417. | (A15.31) ad jicza-ba-lum |
| 418. | (A15.32) jicu3-<suh5> gal-gal jictu-lu-bu-um |
| 419. | (A15.33) jice-ra-num2 |
| 420. | (A15.34) ad gal-gal-bi dirig-dirig-ga-bi |
| 421. | (A15.35) kar mah kan4-sur-ra-ke4 |
| 422. | (A16.1) [gu3-de2-a en dnin-jir2-su-ra] |
| 423. | (A16.2) [im-ma-na-us2] |
| 424. | (A16.3) [kur na lu2 nu-ku4-ku4-da] |
| 425. | (A16.4) [gu3-de2-a] en [dnin-jir2]-su-[ke4] |
| 426. | (A16.5) jiri2 mu-[na-ni-jar] |
| 427. | (A16.6) na gal-gal-bi lagab-ba mi-ni-de6 |
| 428. | (A16.7) ma2 ha-u3-na ma2 na-lu-a |
| 429. | (A16.8) esir2 a-ba-al esir2 igi-esir2 im-babbar2-ra |
| 430. | (A16.9) hur-saj ma2-ad-ga-ta |
| 431. | (A16.10) nij2-gur11 ma2 ce gana2 de6-a-gin7 |
| 432. | (A16.11) gu3-de2-a en dnin-jir2-su-ra |
| 433. | (A16.12) im-ma-na-us2 |
| 434. | (A16.13) ensi2 e2-ninnu du3-ra |
| 435. | (A16.14) nij2 gal-gal-e cu mu-na-ab-il2 |
| 436. | (A16.15) hur-saj urud-ke4 ki-mac-ta |
| 437. | (A16.16) ni2-bi mu-na-ab-pad3 |
| 438. | (A16.17) urud-bi gi-dirig-ba mu-ni-ba-al |
| 439. | (A16.18) lu2 e2 lugal-na du3-dam |
| 440. | (A16.19) ensi2-ra kug-sig17 kur-bi-ta |
| 441. | (A16.20) sahar-ba mu-na-tum3 |
| 442. | (A16.21) gu3-de2-a kug NE-a kur-bi-ta mu-na-ta-ed3-de3 |
| 443. | (A16.22) gug gi-rin-e me-luh-ha-ta |
| 444. | (A16.23) cu mu-na-pec-e |
| 445. | (A16.24) kur nu11-ta nu11 mu-na-ta-ed3-de3 |
| 446. | (A16.25) sipad-de3 e2 kug-ga mu-du3-e |
| 447. | (A16.26) kug-dim2 im-da-tuc |
| 448. | (A16.27) e2-ninnu za mu-du3-e zadim im-da-tuc |
| 449. | (A16.28) urud nagga-a mu-du3-e |
| 450. | (A16.29) sajja-simug dnin-tur5 kalam-ma-ke4 |
| 451. | (A16.30) igi-ni-ce3 |
| 452. | (A16.31) na4cu-min-e ud-da-am3 ceg12 mu-na-ab-gi4 |
| 453. | (A16.32) na4esi na4 cu-ke4 |
| 454. | (A17.1) [...] 2(MIN) [...] pec |
| 455. | (A17.2) [...] X TI [X] X NAM [X] /a\ mah [X] /DU\-a-gin7 |
| 456. | (A17.3) [...] /MU\ [...] X |
| 1 line missing | |
| 458. | (A17.5) /UD\ [...] MU [...] |
| 459. | (A17.6) ji25-/ji25\ mu-na-gid2 |
| 460. | (A17.7) nam e2 du3-da lugal-la-na-ce3 |
| 461. | (A17.8) u3 ji6 an-na nu-um-ku4-ku4 |
| 462. | (A17.9) u3 an-ba-ra saj nu-mi-ib2-du3-e |
| 463. | (A17.10) igi zid bar-ra dnance-kam |
| 464. | (A17.11) den-lil2-la2 lu2 cag4-ga-na-kam |
| 465. | (A17.12) ensi2 [X] X X [(X)] dnin-jir2-su-ka-kam |
| 466. | (A17.13) gu3-de2-a unu6 mah-a tud-da |
| 467. | (A17.14) dja2-tum3-dug3-ga-kam |
| 468. | (A17.15) dnisaba-ke4 e2 jectug2-ke4 |
| 469. | (A17.16) jal2 mu-na-taka4 |
| 470. | (A17.17) e2-a den-ki-ke4 jic-hur-bi |
| 471. | (A17.18) e2 me-lem4-bi an-ne2 us2-sa |
| 472. | (A17.19) me-bi an ki-da gu2 la2-a |
| 473. | (A17.20) lugal-bi en igi huc il2-il2 |
| 474. | (A17.21) ur-saj dnin-jir2-su me3 gal-zu-bi |
| 475. | (A17.22) e2-ninnu anzud2mucen babbar2-ce3 |
| 476. | (A17.23) gu3-de2-a sig-ta ba-ci-jen |
| 477. | (A17.24) nim-ce3 u5 bi2-dug4 |
| 478. | (A17.25) nim-ta ba-ci-jen sig-ce3 u5 bi2-dug4 |
| 479. | (A17.26) iku zid-dam ec2 i3-jar-jar |
| 480. | (A17.27) a2-ba jic bi2-jar ni2-te-ni mu-zu |
| 481. | (A17.28) hul2-la-gin7 im-ma-na-ni-ib2-jar |
| 482. | (A17.29) u3-te-am3 e2 libir-ra-ac2 ra2-zu-a ba-jen |
| 483. | (A18.1) gu3-de2-a barag jir2-nun-na-ta |
| 484. | (A18.2) cag4 mu-na-huj-je26-e |
| 485. | (A18.3) ud im-zal a mu-tu17 |
| 486. | (A18.4) me-te-ni mu-gi |
| 487. | (A18.5) dutu he2-jal2 mu-na-ta-e3 |
| 488. | (A18.6) gu3-de2-a [2(MIN)]-kam-ac2 iri-kug-[ta] im-ma-[ta]-/e3\ |
| 489. | (A18.7) gud du7 mac2 du7-re6 jic bi2-tag |
| 490. | (A18.8) e2-e im-ma-jen |
| 491. | (A18.9) giri17 cu im-ma-jal2 |
| 492. | (A18.10) dusu kug jicu3-cub zid nam tar-ra |
| 493. | (A18.11) e2-/ninnu\ /mu\-[...] |
| 494. | (A18.12) X [...] mu-la2 saj il2 mu-jen |
| 495. | (A18.13) dlugal-kur-dub2 igi-ce3 mu-na-jen |
| 496. | (A18.14) dig-alim-ke4 jiri2 mu-na-ja2-ja2 |
| 497. | (A18.15) dnin-jic-zid-da dijir-ra-ni |
| 498. | (A18.16) cu mu-da-jal2-jal2 |
| 499. | (A18.17) pisaj u3-cub-ka a sa-ga i3-ak |
| 500. | (A18.18) ensi2-ra a-dab6 si-im a2-la2 mu-na-du12-am3 |
| 501. | (A18.19) ka-al ceg12-bi saj im-mi-du8 |
| 502. | (A18.20) lal3 i3-nun i3-he-nun-na al im-ma-ni-tag |
| 503. | (A18.21) cembulugx(CIMxUH3) CIMxPI jic hi-a |
| 504. | (A18.22) ah-ce3 im-mi-ak |
| 505. | (A18.23) dusu kug mu-il2 u3-cub-e im-ma-gub |
| 506. | (A18.24) gu3-de2-a im u3-cub-ba i3-jar |
| 507. | (A18.25) nij2-du7 pa bi2-e3 |
| 508. | (A18.26) e2-a ceg12-bi pa e3 mu-ni-ja2-ja2 |
| 509. | (A18.27) kur-kur-re i3 mu-da-sud-e |
| 510. | (A18.28) erin mu-da-sud-e |
| 511. | (A19.1) iri-ni ki lagacki-e si11-le2-a |
| 512. | (A19.2) ud mu-di3-ni-ib2-zal-e |
| 513. | (A19.3) u3-cub mu-dub2 ceg12 had2-de3 ba-cub |
| 514. | (A19.4) ka-al im aga3-ri2-na-ba-ce3 |
| 515. | (A19.5) igi zid ba-ci-bar |
| 516. | (A19.6) CIMxPI ha-cu-ur2 cembulugx(CIMxUH3)-a |
| 517. | (A19.7) saj im-<ma>-ni-du8 |
| 518. | (A19.8) ceg12 u3-cub-ba mi-ni-jar-ra-ni |
| 519. | (A19.9) dutu im-da-hul2 |
| 520. | (A19.10) aga3-ri2 id2 mah-gin7 zig3-ga-na |
| 521. | (A19.11) lugal den-/ki\ /nam?\ mu-[X]-/tar\ |
| 522. | (A19.12) [X] mu-/jar u3-cub-ba?\ e2-a i3-kur9 |
| 523. | (A19.13) pisaj u3-cub-ba-ta ceg12 ba-ta-il2 |
| 524. | (A19.14) men kug an-ne2 il2-la |
| 525. | (A19.15) ceg12 mu-il2 uj3-ja2-na mu-jen |
| 526. | (A19.16) erin2 kug dutu saj bal-e-dam |
| 527. | (A19.17) ceg12-e e2-ce3 saj il2-la-bi |
| 528. | (A19.18) ab2 dnanna tur3-ba erin2-erin2-dam |
| 529. | (A19.19) ceg12 mu-jar e2-a mu-kux(DU)-kux(DU) |
| 530. | (A19.20) e2-a jic-hur-bi im-ja2-ja2 |
| 531. | (A19.21) dnisaba cag4 cid zu-am3 |
