The Electronic Text Corpus of Sumerian Literature

ETCSLtransliteration : c.2.6.9.7

A prayer to Nanna for Rim-Sin (Rim-Sin G)

1.	nidba kug-ga si sa₂-zu
2.	cu kug-zu sizkur₂ kug sikil-e ma-ra-tag-ga-zu
3.	jic tag-ga cu tag-tag-ga-zu
4.	cag₄-ge dug₄-ga eme jar-ra-zu
5.	giri₁₇ cu jal₂-la-zu cu kug il₂-la-zu
6.	^dnanna lugal an ki en ^dlamma sag₉-ga-zu he₂-me-ce-ce
7.	^dnin-gal nin mah nin jickim sag₉-ga-zu he₂-me-ce-ce
8.	lugal cag₄-jar du₈-du₈ ^dnanna ^dnin-gal-bi dijir gal-gal-e-ne-ke₄
9.	^dri-im-^dsuen lugal e₂ dijir-re-e-ne-ke₄
10.	he₂-jal₂ ma-ra-si-si
11.	lugal mu pad₃-da ^den-lil₂-le nam bal-a-ni nam-he₂
12.	ud he₂-jal₂-la mu giri₁₇-zal-la
13.	nam nam-gub nam he₂-jal₂-la nam-zu-ce₃ he₂-bi₃-ci-jal₂
14.	lugal ud ji₆-a ji₆ u₃-na he₂-jal₂ nu-til-le-de₃
15.	ud ma-ra-ab-za-al ma-ra-<ab-dug₃>-ga ma-ra-ab-gen₆-ne₂
16.	lugal nidba-zu saj-bi cag₄ abzu-a du₃-du₃-ra-a ma-ra-du₃-du₃-ra
17.	lugal nidba-zu ejer-bi kisal mah-a <du₃-du₃-ra-a ma-ra-du₃-du₃-ra>
18.	he₂-jal₂ nu-til-le-de₃
19.	lugal su e₂-a ma-ra-si-sa₂
20.	^dri-im-^dsuen lugal urim₅^ki-ma me mah ki-ur₃-ra
21.	ki-bi cu bi₂-in-gi
22.	^dnanna lugal an ki-ke₄ aga zid mah nam-lugal-la cu du₇
23.	saj-za he₂-ni-ib-gen₆-ne₂
24.	^dnin-gal nin mah cag₄-jar du₈-du₈-zu
25.	cag₄ ce-ga-ni-ta ud-bi-ce₃ nam-til₃ dug₃
26.	zi-zu he₂-eb-«UD»-dug₃
27.	cu kug-ga-ni-ta me-lem₄ gal nam-lugal-la dab₅
28.	[^jic]jidru mah an ki-a cu-zu-ce₃ tug₂-ba₁₃-gin₇ he₂-/dib\
29.	^dri-im-^dsuen lugal ki-ur₃-ra he₂-jal₂ du₈-[du₈]
30.	saj us₂ nu-til₃-le-[de₃]
31.	lugal ^id₂idigna [he₂-jal₂]-la hu-mu-ra-ab-[tum₃]
32.	^id₂nun NIM-na cag₄ si-ni-ta a zal-le hu-mu-/ra-si\
33.	^id₂nun ^id₂nun zid id₂ zi-jal₂ /kalam\-[ma]
34.	ku₆ mucen hu-mu-ra-ab-tum₃
35.	a-ab-ba ab su-su-da-ta kun al-gub-ba-[a]-ta
36.	u₃-tud nu-til-le-da <nam>-lugal-zu-ce₃ hu-mu-ra-ab-tum₃
37.	edin dajal ki dajal-ba nij₂-ur₂-4 nij₂-zi-jal₂ SU RA-RA GA AL
38.	eg₂ pa₅ pa₄-ugur₂-e cu hu-mu-<ra>-ab-il₂-la
39.	nam-til₃ ha-ra-ja₂-ja₂
40.	cudu₃ inim-jar nij₂ sag₉-ga ha-ra-ja₂-ja₂
41.	cag₄ hul₂-la ha-ra-ja₂-ja₂
42.	jickim sag₉-sag₉-ga ha-ra-ja₂-ja₂
43.	cag₄-zu ha-ra-dug₃
44.	su-zu ha-ra-dug₃
45.	bar-zu jickim gen₆-na-a-zu ha-ra-dug₃
46.	cag₄ ^dnanna ^dnin-gal-bi jickim sag₉-sag₉-ga
47.	nam nam-til₃-la da-ri₂-ce₃ he₂-me-kar₂-kar₂
48.	^dri-im-^dsuen lugal me-te-jal₂ he₂-jal₂ cu du₈-du₈ dijir gal-gal-e-ne-ke₄
49.	ma-da he₂-en-na-gen₆ suhuc ma-da he₂-en-na-ge-en
50.	^dnanna lugal an ki-ke₄ gu₃ kalam-ma tec₂ hu-mu-ra-ab-sig₁₀-ge
51.	^dri-im-^dsuen lugal-ju₁₀

Print sources

Charpin 1986, p. 295-301: score transliteration, translation, commentary

Steible 1975, p. 87-118: score transliteration, translation, commentary

Electronic sources

Krecher 1996: composite text

Krecher 1996a: composite text, translation

Tinney 1998bbbb: composite text

Cuneiform sources

U 7760 (UET 6 106)

Revision history

04.vi.1999-27.vi.1999: JAB, editor: standardisation
28.vii.1999: GZ, editor: proofreading
06.viii.1999: GZ, editor: SGML tagging
10.ix.1999: ER, editor: proofreading SGML
10.ix.1999: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published