The Electronic Text Corpus of Sumerian Literature

ETCSLtransliteration : c.2.6.9.2

A hymn to Haia for Rim-Sin (Rim-Sin B)

1.	en jectug₂ mah cu du₇ sa₂ gal-e pad₃-da
2.	^dha-ia₃ dub gal-gal ha-ha-za jectug₂-jectug₂-ga pec-pec
3.	cid-du₃ hal-an-kug igi zag til galam-ma-ke₄ e₂-JECTUG₂.^dNISABA-ke₄
4.	pisaj-dub-ba e₂-gal an ki-a kij₂ kilib-ba cid-cid
5.	gi kug-ga cu jal₂-le im nam-tar gal-gal mul-mul
6.	gal-an-zu inim jectug₂ de₅-ge ud-bi-ce₃ an kug-ga-ra
7.	kicib-jal₂ a-a ^den-lil₂-la₂-ke₄ lu₂ tam-ma e₃ erim₃ e₂-kur-ra
8.	he₂-du₇ ec₃-e abzu-a siki bar-ra la₂-la₂ en ^dnu-dim₂-mud-ra
9.	^dha-ia₃ cag₄-gada-la₂ e₂-u₆-nir-ra uz-ga kug lu-lu
10.	umun₂ ak-ak ec₃ e₂-kic-nu-jal₂-la₂-ke₄ mu mah-bi gal-la
11.	cag₄ inim-jal₂ ki-sikil ^dnin-gal-e unu₇ gal-e til₃-la
12.	muc₃-me sag₉ nitalam₂ ki aj₂ ^dnun-bar-ce-gu-nu
13.	lu₂ mu mah mussa kur gal a-a ^den-lil₂-la₂-kam
14.	sajja ban₃-da igi-jal₂-tuku pad₃-da an ki-bi-da-ke₄
15.	gu₂-un dijir-re-[e-ne] cu gid₂-i ma-dam kur ab su₃-ud-da inim-ma-ni bur₂-e
16.	gal-zu me mah /nam-nun-na\-ka u₅ tur₃^? zag kece₂-da
17.	cag₄ dajal sur-ra jic-hur kug-ga e₂ eridug^ki-ga-ke₄ cu dab-be₂
18.	^dha-ia₃ lu₂ cu-luh sikil-la engur-ra-ke₄ tug₂-ba₁₃ tug₂ la₂-la₂
19.	^dindagara sajja₇(GA.DUB₂) utah-he₂ kur-ta ka du₈-u₃ dijir-re-e-ne-ke₄
20.	cag₄ dub-ba su₃-ud-da zu-a galam ak-ak dijir gal-gal-e-ne
21.	cu-nir-nir ^jicgag-a du₃-du₃ saj sig₉-ga ki galam hur kalam-ma
22.	ki cu tag-tag unu₇ sig₇-ga an-car₂ kur gal-ra
23.	saj il₂ mah ec₃-e abzu-ta dug₄-ga-ni ce-ga
24.	lu₂ saj kece₂ ninda babbar sikil-la cu dab-be₂ e₂ dijir-re-e-ne
25.	^dku₃-su₃ ^dindagara e-ne-ne-da nu an nu-sikil-la ki nu-dadag-ge
26.	u₂ gal-gal sud-sud an ^den-lil₂-la₂ unu₇ mah-ne-ne-ke₄
27.	lu₂ muc₃ kug-ga igi du₈ en ^dnu-dim₂-mud-e
28.	zabar kug-ga cu jal₂-le cag₄ hul₂-hul₂ bar sig₁₀-sig₁₀-ge₅
29.	lugal-ju₁₀ nam-mah-zu cir₃-ra ga-am₃-i-i
30.	^dha-ia₃ nam-gal-zu gi₁₆-sa-ce₃ ga-am₃-pad₃-pad₃-de₃-en
31.	a-ba za-a-gin₇ dijir-re-e-ne-ke₄ me kug-ga-ac tum₂-ma
32.	nitalam ki aj₂-zu ki-sikil ^dnisaba nin gal nin-e-ne
33.	u₃-tud-da cag₄-ga-ni ^dnin-lil₂-la₂ dam mah ^dnu-nam-nir-ra
34.	barag e₂-kur-ra-ke₄ saj il₂-la an-ce₃ ci-in-da-til₃
35.	nam-nin dijir-re-e-ne-ke₄ me-er-ga-bi al-ak-e dijir zag ca₄ nu-tuku