| 532. | (A19.22) lu2-tur gibil-bi e2 du3-gin7 |
| 533. | (A19.23) igi-ni u3 dug3-ga nu-ci-ku4-ku4 |
| 534. | (A19.24) ab2 amar-bi-ce3 igi jal2-la-gin7 |
| 535. | (A19.25) e2-ce3 te-te-ma im-ci-jen |
| 536. | (A19.26) lu2 ninda tur ka-a gub-ba-gin7 |
| 537. | (A19.27) du-du-e nu-ci-kuc2-u3 |
| 538. | (A19.28) cag4 lugal-na ud-dam mu-<na>-e3 |
| 539. | (A20.1) gu3-de2-a-ar inim dnin-jir2-su-ka urin-am3 mu-du3 |
| 540. | (A20.2) cag4 gu3 di e2 du3-da-ka-na |
| 541. | (A20.3) inim-jar sag9-ga-a lu2 ma-a-jar |
| 542. | (A20.4) hul2-la-gin7 im-ma-na-ni-ib2-jar |
| 543. | (A20.5) mac-a cu i3-gid2 mac-a-ni i3-sag9 |
| 544. | (A20.6) a-MIR-e ce ba-cum2 igi-bi |
| 545. | (A20.7) gu3-de2-a saj-ce3 nu2 |
| 546. | (A20.8) mu-nu2 inim mu-na-ta-e3 |
| 547. | (A20.9) e2 lugal-na-ka du3-bi |
| 548. | (A20.10) e2-ninnu an ki-ta bad-bi |
| 549. | (A20.11) /igi\-a mu-na-a-jal2 |
| 550. | (A20.12) hul2-la-gin7 im-[ma-na]-/ni-ib2-jar\ |
| 551. | (A20.13) gu mu-ba-ra me cu im-du7-du7 |
| 552. | (A20.14) uz-ga kug-ge ec3 mu-ja2-ja2 |
| 553. | (A20.15) e2-a den-ki-ke4 temen mu-sig9-ge |
| 554. | (A20.16) dnance dumu eridugki-ke4 ec-bar kij2-je26 mi2 ba-ni-dug4 |
| 555. | (A20.17) ama lagacki kug dja2-tum3-dug3-ke4 |
| 556. | (A20.18) ceg12-bi kur-ku4-a mu-ni-tud |
| 557. | (A20.19) dba-u2 nin dumu-saj an-na-ke4 |
| 558. | (A20.20) i3 cim erin-na ba-ni-sud |
| 559. | (A20.21) e2-e en ba-gub la-gal ba-gub |
| 560. | (A20.22) me-e cu |
| 561. | (A20.23) da-nun-na u3 di-de3 im-ma-cu4-cu4-ge-ec2 |
| 562. | (A20.24) gu3-de2-a lu2 e2 du3-a-ke4 |
| 563. | (A20.25) e2-a dusu-bi men kug saj-ja2 mu-ni-jal2 |
| 564. | (A20.26) uc mu-jar a2-jar ki im-mi-tag |
| 565. | (A20.27) sa2 mu-sig10 ceg12-ga gu bi2-dub2 |
| 566. | (A21.1) e2-a sa2 2-nam nam-mi-sig10 |
| 567. | (A21.2) gu dugba saj jal2-la-am3 |
| 568. | (A21.3) e2-a sa2 3-am3 nam-mi-sig10 |
| 569. | (A21.4) anzud2mucen amar-a a2 pag-am3 |
| 570. | (A21.5) e2-a sa2 4 nam(source: RI)-mi-sig10 |
| 571. | (A21.6) nemurx(PIRIJ.TUR) pirij huc-a gu2-da la2-am3 |
| 572. | (A21.7) e2-a sa2 5-am3 nam-mi-sig10 |
| 573. | (A21.8) an nisig su-lim il2-la-am3 |
| 574. | (A21.9) e2-a sa2 6-am3 nam-mi-sig10 |
| 575. | (A21.10) ud sa2-dug4-ga hi-li guru3-am3 |
| 576. | (A21.11) e2-a sa2 7 nam-mi-sig10 |
| 577. | (A21.12) e2-ninnu i3-ti ud zal-la kalam si-am3 |
| 578. | (A21.13) jic-kan4-na im-ja2-ja2-ne |
| 579. | (A21.14) an nisig-ga men il2-la-am3 |
| 580. | (A21.15) jic-kan4-na-ta ba-ta-tuc |
| 581. | (A21.16) e2 mah an-da gu2 la2-am3 |
| 582. | (A21.17) e2 mu-du3 jic-e im-ma-cub |
| 583. | (A21.18) ambar dnanna saj kece2 den-ki-ka-kam |
| 584. | (A21.19) e2 hur-saj-gin7 im-mu2-mu2-ne |
| 585. | (A21.20) dugud-gin7 an-cag4-ge im-mi-ni-ib2-dirig-dirig-ne |
| 586. | (A21.21) gud-gin7 si im-mi-ib2-il2-il2-ne |
| 587. | (A21.22) jic-gana2 abzu-gin7 kur-kur-ra saj ba-ni-ib2-il2-ne |
| 588. | (A21.23) e2-e hur-saj-gin7 an ki-a saj an-ce3 mi-ni-ib2-il2 |
| 589. | (A21.24) erin duru5 ki u2 rib mu2-a-am3 |
| 590. | (A21.25) e2-ninnu ceg12 ki-en-gi-ra2-ka hi-li mu-ni-ib2-du8-du8 |
| 591. | (A21.26) e2-a jic im-ja2-ja2-ne |
| 592. | (A21.27) ucum abzu tec2-ba ed2-de3-dam |
| 593. | (A21.28) KA an-na im-mi-ib2-u3-u3-dam |
| 594. | (A22.1) muc-mah hur-saj-ja2 nam ak-am3 |
| 595. | (A22.2) e2 gi guru5-bi muc kur-ra tec2-ba nu2-am3 |
| 596. | (A22.3) sa-tu-/bi\ erin duru5 ha-/cu\-ur2-ra cu he2-tag-ga-am3 |
| 597. | (A22.4) aga3 erin igi u6 di-bi-a erin babbar2 im-ja2-ja2-ne |
| 598. | (A22.5) cim zid i3-he-nun-ka mi2 ba-ni-ib2-e-ne |
| 599. | (A22.6) e2 im-du8-a-bi he-nun abzu cu tag-ga-am3 |
| 600. | (A22.7) A.JAR.KA-bi im-ci-ib2-suru5-ne |
| 601. | (A22.8) ec3 e2-ninnu cu E2xBAD? an-na-ka jar-jar-a-am3 |
| 602. | (A22.9) ensi2-ke4 e2 mu-du3 mu-mu2 |
| 603. | (A22.10) kur gal-gin7 mu-mu2 |
| 604. | (A22.11) temen abzu-bi dim gal-gal ki-a mi-ni-sig9-sig9 |
| 605. | (A22.12) den-ki-da e2-an-gur4-ra-ka |
| 606. | (A22.13) cag4 mu-di3-ni-ib2-kuc2-u3 |
| 607. | (A22.14) temen an-na ur-saj-am3 e2-e im-mi-dab6 |
| 608. | (A22.15) ki-a-naj dijir-re-<ne>-ka a im-na8-na8-a |
| 609. | (A22.16) e2-ninnu dim gal mu-gen6 |
| 610. | (A22.17) abgal2-bi mu-du3 |
| 611. | (A22.18) iri-na jicasal2 dug3-bi mu-du3 |
| 612. | (A22.19) jissu-bi mu-la2 |
| 613. | (A22.20) jiccar2-ur3-bi urin gal-gin7 lagacki-da im-da-sig9 |
| 614. | (A22.21) cu-ga-lam ki huc-ba im-mi-ni-jar |
| 615. | (A22.22) su zig3 bi2-du8-du8 barag jir2-nun-na ki |
| 616. | (A22.23) u2-a lagacki gud gal-gin7 a2 ba-il2-il2 |
| 617. | (A22.24) na gal-gal lagab-ba mi-ni-de6-a |
| 618. | (A23.1) mu 1-a mu-de6 mu 1-a mu-ak |
| 619. | (A23.2) ud 2 ud 3 nu-ma-da-ab-zal |
| 620. | (A23.3) a2 ud-da 1-ta mu-du3 |
| 621. | (A23.4) ud 7-kam-ma-ka e2-e im-mi-dab6 |
| 622. | (A23.5) na da-bi kun-ce3 mu-nu2 |
| 623. | (A23.6) /cim\-ce3 mu-dim2-dim2 |
| 624. | (A23.7) e2-a mi-ni-cu4-cu4 |
| 625. | (A23.8) na kisal mah-a <im>-mi-du3-a-na |
| 626. | (A23.9) na-du3-a lugal kisal si |
| 627. | (A23.10) gu3-de2-a en dnin-jir2-su-ke4 |
| 628. | (A23.11) jir2-nun-ta mu-zu |
| 629. | (A23.12) na-ba mu-ce3 im-ma-sa4 |
| 630. | (A23.13) na kan4-sur-ra bi2-du3-a |
| 631. | (A23.14) lugal a-ma-ru den-lil2-la2 |
| 632. | (A23.15) gaba-cu-jar nu-tuku |
| 633. | (A23.16) gu3-de2-a en dnin-jir2-su-ke4 |
| 634. | (A23.17) igi zid mu-ci-bar |
| 635. | (A23.18) na-ba mu-ce3 im-ma-sa4 |
| 636. | (A23.19) na igi ud e3-a-<ka> bi2-du3-a |
| 637. | (A23.20) lugal ud gu3 di den-lil2-la2 |
| 638. | (A23.21) en gaba-ri nu-tuku |
| 639. | (A23.22) gu3-de2-a en dnin-jir2-su-ke4 |
| 640. | (A23.23) cag4 kug-ge bi2-pad3 |
