The Electronic Text Corpus of Sumerian Literature

ETCSLtransliteration : c.2.5.6.2

A tigi to Enki for Ur-Ninurta (Ur-Ninurta B)

1.	en me galam-ma umuc ki jar-ra cag₄ su₃-ud nij₂-nam zu (Cited in OB catalogue from Nibru (N3), 0.2.06, line 7)
2.	^den-ki jectug₂ dajal mas-su mah ^da-nun-na-ke₄-ne
3.	gal-an-zu tu₆ jar inim-ma sig₁₀-ga ec-bar-ra igi jal₂
4.	sa₂ pad₃-de₃ ud e₃-ta ud cu₂-uc-ce₃ jalga cum₂-mu
5.	^den-ki en dug₄-ga zid-zid-da me-tec₂-e ga-a-i-i
6.	a-a-zu an lugal en numun i-i uj₃ ki jar-jar-ra
7.	me an ki saj kece₂-bi-ce₃ ma-ra-an-sig₁₀ nun-bi-ce₃ mu-un-il₂-en
8.	^id₂idigna ^id₂buranuna ka kug-bi du₈-u₃ nij₂ giri₁₇-zal si-si
9.	dungu sir₂-re a he₂-jal₂-la cum₂-mu a-gar₃-ra cej₃-cej₃
10.	^dezina₂ ab-sin₂-na saj il₂-il₂-i u₂-cim edin-na TAR [...] X
11.	pu₂-^jickiri₆ lal₃ jectin ki tag-ga tir-gin₇ sud-sud-e
12.	an lugal dijir-re-e-ne-ke₄ a₂-bi mu-e-da-a-aj₂
13.	^den-lil₂-le mu mah saj-kug-jal₂ ni₂ gal gur₃-ru-ni
14.	cu^? ma-ra-an-ba en nij₂-nam u₃-tud ^den-lil₂ ban₃-da-me-en
15.	an ki-a dili-ni dijir-ra-am₃ dub-us₂-a-ni za-e-me-en
16.	e-ne-gin₇ nam sig igi-nim-ma tar-tar-re cu-zu-ce₃ ca-mu-u₈-jar
17.	ec-bar zid ka-ta e₃-a-zu uru₂^ru dib-ba-am₃
18.	^dsa₂-bar-a kur-zag til-la-ac uj₃ dajal dur₂-ru-na-ba
19.	gu₇ naj-bi-ce₃ im-da-kuc₂-u₃-de₃-en a-a zid-bi za-e
20.	en dijir-bi-gin₇ nam-mah-zu me-tec₂ im-mi-i-i-ne
21.	sa-gid₂-da-am₃

22.	^dnu-dim₂-mud ^dur-^dnin-urta-ra inim kug dug₄-ga mah-zu
23.	nir he₂-jal₂ gaba gi₄ na-an-tuku-tuku
24.	jic-gi₄-jal₂-bi-im

25.	en mah an ki-a zag bi₂-dib mu-zu pa bi₂-e₃
26.	^den-ki me a-na jal₂-la mu-u₈-ur₄-ur₄ abzu-ce₃ mu-u₈-jar
27.	ki-tuc kug cag₄-ge bi₂-pad₃-da-zu abzu ec₃ mah-a X X
28.	me-bi me-a dirig jic-hur-bi a-re-ec gub-ba-me-en
29.	jissu-bi ud e₃-ta ud cu-uc kur-kur-ra ci-im-dul
30.	ni₂ me-lem₄ muru₉ dugud-da-gin₇ an kug-ge ib₂-us₂
31.	e₂-kur ki-tuc kug an ^den-lil₂-la₂ su zig₃ im-du₈-du₈
32.	cag₄-ba jidru cum₂-mu me hal-hal-la dijir gal-gal-e-ne-ce₃
33.	X numun^? car₂-ra im-dim₂-e nam-lu₂-ulu₃ u₃-tud til₃-le i₃-jal₂
34.	a-a ^den-ki barag nam-tar-ra-za dur₂ jar-ra-zu-ne
35.	sa-jar-ra-am₃

36.	lugal ^den-lil₂-le nir cum₂-ma ^dur-^dnin-urta-ke₄
37.	e₂ jectug₂-ga nam-gal-an-zu dirig-ce₃ nijin jal₂-la-za
38.	jal₂ u₃-bi₂-in-taka₄ saj gig₂-ga mas-su gal-bi he₂-em
39.	su zig₃ me-te nam-dijir-ra ur-mah nam-lugal-la
40.	nij₂ cu dug₄-ga /ud\ saj-ja₂-na til₃-la-ce₃ pa e₃-ni-ib
41.	gu₂-un dugud a-ab-ba sig igi-nim-ma saj-e-ec u₃-mu-e-ni-rig₇
42.	^dur-^dnin-urta-ke₄ he₂-ni-ib-ku₄-ku₄ e₂-kur za-gin₃-ce₃
43.	^den-lil₂-le igi hul₂-hul₂-la-ni e-ne-ra u₃-mu-un-ci-in-bar
44.	bal-a-na ud dug₃ mu giri₁₇-zal nam-til₃-la ha-ma-ab-tah-e
45.	a-a ^den-ki nam-gal ni₂ ri-a ka-ge dib-ba-zu-uc
46.	^da-nun-na dijir /cec\-zu-ne he₂-me-da-hul₂-hul₂-le-ec
47.	dumu an-na mah nir-jal₂-bi tuku za₃-mi₂-zu dug₃-ga-am₃
48.	tigi ^den-ki-ka₃-kam

Print sources

Falkenstein 1950, p. 112-117, 138-145: translation, commentary, composite text

Kramer and Maier 1989, p. 89-92: translation, commentary

Electronic sources

Krecher 1996b: composite text, translation

Tinney 1998ooo: composite text

Cuneiform sources

BM 96738 (CT 36 31f.)

VAT 6706 (VAS 10 145)

Revision history

24.v.1999-07.vii.1999: JAB, editor: standardisation
15.ix.1999: GZ, editor: proofreading
20.x.1999: GC, editor: SGML tagging
22.x.1999: ER, editor: proofreading SGML
22.x.1999: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published