36.	za-e ninda₂ gal jalga zid pad₃-da en₃ tar-tar dijir-re-e-ne-ke₄
37.	^dha-ia₃ me cum₂-cum₂-mu kij₂ aj₂-e ki-cu-pec igi zu-zu-me-en
38.	^den-ki-ke₄ ec₃-e abzu-ta mu₇-mu₇ nam-til₃-la-ni mu-ra-rig₇
39.	en ji₆-par₃-e mu-ni-ib-huj-en saj sig₁₀ mu-ni-ib-jar-re-en
40.	sipad kalam-ma-ra jidru mah ud su₃-ra₂ cu-ni-ce₃ bi₂-ib-dab₅-e-en
41.	^dha-ia₃ dijir kalam-ma a-ra-zu uj₃ car₂-ra jic tuku-me-en
42.	za-e dijir gal-gal-e-ne uj₃ dajal-la cu-ni-ce₃ bi₂-ib-dab₅-e-en
43.	a-a ^den-ki abzu-ta ed₂-da-ni-ta
44.	^dha-ia₃ nam-gal-bi za-e ca-mu-re-da-an-aj₂
45.	uj₃ cag₄-ba i₃-ni-me-a-ke₄ gu₂-bi an-ce₃ ci-bi₂-ib₂-zi-zi
46.	nam-lu₂-ulu₃-bi ud asil-la₂ mi-ni-ib-zal-zal-le-ne
47.	uj₃ car₂-ra-bi cag₄ hul₂-la ud ul-le₂-a-ac bi₂-ib-ak-e-en
48.	e₂ dijir gal-gal-e-ne ezen ab-jar-re-en giri₁₇-zal ci-bi₂-du₈-du₈-un
49.	saj-kal saj-kal-e dijir-re-e-ne-ke₄ jic-cub gal-gal uj₃ til-la-ni
50.	igi sag₉-ga-zu nam-til₃ si-a lugal-ra igi zid bar-mu-un-ci-ib
51.	nun ^dri-im-^dsuen bal hul₂-hul₂ ud su₃-ud-da cu zid jar-mu-na-ab
52.	im nam-til₃-la-ke₄ du-ri₂-ce₃ nu-kur₂-ru mu-bi gub-i₃
53.	sipad ^dri-im-^dsuen nam-en-bi an ^den-lil₂-la₂ ki he₂-aj₂-e-ne
54.	lu₂ cir₃-ra-ke₄ za₃-mi₂-zu ka-bi-a mi-ni-ib-dug₃-ge-ne
55.	^dha-ia₃ lu₂ cir₃-ra-ke₄ za₃-mi₂-zu ka-bi-a mi-ni-ib-dug₃-ge-ne
56.	en an ki lugal abzu-a za₃-mi₂-bi mah-a
57.	a-a ^den-ki lugal abzu-a za₃-mi₂-zu dug₃-ga
58.	u₁₈-ru₁₂-bi-im

59.	^dha-ia₃ dijir kalam-ma ga-til₃-e ki aj₂ nun ^dri-im-^dsuen-e a₂ bad tal₂-ni he₂-me-en
60.	jic-gi-jal₂-bi-im

Print sources

Charpin 1986, p. 344-357: translation, commentary, composite text

Kramer 1977, p. 44-47: translation, handcopy

Steible 1967: score transliteration, translation, commentary

Electronic sources

Krecher 1996: composite text

Krecher 1996b: composite text, translation

Tinney 1998www: composite text

Cuneiform sources

U 7730 (UET 6 101; composite copy with U 7738)

U 7738 (UET 6 101; composite copy with U 7730)

Revision history

04.vi.1999-07.vii.1999: JAB, editor: standardisation
28.vii.1999: GZ, editor: proofreading
30.vii.1999: GZ, editor: SGML tagging
27.viii.1999: ER, editor: proofreading SGML
27.viii.1999: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published