| 641. | (A23.24) na-ba mu-ce3 im-ma-sa4 |
| 642. | (A23.25) na igi cu-ga-lam-ma-ka bi2-du3-a |
| 643. | (A23.26) lugal mu-ni-ce3 kur tuku2-tuku2-e |
| 644. | (A23.27) gu3-de2-a en dnin-jir2-su-ke4 |
| 645. | (A23.28) gu-za-ni mu-gen6 |
| 646. | (A23.29) na-ba mu-ce3 im-ma-sa4 |
| 647. | (A23.30) na igi e2-uru18-ga-ka bi2-du3-a |
| 648. | (A24.1) gu3-de2-a en dnin-jir2-su-ke4 |
| 649. | (A24.2) nam dug3 mu-ni-tar |
| 650. | (A24.3) na-ba mu-ce3 im-ma-sa4 |
| 651. | (A24.4) na a-ga dba-u2-ka bi2-du3-a |
| 652. | (A24.5) e2-ninnu igi an-na-ke4 zu |
| 653. | (A24.6) dba-u2 zi-cag4-jal2 gu3-de2-a |
| 654. | (A24.7) na-ba mu-ce3 im-ma-sa4 |
| 655. | (A24.8) e2 lugal-na zid-de3-ec2 mu-du3 |
| 656. | (A24.9) sipad zid gu3-de2-a an ki im-da-mu2 |
| 657. | (A24.10) ud-sakar gibil-gin7 men bi2-il2 |
| 658. | (A24.11) mu-bi kur-cag4-ce3 |
| 659. | (A24.12) pa bi2-e3 |
| 660. | (A24.13) gu3-de2-a e2 dnin-jir2-su-ka |
| 661. | (A24.14) dutu-gin7 dugud-ta ba-ta-e3 |
| 662. | (A24.15) hur-saj za-gin3-na-gin7 mu-mu2 |
| 663. | (A24.16) hur-saj nu11 babbar2-ra-gin7 |
| 664. | (A24.17) u6 di-de3 ba-gub |
| 665. | (A24.18) dub-la2-bi am-gin7 mu-cu4-cu4 |
| 666. | (A24.19) ucum-bi ur-mah-gin7 cu-ba bi2-nu2-nu2 |
| 667. | (A24.20) gi-gun4-bi ab-zu-gin7 ki sikil-e bi2-mu2 |
| 668. | (A24.21) urin-bi tarah kug abzu-gin7 |
| 669. | (A24.22) si ba-mul-mul |
| 670. | (A24.23) ud-sakar gibil an-na gub-ba-gin7 |
| 671. | (A24.24) gu3-de2-a e2 dnin-jir2-su-ka |
| 672. | (A24.25) u6 di-de3 ba-gub |
| 673. | (A24.26) e2-a dub-la2-bi cu4-cu4-ga-bi |
| 674. | (A24.27) la-ha-ma abzu-da cu4-ga-am3 |
| 675. | (A25.1) e2 jic jar-ra-bi a-ji6 ambar mah muc a sig-ga-am3 |
| 676. | (A25.2) e2 KA gid2-da-bi |
| 677. | (A25.3) an bar-bar-ra ni2-jal2-la-am3 |
| 678. | (A25.4) e2 e2-dul4-la-bi nu11 an-cag4-ge dirig-ga-am3 |
| 679. | (A25.5) kan4 ki lugal kur9-bi-ta |
| 680. | (A25.6) hu-ri2-in am-ce3 igi il2-il2-dam |
| 681. | (A25.7) jicti kan4-e us2-sa-bi |
| 682. | (A25.8) tirx(NIR)-an-na an-ne2 us2-sa-am3 |
| 683. | (A25.9) jic-kan4 an-na-bi e2-ninnu ud gu3-ba gu3 di tec2-ba gub-ba-am3 |
| 684. | (A25.10) sig7-igi-bi ni2 il2-il2-a-bi |
| 685. | (A25.11) igi u6 di dijir-re-ne-kam |
| 686. | (A25.12) e2-a barag babbar2 mu-ru-gu2-ni |
| 687. | (A25.13) hur-saj za-gin3-na an ki-a ki he2-us2-sa-am3 |
| 688. | (A25.14) kij2-sig17 unu6 gal mu-ja2-ja2-ne |
| 689. | (A25.15) bur kug-sig17 lal3 jectin de2-a |
| 690. | (A25.16) an-ne2 cu4-ga-am3 |
| 691. | (A25.17) e2-nu2-da mu-du3-ne |
| 692. | (A25.18) kur car2-da mec3 kug abzu-a |
| 693. | (A25.19) gurun7 il2-la-am3 |
| 694. | (A25.20) mu-du3 cu im-ta-jar-ra-ta |
| 695. | (A25.21) cag4 dijir-re-ne gu2-bi gi4-a-am3 |
| 696. | (A25.22) sipad zid gu3-de2-a gal mu-zu |
| 697. | (A25.23) gal i3-ga-tum2-mu |
| 698. | (A25.24) a-ga tukul la2 kan4 me3-ba |
| 699. | (A25.25) ur-saj ceg9-saj-6 saj-ar-bi |
| 700. | (A25.26) im-ma-ab-dab5-be2 |
| 701. | (A25.27) igi iriki-ce3 ki ni2 guru3-ba |
| 702. | (A25.28) muc(source: ur)-saj-7-am3 im-ma-ab-dab5-e |
| 703. | (A26.1) cu-ga-lam kan4 me-lem4-ba |
| 704. | (A26.2) ucum jicnimbar-bi im-ma-ab-dab5-be2 |
| 705. | (A26.3) igi ud e3 ki nam tar-re-ba |
| 706. | (A26.4) cu-nir dutu saj-alim-ma |
| 707. | (A26.5) im-ma-da-sig9-ge |
| 708. | (A26.6) kan4-sur-ra igi u6 di-ba |
| 709. | (A26.7) ur-mah ni2 dijir-re-ne-kam |
| 710. | (A26.8) im-ma-ab-dab5-e |
| 711. | (A26.9) tar-sir2-sir2 ki a2 aj2-ba |
| 712. | (A26.10) ku-li-an-na urud-bi |
| 713. | (A26.11) im-ma-ab-dab5-e |
| 714. | (A26.12) a-ga dba-u2 ki cag4 kuc2-ba |
| 715. | (A26.13) ma2-gi4-lum gud-alim-bi-da |
| 716. | (A26.14) im-ma-ab-dab5-e |
| 717. | (A26.15) ur-saj ug5-ga i3-me-ca-ke4-ec2 |
| 718. | (A26.16) ka-bi ki a naj-ce3 mu-jar |
| 719. | (A26.17) mu-bi mu-ru dijir-re-ne-ka |
| 720. | (A26.18) gu3-de2-a ensi2 lagacki-ke4 |
| 721. | (A26.19) pa e3 ba-ni-a |
| 722. | (A26.20) ig jicerin-na e2-a cu4-ga-bi |
| 723. | (A26.21) dickur an-ta gu3 nun di-da-am3 |
| 724. | (A26.22) e2-ninnu saj-kul-bi idim |
| 725. | (A26.23) jicnu-kucu4-bi ur-mah |
| 726. | (A26.24) si-jar-bi-ta muc-cag4-tur3 muc-huc |
| 727. | (A26.25) am-ce3 eme ed2-de3 |
| 728. | (A26.26) ga-du ig-e u5 us2-sa-bi |
| 729. | (A26.27) ug nemurx(PIRIJ.TUR) tur-tur cu-ba du2-ru-na-am3 |
| 730. | (A26.28) e2-a gag jic-ur3 kug mu-sig9-ge4-ne |
| 731. | (A26.29) ucum lu2-ce3 cu ib2-jar-ra-am3 |
| 732. | (A26.30) ig-ba ec2 kug im-suru5-ne |
| 733. | (A27.1) dnirah kug abzu dar-a-am3 |
| 734. | (A27.2) e2-sa-la2-a-bi kec3ki arattaki na de5-ga-am3 |
| 735. | (A27.3) e2-sa-du8-a-bi pirij huc-am3 |
| 736. | (A27.4) kalam-ma igi mi-ni-ib2-jal2 |
| 737. | (A27.5) dili du igi-bi nu-ma-dib-be2 |
| 738. | (A27.6) e2-ninnu ni2-bi kur-kur-ra |
| 739. | (A27.7) tug2-gin7 im-dul4 |
| 740. | (A27.8) e2 kug NE-a an-ne2 ki jar-ra |
| 741. | (A27.9) cembi2-zid-da cu tag dug4-ga |
| 742. | (A27.10) ce-er-zid an-na-ka i3-ti-gin7 e3-a |
| 743. | (A27.11) e2 igi-bi kur gal ki us2-sa |
| 744. | (A27.12) cag4-bi nam-cub cir3 ha-mun |
| 745. | (A27.13) bar-bi an e2 mah he2-jal2-la zig3-ga |
| 746. | (A27.14) gu2-en bar-ra-bi |
| 747. | (A27.15) ki |
| 748. | (A27.16) a-lal3-bi-ta inim cudu3-da |
| 749. | (A27.17) cukur2-bi-da he2-jal2 dijir-re-ne-kam |
| 750. | (A27.18) urin e2-da sig9-sig9-ga-bi |
| 751. | (A27.19) anzud2mucen kur cubax(MUC)-a a2(source: DA) he2-ba9-ra2-am3 |
| 752. | (A27.20) e2-ninnu im-bi im ha-mun |
| 753. | (A27.21) id2edin-ta ed3-da |
| 754. | (A27.22) lugal-bi en dnin-jir2-su-ke4 |
| 755. | (A27.23) cag4 kug-ge bi2-pad3 |
| 756. | (A27.24) cembi2-zid-gin7 saj-ja2 mi-ni-ib2-de2 |
| 757. | (A28.1) gu3-de2-a ce-er-zid an-na-ka |
| 758. | (A28.2) cu tag ba-ni-dug4 |
| 759. | (A28.3) e2 gud-bi-ta |
| 760. | (A28.4) i3 kur9 ga kur9 |
| 761. | (A28.5) udun-mah-bi-ta |
| 762. | (A28.6) gug2 gal si gal |
| 763. | (A28.7) jiri2-PA-na-bi |
| 764. | (A28.8) gud gu7 udu gu7 |
| 765. | (A28.9) e2 ki cukur2-bi uz-ga ec3 ja2-ja2 |
| 766. | (A28.10) ne-saj-bi |
| 767. | (A28.11) kur jectin biz-biz-ze2 |
| 768. | (A28.12) e2-lunga3-bi-ta |
| 769. | (A28.13) id2idigna a-u3-ba jal2-la-am3 |
| 770. | (A28.14) e2 nij2-gur11-<ra>-bi-a za kug nagga |
| 771. | (A28.15) e2 jicgigir-ra-bi |
| 772. | (A28.16) kur ki-a gub-ba |
| 773. | (A28.17) a-ga balaj-a-bi gud gu3 nun di |
| 774. | (A28.18) kisal-bi cudu3 kug si-im a2-la2 |
| 775. | (A28.19) kun na4 e2-a nu2-a-bi |
| 776. | (A28.20) hur-saj ul nun-ne2-ec2 nu2-am3 |
| 777. | (A28.21) kun an-na ur3-ce3 da-a-bi |
| 778. | (A28.22) nu11 kur-ce3 igi sud il2-dam |
| 779. | (A28.23) jickiri6 gig2 edin e2-ce3 sig9-ga-bi |
| 780. | (A28.24) kur jectin biz-biz-ze2 ki ni2 <me>-lem4-e mu2-am3 |
| 781. | (A29.1) na 7 e2-e dab6-ba-bi |
| 782. | (A29.2) nij2 lugal-bi-da cag4 kuc2-kuc2-dam |
| 783. | (A29.3) e2-ninda-ki-sig10-bi |
| 784. | (A29.4) nij2 sikil abzu na de5-ga-am3 |
| 785. | (A29.5) cim na4 e2-a cu4-ga-bi |
| 786. | (A29.6) e2 gudug kug a nu-silig5-ge-dam |
| 787. | (A29.7) bad3-si an-na |
| 788. | (A29.8) tum12mucen du2-ru-na-bi |
| 789. | (A29.9) eridugki nam HI A du3-X-am3 |
| 790. | (A29.10) e2-ninnu tum12mucen-e ni2 bi2-ne |
| 791. | (A29.11) an-dul3 pa gal-gal jissu dug3-ga-kam |
| 792. | (A29.12) simmucen mucen-e ceg12 mu-gi4-gi4 |
| 793. | (A29.13) e2-kur den-lil2-la2 ezen jal2-la-am3 |
| 794. | (A29.14) e2-a ni2 gal-bi |
| 795. | (A29.15) kalam-ma mu-ri |
| 796. | (A29.16) ka tar-ra-bi |
| 797. | (A29.17) kur-re ba-ti |
| 798. | (A29.18) e2-ninnu ni2-bi kur-kur-ra tug2-gin7 im-dul4 |
| 799. | (A30.1) e2 lugal-bi hi-li-a i3-du3 |
| 800. | (A30.2) dnin-jic-zid-da-ke4 |
| 801. | (A30.3) ki gal-la bi2-du3 |
| 802. | (A30.4) gu3-de2-a ensi2 lagacki-ke4 |
| 803. | (A30.5) temen-bi mu-sig9 |
| 804. | (A30.6) e2 dutu-gin7 kalam-ma e3-a |
| 805. | (A30.7) gud gal-gin7 sahar bar-ra gub-ba |
| 806. | (A30.8) i3-ti giri17-zal-gin7 |
| 807. | (A30.9) unken-ne2 si-a |
| 808. | (A30.10) hur-saj sig7-ga-gin7 |
| 809. | (A30.11) hi-li guru3-a |
| 810. | (A30.12) u6 di-de3 gub-ba |
| 811. | (A30.13) e2-ninnu ki-bi gi4-a-ba |
| 812. | (A30.14) dnin-jir2-su za3-mi2 |
| 813. | (A30.15) e2 dnin-jir2-su-ka du3-a |
| 814. | (A30.16) za3-mi2 mu-ru-bi-im |
| 815. | (B1.1) e2 dim gal kalam-ma |
| 816. | (B1.2) an ki-da mu2-a |
| 817. | (B1.3) e2-ninnu ceg12 zid den-lil2-e nam dug3-ga tar-ra |
| 818. | (B1.4) hur-saj nisig-ga u6-e gub-ba |
| 819. | (B1.5) kur-kur-ta e3-a |
| 820. | (B1.6) e2 kur gal-am3 an-ne2 im-us2 |
| 821. | (B1.7) dutu-am3 an-cag4-ge im-si |
| 822. | (B1.8) e2-ninnu anzud2mucen babbar2-ra-am3 |
| 823. | (B1.9) kur-ra dub3 mi-ni-ib2-bad |
| 824. | (B1.10) uj3 ba-jar-jar kalam ba-gub-gub |
| 825. | (B1.11) da-nun-na u6 di-de3 im-ma-cu4-cu4-ge-ec2 |
| 826. | (B1.12) ensi2 kug-zu-am3 inim zu-am3 |
| 827. | (B1.13) nam-dijir-re giri17 ki im-mi-su2-su2 |
| 828. | (B1.14) sizkur2 ra-zu-a nij2-dun-a ki im-mi-us2-us2 |
| 829. | (B1.15) ensi2-ke4 dijir iri-na-ke4 ra2-zu im-ma-be2 |
| 830. | (B1.16) e2 ninda gu7-bi ninda ba-an-tah |
| 831. | (B1.17) kij2-sigx(SAR) udu dab5-bi udu im-ma-a-tah |
| 832. | (B1.18) bur he2-jal2 an-cag4 NE-ca-gin7 |
| 833. | (B1.19) gaba-ba |
| 834. | (B1.20) <d>a-nun-na-ke4-<ne>-er mu-ne-gub |
| 835. | (B1.21) cudu3 mu-ne-ca4 da-nun-na-da-nun-na u6 di-de3 ki lagacki |
| 836. | (B2.1) dlamma kur-kur-ra dug4-ga-ne-ne a mah e3-a |
| 837. | (B2.2) lu2 u2 la2 ba-ab-la2-e |
| 838. | (B2.3) cul zid lu2 igi mu-ci-bar-ra-ne |
| 839. | (B2.4) nam-til3 mu-na-sud |
| 840. | (B2.5) sipad-me e2 mu-du3 lugal-ju10 e2-a-na mi-ni-ku4-ku4 |
| 841. | (B2.6) <d>a-nun-na bar-ju10-a cudu3 he2-mi-sa4-za |
| 842. | (B2.7) sipad zid gu3-de2-a |
| 843. | (B2.8) gal mu-zu gal i3-ga-tum2-mu |
| 844. | (B2.9) u2-dug4 sag9-<ga>-ni igi-ce3 mu-na-jen |
| 845. | (B2.10) dlamma sag9-ga-ni ejer-ni im-us2 |
| 846. | (B2.11) lugal-ni e2 ul e2 libir ki-tuc-na-ce3 |
| 847. | (B2.12) gu3-de2-a en dnin-jir2-su-ra |
| 848. | (B2.13) nij2-ba na-gu-ul-gu-ul |
| 849. | (B2.14) en-ra e2-ninnu-a mu-na-kurx(DU) |
| 850. | (B2.15) cudu3 mu-na-ca4 |
| 851. | (B2.16) lugal-ju10 dnin-jir2-su |
| 852. | (B2.17) en a huc gi4-a |
| 853. | (B2.18) en dug4-ga-ni saj-bic e3-a |
| 854. | (B2.19) dumu-nitah2 den-lil2-la2 ur-saj ma-a-dug4 |
| 855. | (B2.20) cu zid ma-ra-a-jar |
| 856. | (B2.21) dnin-jir2-su e2-zu mu-ra-du3 |
| 857. | (B2.22) hul2-/la ha-ni\-ku4-ku4 |
| 858. | (B2.23) dba-u2-ju10 a2-mi-zu ma-ra-jar |
| 859. | (B3.1) ki-tuc dug3-ga-ma-ni-ib2 |
| 860. | (B3.2) gu3 de2-a-ni jic ba-tuku-am3 |
| 861. | (B3.3) ur-saj-e sizkur2 ra2-<zu>-ni |
| 862. | (B3.4) gu3-de2-a-ac2 en dnin-jir2-su-ke4 cu ba-ci-ti |
| 863. | (B3.5) mu jen-na-am3 itid til-la-am3 |
| 864. | (B3.6) mu gibil an-na im-ma-gub |
| 865. | (B3.7) itid e2-ba ba-a-kur9 |
| 866. | (B3.8) itid-bi ud 3-am3 im-ta-zal |
| 867. | (B3.9) dnin-jir2-su eridugki-ta jen-am3 |
| 868. | (B3.10) i3-ti sa-sa im-e3 |
| 869. | (B3.11) kalam-ma ud mu-jal2 e2-ninnu dsuen u3-tud-da |
| 870. | (B3.12) saj im-ma-da-ab-sa2 |
| 871. | (B3.13) gu3-de2-a gug za-gin3 mi-ni-uh |
| 872. | (B3.14) ub-da im-mi-dug4 |
| 873. | (B3.15) i3-he-nun-na ki ba-ni-sud |
| 874. | (B3.16) MUC DA MA lu2 kij2 ak-am3 |
| 875. | (B3.17) e2-ta ba-ta-e3 |
| 876. | (B3.18) lal3 i3-nun jectin ga ce-a |
| 877. | (B3.19) jic-<ji6>-par4 jicpec3 nij2-jen-na |
| 878. | (B3.20) ga saj-ba dim2-ma |
| 879. | (B3.21) zu2-lum jican jectin tur-tur |
| 880. | (B3.22) nij2 izi nu-tag-ga |
| 881. | (B3.23) nij2-gu7 dijir-re-ne-kam |
| 882. | (B3.24) lal3 i3-nun-na kij2 ba-ni-ak |
| 883. | (B3.25) ud dijir zid-da du-da |
| 884. | (B3.26) gu3-de2-a ud /ten\-ta |
| 885. | (B3.27) kij2-sigx(SAR)-ge bi2-dib |
| 886. | (B4.1) e2-e dasar-ri cu |
| 887. | (B4.2) dnin-ma-da-ke4 na de5 mi-ni-jar |
| 888. | (B4.3) lugal den-ki-ke4 ec-bar kij2 ba-an-cum2 |
| 889. | (B4.4) dnin-dub icib mah eridugki-ga14-ke4 |
| 890. | (B4.5) na-izi ba-ni-sig9 |
| 891. | (B4.6) nin jarza kal-la-ke4 dnance cir3 kug dug4 zu e2-e ba-an-dug4 |
| 892. | (B4.7) u8 gig2-ge umbin mi-ni-ib2-kij2 |
| 893. | (B4.8) im-ma-al an-na-ke4 |
| 894. | (B4.9) ubur |
| 895. | (B4.10) jiccinig jicCEG9.AN u3-tud-<da>-ta |
| 896. | (B4.11) e2-ninnu im-ta-sikil-e-ne |
| 897. | (B4.12) im-ta-dadag-ge-ec2 |
| 898. | (B4.13) ensi2-ke4 iri-a dub3 bi2-jar |
| 899. | (B4.14) kalam-ma sig bi2-jar |
| 900. | (B4.15) du6-du6 mu-si-ig inim-jar mu-gi4 |
| 901. | (B4.16) a-ah dug4-ga jiri2-ta jar-am3 |
| 902. | (B4.17) iri-a ama lu2 tur5-ra-ke4 |
| 903. | (B4.18) a silim jar-ra-am3 mac-ance nij2-zi-jal2 edin-na |
| 904. | (B4.19) tec2-bi-ce3 gam-ma-am3 |
| 905. | (B4.20) ur-mah pirij ucumgal edin-na-ka |
| 906. | (B4.21) u3 dub3 jar-ra-am3 |
| 907. | (B4.22) ud sizkur2-re ji6 cudu3-de3 |
| 908. | (B4.23) i3-ti /nij2\ ud-zal-la-ke4 |
| 909. | (B4.24) lugal-bi mu-um-je26-e |
| 910. | (B5.1) ur-saj dnin-jir2-su e2-a mi-NI-ku4-ku4 |
| 911. | (B5.2) e2-a lugal-bi im-ma-jen |
| 912. | (B5.3) hu-ri2-in am-ce3 igi il2-il2-dam |
| 913. | (B5.4) ur-saj e2-a-na ku4-ku4-da-ni |
| 914. | (B5.5) ud me3-ce3 gu3 ja2jar-am3 |
| 915. | (B5.6) dnin-jir2-su e2-na mu-kux(DU)-kux(DU) |
| 916. | (B5.7) ec3 abzu ezen jal2-/la-am3\ |
| 917. | (B5.8) lugal [e2]-/ni\-ta nam-ta-jen |
| 918. | (B5.9) dutu ki lagac<ki>-e e3-am3 |
| 919. | (B5.10) dba-u2 a2-mi-ni-ce3 du-a-ni |
| 920. | (B5.11) munus zid e2-a-ni-ce3 cu ja2-ja2-dam |
| 921. | (B5.12) a2-nu2-da-ka-na kur9-ra-ni |
| 922. | (B5.13) id2idigna a-u3-ba ja2jar-am3 |
| 923. | (B5.14) da PI-na-ka tuc-a-ni |
| 924. | (B5.15) nin dumu an kug-ga jickiri6 nisig-ga gurun il2-la-am3 |
| 925. | (B5.16) ud e3-am3 nam tar-ra-am3 |
| 926. | (B5.17) dba-/u2\ a2(source: DA)-mi-na kur9-ra-am3 |
| 927. | (B5.18) ki lagacki he2-jal2-la-am3 |
| 928. | (B5.19) ud im-zal dutu lagacki-ke4 kalam-ma saj mi-ni-il2 |
| 929. | (B5.20) gud-i3 udu-i3 e2-e bi2-dab5 |
| 930. | (B5.21) bur an-na mu-gub tin mu-ni-/de2-de2\ |
| 931. | (B5.22) da-nun-<na> ki lagac(source: CIR.BUR)ki en dnin-jir2-su-da ki-bi mu-da-rin2-ne2-ec2-am3 |
| 932. | (B5.23) e2-a nam-icib-ba cu mi-ni-du7 |
| 933. | (B5.24) ec-bar kij2 mi2 mi-ni-dug4 |
| 934. | (B6.1) tin bur gal-la im-ma-de2 |
| 935. | (B6.2) e2-ninnu UL /GAL\ UL DU gu2 im-ma-gur-re |
| 936. | (B6.3) ec3 dnin-dub-ke4 ceg12 mu-gi4-gi4 |
| 937. | (B6.4) ninda ud-da ga mac2-lulim-ma |
| 938. | (B6.5) ud ji6-e de6-a |
| 939. | (B6.6) nir-jal2 dumu ki aj2 den-lil2-la2 ur-saj dnin-jir2-su |
| 940. | (B6.7) u3-a mi-ni-zi-zi |
| 941. | (B6.8) me gal-gal-la saj /mi-ni\-il2-e |
| 942. | (B6.9) AN /KA\ /mar\-za e2-a SA-ni |
| 943. | (B6.10) ec3 e2-ninnu ki-us2 mu-ja2-ja2 |
| 944. | (B6.11) zid-du-e cu |
| 945. | (B6.12) erim2-du-e gu2 jic ja2-ja2-da |
| 946. | (B6.13) e2 gen6-ne2-da e2 dug3-ge-da |
| 947. | (B6.14) iri-ni ec3 jir2-suki na de6 cum2-mu-da |
| 948. | (B6.15) jicgu-za nam tar-ra gub-da |
| 949. | (B6.16) jidru ud su3-ra2 cu-a ja2-ja2-da |
| 950. | (B6.17) sipad dnin-jir2-su-ke4 gu3 de2-a-ar |
| 951. | (B6.18) men nisig-ga-gin7 saj an-ce3 il2-da |
| 952. | (B6.19) kuc la2 gada la2 saj-a mur10-a |
| 953. | (B6.20) kisal e2-ninnu-ka ki-gub pad3-de3-da |
| 954. | (B6.21) ig gal dim jir2-nun-na gal5-la2 gal jir2-suki |
| 955. | (B6.22) dig-alim dumu ki aj2-ja2-ni |
| 956. | (B6.23) en dnin-jir2-su-ra me-ni-da mu-na-da-dib-e |
| 957. | (B6.24) e2 sikil-e-da cu4-luh ja2-ja2-da |
| 958. | (B6.25) cu kug a en-ra cum2-mu-da |
| 959. | (B6.26) kac bur-ra de2-da tin dug-a de2-da |
| 960. | (B7.1) e2-lunga3 e2 a2 sikil-ba |
| 961. | (B7.2) u2-lu5-ci-e a pap-sir2-gin7 |
| 962. | (B7.3) kun-ka3-an za-a-da |
| 963. | (B7.4) gud du7 mac2 du7 udu niga |
| 964. | (B7.5) ninda ud-da ga mac2-lulim-ma |
| 965. | (B7.6) ud ji6-e de6-a nir-jal2 dumu ki aj2 |
| 966. | (B7.7) den-lil2-la2 ur-saj dnin-jir2-su |
| 967. | (B7.8) gu7-a naj-a X-bi u3-a «MI» zi-zi-<da> |
| 968. | (B7.9) en cu4-luh dadag-ga dumu-saj e2-ninnu |
| 969. | (B7.10) dcul-cag4-ga dnin-jir2-su-ra |
| 970. | (B7.11) me-ni-da mu-na-da-dib(source: LU)-e |
| 971. | (B7.12) cita2 saj 7 cu du8-a-da |
| 972. | (B7.13) e2-en-kar2 kan4 me3-ka ig-bi jal2 da13-da13-<da> |
| 973. | (B7.14) eme jiri2 mi-tum jic-a-ma-ru |
| 974. | (B7.15) mar6-ra-tum jic-hur me3-bi |
| 975. | (B7.16) |
| 976. | (B7.17) kur gu2-erim2-jal2 den-lil2-la2-ka |
| 977. | (B7.18) a-gin7 ja2-ja2-da |
| 978. | (B7.19) ur-saj jiccar2-ur3 me3-a kur cu-ce3 jar-jar |
| 979. | (B7.20) cagina gu2-tuku e2-ninnu |
| 980. | (B7.21) mucensur2-du3 ki-bal-a |
| 981. | (B7.22) dlugal-kur-dub2 cagina-ni |
| 982. | (B7.23) en dnin-jir2-su-ra me-ni-da mu-na-da-dib-e |
| 983. | (B7.24) mi-tum an-na-ke4 ud /huc\-gin7 |
| 984. | (B8.1) kur-ce3 gu3 jar-ra-a |
| 985. | (B8.2) jiccar2-ur3 a-ma-ru me3 |
| 986. | (B8.3) jic-gaz ki-bal-a |
| 987. | (B8.4) en-ne2 ki-bal kur saj-ki-ni u3-ma-da-gid2-da |
| 988. | (B8.5) gu3 mi-ri2-a-ni u3-ma-ra |
| 989. | (B8.6) lipic-bi u3-mu-ra2 |
| 990. | (B8.7) en-na cagina 2-kam-ni |
| 991. | (B8.8) kur-cu-na-buru5mucen-am3 |
| 992. | (B8.9) dumu den-lil2-la2-ra me-ni-da mu-na-da-dib-e |
| 993. | (B8.10) nam-cita ki lagacki |
| 994. | (B8.11) cu du8-a-da |
| 995. | (B8.12) sizkur2 ra2-zu-bi dug3-ga ja2-ja2-da |
| 996. | (B8.13) ur-saj eridugki-ce3 du-a-ni |
| 997. | (B8.14) silim-ma dug3 di-da |
| 998. | (B8.15) dnin-jir2-su eridugki-ta du-ni |
| 999. | (B8.16) iri du3-a jicgu-za-bi gen6-na-<da> |
| 1000. | (B8.17) nam-til3 sipad zid |
| 1001. | (B8.18) gu3-de2-a-da |
| 1002. | (B8.19) giri17 cu jal2-la-da |
| 1003. | (B8.20) ad gi4-gi4-ni |
| 1004. | (B8.21) dlugal-si-sa2 en dnin-jir2-su-<ra> |
| 1005. | (B8.22) me-ni-da mu-na-da-dib-e |
| 1006. | (B8.23) tur dug4-ga-da |
| 1007. | (B8.24) mah dug4-ga-da |
| 1008. | (B8.25) inim |
| 1009. | (B8.26) erim2 dug4-/ga?\ [...] X [...]-/da\ |
| 1010. | (B9.1) ur-saj barag kug-ga tuc-a-ra |
| 1011. | (B9.2) dnin-jir2-su-ra e2-ninnu-a inim-bi ku4-ku4-da |
| 1012. | (B9.3) dcakkan2 ceg9-bar sukkal e2-dug3-ga saj-an-ni |
| 1013. | (B9.4) en dnin-jir2-su-ra me-ni-da |
| 1014. | (B9.5) mu-na-da-dib-e |
| 1015. | (B9.6) a kug-ge-da naja sikil-e-da |
| 1016. | (B9.7) i3 bur babbar2-ra naja E2.NUN-na-da |
| 1017. | (B9.8) jic-nu2 u2 za-gin3 ba-ra-ga-na |
| 1018. | (B9.9) u3 dug3 ku4-ku4-da |
| 1019. | (B9.10) e2-nu2 e2-dug3-ga-ni-a |
| 1020. | (B9.11) bar-ra ku4-ku4-da |
| 1021. | (B9.12) cag4-ga nu-e3-e3-da |
| 1022. | (B9.13) dkinda-zid lu2 e2-dug3-ga-kam |
| 1023. | (B9.14) en dnin-jir2-su-ra me-ni-da mu-na-da-dib-e |
| 1024. | (B9.15) jicgigir kug an mul-a erin2-na-da |
| 1025. | (B9.16) ancedur9ur3-bi pirij-kac4-e-pad3-da |
| 1026. | (B9.17) ance-ba sig10-ga-da |
| 1027. | (B9.18) ance sig-a ance eridugki-ga14 |
| 1028. | (B9.19) ancedur9-da E2 KA kur-kur kur9 di-da |
| 1029. | (B9.20) lugal-bi dnin-jir2-su hul2-la tum2-mu-da |
| 1030. | (B9.21) lu2 ug-gin7 ceg12 gi4-a |
| 1031. | (B9.22) mar-uru5-gin7 zig3-ga |
| 1032. | (B9.23) mackim da-ga d/nin-jir2\-su-ka |
| 1033. | (B10.1) den-ceg12-nun sipad ance-ka-ni |
| 1034. | (B10.2) en dnin-jir2-su-ra me-ni-da mu-na-da-dib-e |
| 1035. | (B10.3) i3 hi-a-da gara2(source: BI) hi-a-da |
| 1036. | (B10.4) ud5 kug ud5 ga naj mac2-lulim |
| 1037. | (B10.5) ama dnin-jir2-su-ka |
| 1038. | (B10.6) i3 ga-bi ec3 e2-ninnu-a |
| 1039. | (B10.7) en-lulim sipad mac2-lulim en dnin-jir2-su-ra |
| 1040. | (B10.8) me-ni-da mu-na-da-dib-e |
| 1041. | (B10.9) ti-gi4 nij2 dug3-ge |
| 1042. | (B10.10) kisal e2-ninnu hul2-a si-a-da |
| 1043. | (B10.11) al-jar mi-ri2-tum nij2 e2-dug3-ga |
| 1044. | (B10.12) ur-saj jectugtug2-a-ra |
| 1045. | (B10.13) dnin-jir2-su-ra e2-ninnu dug3-bi ja2-ja2-da |
| 1046. | (B10.14) nar ki aj2-a-ni ucumgal kalam-ma |
| 1047. | (B10.15) en dnin-jir2-su-ra me-ni-da mu-na-da-dib-e |
| 1048. | (B10.16) cag4 huj-ja2-da bar huj-ja2-da |
| 1049. | (B10.17) igi er2 pad3-da er2 cex(SIG)-da |
| 1050. | (B10.18) cag4 a-nir-ta a-nir be4-da |
| 1051. | (B10.19) en-na cag4 ab-gin7 zig3-ga-ni |
| 1052. | (B10.20) id2buranunaki-gin7 luh-ha-ni |
| 1053. | (B10.21) a-ma-ru-gin7 sa-ga dug4-<ga>-ni |
| 1054. | (B10.22) kur gu2-erim2-jal2 den-lil2-la2-ka |
| 1055. | (B10.23) a-gin7 u3-mi-/jar cag4\ [...] /gu2-bi gi4\-a-ni a sed6? su3-da |
| 1056. | (B11.1) balaj-ja2-ni lugal-igi-huc-am3 |
| 1057. | (B11.2) en dnin-jir2-su-ra me-ni-da mu-na-da-dib-e |
| 1058. | (B11.3) lukur ki ig-ni he2-jal2 lu2 car2 |
| 1059. | (B11.4) dza-za-ru |
| 1060. | (B11.5) dickur-pa-e3 |
| 1061. | (B11.6) <d>ur2-agrun-ta-e3-a |
| 1062. | (B11.7) dhe2-jir2-nun-na |
| 1063. | (B11.8) dhe2-cag4-ga |
| 1064. | (B11.9) dzu2-ur2-ju10 |
| 1065. | (B11.10) dza-ar-ju10 |
| 1066. | (B11.11) dumu mac 7 dba-u2-me |
| 1067. | (B11.12) ban3-da en dnin-jir2-su-ka-me |
| 1068. | (B11.13) nam-cita sag9-ga gu3-de2-a-a-da |
| 1069. | (B11.14) en dnin-jir2-su-ra mu-na-da-cu4-ge-ec2 |
| 1070. | (B11.15) gana2 gal-gal-e cu il2-la-da |
| 1071. | (B11.16) eg2 pa4 lagacki-ke4 |
| 1072. | (B11.17) gu2-bi zig3-ga-da |
| 1073. | (B11.18) edin lugal-bi-ir tum2 |
| 1074. | (B11.19) gu2-edin-na-ka dezina2-ku3-su3 pa sikil-e |
| 1075. | (B11.20) absin3-na saj an-ce3 il2-ce3 |
| 1076. | (B11.21) gana2 zid-bi gig ziz2 gu2-gu2 um-de6 |
| 1077. | (B11.22) guru7-guru7 mac ki lagacki-ke4 |
| 1078. | (B11.23) gu2 gur-gur-ra-da |
| 1079. | (B11.24) saj-tun3 den-lil2-la2 engar gu2-edin-na |
| 1080. | (B11.25) djic-bar-e3 en dnin-jir2-su-ra |
| 1081. | (B11.26) me-ni-da mu-na-da-an-dib-be2 |
| 1082. | (B12.1) ambar-bi ku6HI.SUHUR ku6suhur u3-de6 |
| 1083. | (B12.2) jic-gi /nisig\-ga-bi gi ha-bu3-ur2 u3-de6 |
| 1084. | (B12.3) imin-catam ra-/gaba\ gu2-edin-na-ke4 |
| 1085. | (B12.4) dnin-jir2-su-ra e2-ninnu-a inim-bi ku4-ku4-da |
| 1086. | (B12.5) dlamma enkud-e gu2-edin-na |
| 1087. | (B12.6) en dnin-jir2-su-ra me-ni-da mu-na-da-dib-e |
| 1088. | (B12.7) edin ki dug3-ge na de5-ga-da |
| 1089. | (B12.8) gu2-edin-na edin dug3-ge |
| 1090. | (B12.9) na de5 cum2-ma-da |
| 1091. | (B12.10) mucen-bi [rin2]-rin2-na-da |
| 1092. | (B12.11) nunuz-bi e2-DI-a jal2-la-da |
| 1093. | (B12.12) ama-bi buluj3-e-da |
| 1094. | (B12.13) du8-du8 mac-ance lu-a-ba |
| 1095. | (B12.14) edin ki aj2 dnin-jir2-su-ka-ke4 |
| 1096. | (B12.15) nij2-kud nu-ak-da |
| 1097. | (B12.16) ddim-gal-abzu nijir gu2-edin-na |
| 1098. | (B12.17) en dnin-jir2-su-ra me-ni-da |
| 1099. | (B12.18) mu-na-da-dib-be2 |
| 1100. | (B12.19) iri du3-a-da ki-tuc jar-ra-da |
| 1101. | (B12.20) bad3 iri-kug-ga en-nu du3-a-da |
| 1102. | (B12.21) daga-us2 dag-ga-na-bi |
| 1103. | (B12.22) cita2 saj mah jicerin babbar2-ra |
| 1104. | (B12.23) e2-e dab6-ba-da |
| 1105. | (B12.24) dlugal-en-nu-iri-kug-ga-kam |
| 1106. | (B12.25) en dnin-jir2-su-ra me-ni-da mu-na-da-dib-e |
| 1107. | (B12.26) an kug-ge zid-de3-ec2 mu-jar |
| 1108. | (B13.1) den-lil2-e saj-ba gur bi2-dar |
| 1109. | (B13.2) dnin-hur-saj-ke4 igi zid ba-ci-bar |
| 1110. | (B13.3) d/en-ki\ lugal eridug/ki-ke4\ temen-bi /mu\-sig9 |
| 1111. | (B13.4) en zid cag4 zalag-zalag-ga-ke4 |
| 1112. | (B13.5) dsuen-e me-bi an ki-a im-mi-dirig-ga-am3 |
| 1113. | (B13.6) dnin-jir2-su-ke4 ec3 numun i-a cag4-ge ba-ni-pad3 |
| 1114. | (B13.7) ama dnance ceg12 ki lagacki-ka |
| 1115. | (B13.8) mi2 zid ba-ni-in-dug4 |
| 1116. | (B13.9) dijir numun zid-zid-da-ke4 |
| 1117. | (B13.10) e2 /mu\-du3 mu-/bi\ pa /bi2-e3\ |
| 1118. | (B13.11) ajrig kalag-[ga] dnance-/ke4\ |
| 1119. | (B13.12) sipad /gu2\-tuku dnin-jir2-su-ka-ke4 |
| 1120. | (B13.13) gal /mu\-zu gal i3-/ga\-tum2-/mu\ |
| 1121. | (B13.14) e2-e lu2 /e2\ du3-a-ke4 |
| 1122. | (B13.15) gu3-de2-a ensi2 |
| 1123. | (B13.16) lagacki-ke4 |
| 1124. | (B13.17) saj im-rig7(source: PA.TUK.DU)-ge |
| 1125. | (B13.18) jicgigir kur mu-gam su zig3 guru3 ni2 gal u5-a |
| 1126. | (B13.19) ancedur9ur3-bi ud-gu3-dug3-dug3-ga |
| 1127. | (B13.20) ance-ba sig10-ga-da |
| 1128. | (B13.21) cita2 saj 7 tukul huc me3 |
| 1129. | (B13.22) tukul ub 2-e nu-il2 jic-gaz me3 |
| 1130. | (B13.23) mi-tum tukul nir3 saj pirij |
| 1131. | (B14.1) kur-da gaba nu-gi4 |
| 1132. | (B14.2) jiceme(source: KAxJIR2) jiri2 cu-nir 10 lal 1 |
| 1133. | (B14.3) a2 nam-ur-saj-ja2 |
| 1134. | (B14.4) jicpan tir mec3-gin7 gu3 jar-ra-ni |
| 1135. | (B14.5) ti sumur me3-a nim-gin7 jir2-da-ni |
| 1136. | (B14.6) e2-mar-uru5 ug pirij muc-huc-ce3 |
| 1137. | (B14.7) eme ed2-de3-da-ni |
| 1138. | (B14.8) a2 me3 me nam-lugal si-si-a-da |
| 1139. | (B14.9) ensi2 lu2 e2 du3-a-ke4 |
| 1140. | (B14.10) gu3-de2-a ensi2 |
| 1141. | (B14.11) lagacki-ke4 |
| 1142. | (B14.12) saj im-mi-ib2-rig7-ge |
| 1143. | (B14.13) /urud\ nagga lagab za-gin3-na kug NE gug gi-rin me-luh-ha-da |
| 1144. | (B14.14) urudcen mah uruduri mah |
| 1145. | (B14.15) urudec2-da kug urudbur kug an-ne2 tum2 |
| 1146. | (B14.16) X IM X HU GA-ke4 |
| 1147. | (B14.17) bancur kug an-na il2-la-da |
| 1148. | (B14.18) ki sa2-[dug4-ga] bi2-[gub] |
| 1149. | (B14.19) dnin-/jir2\-[su]-ke4 iri-ni |
| 1150. | (B14.20) lagacki-e /u2? X\ ki dug3 ba-cum2 |
| 1151. | (B14.21) e2 ki-nu2-a ki ni2 te e2-a-ba |
| 1152. | (B14.22) nu2 mu-ni-gub |
| 1153. | (B14.23) kur-kur-re mucen-gin7 sila-ba dumu den-lil2-la2-da |
| 1154. | (B14.24) ni2 mu-da-ab-ten-ten |
| 1155. | (B14.25) id2-de3 a zal-le si-a-da |
| 1156. | (B14.26) ambar-ra HI.SUHURku6 suhurku6 jal2-la-da |
| 1157. | (B15.1) enkud ku3-jal2-bi zag-ba gub-ba-da |
| 1158. | (B15.2) a gal-gal-e ce si-si-a-<da> |
| 1159. | (B15.3) guru7-du6 guru7-mac ki lagacki-ke4 |
| 1160. | (B15.4) gu2 gur-gur-ra-da |
| 1161. | (B15.5) tur3 du3-a-da a-mac du3-a-da |
| 1162. | (B15.6) u8 zid-da sila4 /du3-du3\-a-da |
| 1163. | (B15.7) udu-nitah2 u8 zid-bi cu ba-ba-ra-da |
| 1164. | (B15.8) ab2 zid-da amar gub-gub-ba-da |
| 1165. | (B15.9) cag4-ba gudninda2 gu3 nun-bi di-da |
| 1166. | (B15.10) gud-e cudul2-la |
| 1167. | (B15.11) engar gud-ra-bi zag-ba gub-ba-da |
| 1168. | (B15.12) ance nij2-tug2-bi il2-a-da |
| 1169. | (B15.13) a2-dab5 ce si-bi ejer-bi us2-sa-/da\ |
| 1170. | (B15.14) dur9-e urudha-X mah la2-a-da |
| 1171. | (B15.15) e2-kin2-kin2 mah il2-la-da |
| 1172. | (B15.16) JA2 DA JA2 GADA+KID2.DU8 e2 geme2 tur d/nin-jir2-su\-[ka]-/ke4\ |
| 1173. | (B15.17) [...] /A\-gin7 [...] a-a-da |
| 1174. | (B15.18) [...] /GI\ EN jar-e |
| 1175. | (B15.19) kisal e2(source: SA)-ninnu-/ke4\ hul2-la si-a-da |
| 1176. | (B15.20) si-im-da a2-la2 balaj nam-nar cu du7-a |
| 1177. | (B15.21) balaj ki aj2-ni ucumgal kalam-ma |
| 1178. | (B15.22) saj-ba jen-na-da |
| 1179. | (B15.23) ensi2 e2-ninnu mu-du3-a |
| 1180. | (B16.1) gu3-de2-a en dnin-jir2-su-ra |
| 1181. | (B16.2) mu-na-da-ku4-ku4 (source uses REC 144 here; everywhere else it uses REC 56) |
| 1182. | (B16.3) /e2\-e me gal-la /saj\ mi-ni-ib2-il2 |
| 1183. | (B16.4) ni2 me-lem4-ma cu mi-ni-ib2-du7 |
| 1184. | (B16.5) ma2-gur8-gin7 sumur3? im-[X] |
| 1185. | (B16.6) dim2-sa-bi im-ak |
| 1186. | (B16.7) lugal-bi barag jir2-nun-na-ka |
| 1187. | (B16.8) ur-saj dnin-jir2-su ud-de3-ec2 im-e3 |
| 1188. | (B16.9) jicPU2 nij2 il2-la du2-ru-na-bi |
| 1189. | (B16.10) an sig7-ga su2-lim il2-la-am3 |
| 1190. | (B16.11) cu-nir-bi saj-cu4-ga-bi |
| 1191. | (B16.12) dnin-jir2-su <su> zig3 mu-guru3-am3 |
| 1192. | (B16.13) kuc la2 igi-bi-ce3 |
| 1193. | (B16.14) muc-gu3 sig7-ga a tu17-a-am3 |
| 1194. | (B16.15) jicgigir za-gin3 ul il2-a-na |
| 1195. | (B16.16) lugal-bi ur-saj dnin-jir2-su /d\utu-am3 mu-gub |
| 1196. | (B16.17) gu-za gu2-en-na gub-ba-bi |
| 1197. | (B16.18) e2 kug an-na ul-la du2-ru-na-am3 |
| 1198. | (B16.19) nu2-bi ki-nu2-a gub-ba-bi |
| 1199. | (B16.20) cilamx(TUR3) ki-nu2-ba dub3 jar-ra-am3 |
| 1200. | (B17.1) bar kug u2 za-gin3 ba-ra-ga-ba |
| 1201. | (B17.2) ama dba-u2 en dnin-jir2-su-da |
| 1202. | (B17.3) ki-nu2 mu-da-ab-dug3-ge |
| 1203. | (B17.4) zabar gal-gal-e tec2 mu-gu7-e |
| 1204. | (B17.5) e2 zid-da /zag\-da /zabar\ kug-ge ne-/saj\ |
| 1205. | (B17.6) mi-ni-ib2-cej6-cej6 |
| 1206. | (B17.7) bur kug unu6 gal-la cu4-ga-bi |
| 1207. | (B17.8) bunij(SUG) mah ban3-da a nu-silig5-ge-dam |
| 1208. | (B17.9) ec2-da-bi da-ba gub-ba-bi |
| 1209. | (B17.10) id2idigna id2buranunaki-bi-da |
| 1210. | (B17.11) he2-jal2 tum2-tum2-am3 |
| 1211. | (B17.12) nij2-du7 iri-na-ke4 pa bi2-e3 |
| 1212. | (B17.13) gu3-de2-a e2-ninnu mu-du3 |
| 1213. | (B17.14) me-bi cu bi2-du7 |
| 1214. | (B17.15) e2-i3-gara2-ba i3 gara2 i3-kur9 |
| 1215. | (B17.16) e2 kug AN.KA-ba ninda mu-ni-jar-jar |
| 1216. | (B17.17) ur5 mu-du8 cu-cu mu-luh(source: JAR) |
| 1217. | (B17.18) ud lugal-ni e2-a kur9-ra |
| 1218. | (B17.19) ud 7(IMIN)-ne-ec2 |
| 1219. | (B17.20) geme2 nin-a-ni mu-da-sa2-am3 |
| 1220. | (B17.21) arad2-de3 lugal-e zag mu-da-gub-am3 |
| 1221. | (B18.1) iri-na u2-si19-ni zag-bi-a mu-da-a-nu2-am3 |
| 1222. | (B18.2) eme nij2-hul-da inim ba-da-kur2 |
| 1223. | (B18.3) nij2-erim2 e2-ba im-ma-an-/gi4\ |
| 1224. | (B18.4) nij2-/gen6\-[na] d[nance] d/nin\-[jir2-su]-/ka\-[ce3] |
| 1225. | (B18.5) |
| 1226. | (B18.6) nu-/siki\ [lu2 nij2-tuku] nu-/mu\-[na-jar] |
| 1227. | (B18.7) nu-/mu\-[su] lu2 [a2-tuku] nu-na-[jar] |
| 1228. | (B18.8) e2 /ibila\ nu-[tuku] |
| 1229. | (B18.9) dumu-/munus\-[bi i3-bi]-lu-[ba mi-ni-kur9] |
| 1230. | (B18.10) ud nij2-si-[sa2] mu-na-/ta-e3\ |
| 1231. | (B18.11) nij2-erim2 i3-dutu gu2-bi jiri3 bi2-us2 |
| 1232. | (B18.12) iri-e dutu-gin7 |
| 1233. | (B18.13) ki-ca-ra im-ma-ta-a-e3 |
| 1234. | (B18.14) saj-ja2-ni-a gur im-mi-dar |
| 1235. | (B18.15) igi an kug-ga-ke4 |
| 1236. | (B18.16) ne-te-ni bi2-zu |
| 1237. | (B18.17) gud-gin7 saj il2-la mu-ku4-ku4 |
| 1238. | (B18.18) ec3 e2-ninnu-a |
| 1239. | (B18.19) gud du7 mac2 du7-e jic bi2-tag |
| 1240. | (B18.20) bur an-na mu-gub |
| 1241. | (B18.21) ten mu-ni-de2-de2 |
| 1242. | (B18.22) ucumgal kalam-ma ti-gi4-a mu-gub |
| 1243. | (B19.1) a2-la2 ud-dam ceg12 mu-na-ab-gi4 |
| 1244. | (B19.2) ensi2 zag-e3-a |
| 1245. | (B19.3) nam-mi-gub |
| 1246. | (B19.4) iri-ni u6 mu-e |
| 1247. | (B19.5) gu3-de2-a [...] |
| 6 lines missing | |
| 1254. | (B19.12) [... he2]-jal2 [mu-na]-/ta\-[e3] |
| 1255. | (B19.13) ki ce gu-[nu] mu-na-mu2-mu2 |
| 1256. | (B19.14) ensi2-da lagacki-e he2-jal2-la |
| 1257. | (B19.15) cu mu-da-pec-e |
| 1258. | (B19.16) ur-saj e2 gibil-na kur9-ra-am3 |
| 1259. | (B19.17) en dnin-jir2-su-ra jicbun dug3 mu-na-ni-ib2-jal2 |
| 1260. | (B19.18) an zag gal-la mu-na-tuc |
| 1261. | (B19.19) an-ra den-lil2 im-ma-ni-us2 |
| 1262. | (B19.20) den-lil2-ra |
| 1263. | (B19.21) dnin-mah mu-ni-us2 |
| 12 lines missing | |
| 1276. | (B20.13) [...] /SUD\ [...] |
| 1277. | (B20.14) e2-/da\ lugal /im\-da-/hul2\ |
| 1278. | (B20.15) ceg12 ninnu-ka /nam\ im-[mi-ib2]-tar-re |
| 1279. | (B20.16) /ceg12\ [e2-ninnu] |
| 1280. | (B20.17) nam dug3 he2-tar |
| 1281. | (B20.18) ceg12 e2-ninnu nam he2-tar |
| 1282. | (B20.19) nam dug3 he2-tar |
| 1283. | (B20.20) e2 kur an-ne2 ki jar-ra |
| 1284. | (B20.21) me gal-la du3-a |
| 16 lines missing | |
| 1301. | (B21.17) /ceg12 e2\-[ninnu]-ka nam i3-mi-ib2-tar-re |
| 1302. | (B21.18) ceg12 nam he2-tar |
| 1303. | (B21.19) ceg12 e2-ninnu nam dug3 he2-tar |
| 1304. | (B21.20) e2 IM ne-mur cub ki! us2-[sa] an gu2 la2-a |
| 1305. | (B22.1) [...] kug [...] E [...] |
| 14 lines missing | |
| 1320. | (B22.16) [...]-/a?\ |
| 1321. | (B22.17) [...] mu-zu-ce3 tur3 he2-em-ci-du3-du3 |
| 1322. | (B22.18) a-mac he2-em-ci-gibil4-gibil4 |
| 1323. | (B22.19) uj3 u2-sal-la he2-jal2-<la ha-mu-da>-nu2 |
| 1324. | (B22.20) ki-en-gi-re6 kur-kur-<re> igi-bi ha-mu-ci-jal2 |
| 1325. | (B23.1) e2 anzud2mucen-zu an-ne2 ha-ra-[ab]-/il2\ |
| 11 lines missing | |
| 1337. | (B23.13) [...] X [...] /GA\ [...] me |
| 1338. | (B23.14) [...] /NINA\ [X] du3-a |
| 1339. | (B23.15) [...] du3 [...] /PA?\ |
| 1340. | (B23.16) [d]/gilgamec2\-da mu2-a |
| 1341. | (B23.17) jicgu-za gub-ba-bi lu2 nu-kur2-e |
| 1342. | (B23.18) dijir-zu en dnin-jic-zid-da dumu-KA an-na-kam |
| 1343. | (B23.19) dijir-ama-zu dnin-sumun2-na ama gan numun zid-da |
| 1344. | (B23.20) numun-e ki aj2-ja2-am3 |
| 1345. | (B23.21) ab2 zid-de3 dumu(source: MUNUS) ba-tud-da-me |
| 1346. | (B23.22) mec3 zid ki lagacki-[a] e3-a |
| 1347. | (B24.1) dnin-jir2-su-ka-me |
| 1348. | (B24.2) sig-ta nim-ce3 /mu\-zu he2-jal2 |
| 1349. | (B24.3) gu3-de2-a [dug4]-ga-za |
| 1350. | (B24.4) [X] BI TUG2 /lu2\ na-DU |
| 1351. | (B24.5) [...] X KA juruc [X] an-ne2 zu-me |
| 1352. | (B24.6) /ensi2 zid\ e2-e nam [dug3] tar-ra-me |
| 1353. | (B24.7) /gu3\-de2-a /dumu\ dnin-jic-zid-da-ka |
| 1354. | (B24.8) /nam\-til3 /ha\-mu-ra-sud |
| 1355. | (B24.9) /e2\ kur gal-gin7 an-ne2 us2-sa |
| 1356. | (B24.10) ni2 me-lem4-bi kalam-ma ru-a |
| 1357. | (B24.11) an-ne2 den-lil2-e nam lagacki tar-ra |
| 1358. | (B24.12) dnin-jir2-su-ka nam-nir-jal2-ni |
| 1359. | (B24.13) kur-kur-re zu-a |
| 1360. | (B24.14) e2-ninnu an ki-da mu2-a |
| 1361. | (B24.15) dnin-jir2-su za3-mi2 |
| 1362. | (B24.16) /e2\ dnin-jir2-su-/ka\ du3-a |
| 1363. | (B24.17) za3-mi2 ejer-bi |
Edzard 1997, p. 68-101: translation, commentary, composite text
Falkenstein 1953, p. 137-182: translation
Hurowitz 1992, p. 33-57: commentary
Jacobsen 1987, p. 386-444: translation, commentary
Suter 1997: commentary, translation, score transliteration (A 20.24-21.12)
Suter 2000: commentary
Zólyomi 1999: commentary
Krecher 1995a: composite text, translation
Krecher 1995b: composite text, translation
Krecher 1996: composite text
Cylinder A (TCL 8)
Cylinder B (TCL 8)
|
© Copyright 2003, 2004, 2005, 2006 The ETCSL project, Faculty of Oriental Studies, University of Oxford |
 |