The Electronic Text Corpus of Sumerian Literature

ETCSLtransliteration : c.2.5.6.2

A tigi to Enki for Ur-Ninurta (Ur-Ninurta B)

1.	en me galam-ma umuš ki ĝar-ra šag₄ su₃-ud niĝ₂-nam zu (Cited in OB catalogue from Nibru (N3), 0.2.06, line 7)
2.	^den-ki ĝeštug₂ daĝal mas-su maḫ ^da-nun-na-ke₄-ne
3.	gal-an-zu tu₆ ĝar inim-ma sig₁₀-ga eš-bar-ra igi ĝal₂
4.	sa₂ pad₃-de₃ ud e₃-ta ud šu₂-uš-še₃ ĝalga šum₂-mu
5.	^den-ki en dug₄-ga zid-zid-da me-teš₂-e ga-a-i-i
6.	a-a-zu an lugal en numun i-i uĝ₃ ki ĝar-ĝar-ra
7.	me an ki saĝ keše₂-bi-še₃ ma-ra-an-sig₁₀ nun-bi-še₃ mu-un-il₂-en
8.	^id₂idigna ^id₂buranuna ka kug-bi du₈-u₃ niĝ₂ giri₁₇-zal si-si
9.	dungu sir₂-re a ḫe₂-ĝal₂-la šum₂-mu a-gar₃-ra šeĝ₃-šeĝ₃
10.	^dezina₂ ab-sin₂-na saĝ il₂-il₂-i u₂-šim edin-na TAR […] X
11.	pu₂-^ĝiškiri₆ lal₃ ĝeštin ki tag-ga tir-gin₇ sud-sud-e
12.	an lugal diĝir-re-e-ne-ke₄ a₂-bi mu-e-da-a-aĝ₂
13.	^den-lil₂-le mu maḫ saĝ-kug-ĝal₂ ni₂ gal gur₃-ru-ni
14.	šu^? ma-ra-an-ba en niĝ₂-nam u₃-tud ^den-lil₂ ban₃-da-me-en
15.	an ki-a dili-ni diĝir-ra-am₃ dub-us₂-a-ni za-e-me-en
16.	e-ne-gin₇ nam sig igi-nim-ma tar-tar-re šu-zu-še₃ ša-mu-u₈-ĝar
17.	eš-bar zid ka-ta e₃-a-zu uru₂^ru dib-ba-am₃
18.	^dsa₂-bar-a kur-zag til-la-aš uĝ₃ daĝal dur₂-ru-na-ba
19.	gu₇ naĝ-bi-še₃ im-da-kuš₂-u₃-de₃-en a-a zid-bi za-e
20.	en diĝir-bi-gin₇ nam-maḫ-zu me-teš₂ im-mi-i-i-ne
21.	sa-gid₂-da-am₃

22.	^dnu-dim₂-mud ^dur-^dnin-urta-ra inim kug dug₄-ga maḫ-zu
23.	nir ḫe₂-ĝal₂ gaba gi₄ na-an-tuku-tuku
24.	ĝiš-gi₄-ĝal₂-bi-im

25.	en maḫ an ki-a zag bi₂-dib mu-zu pa bi₂-e₃
26.	^den-ki me a-na ĝal₂-la mu-u₈-ur₄-ur₄ abzu-še₃ mu-u₈-ĝar
27.	ki-tuš kug šag₄-ge bi₂-pad₃-da-zu abzu eš₃ maḫ-a X X
28.	me-bi me-a dirig ĝiš-ḫur-bi a-re-eš gub-ba-me-en
29.	ĝissu-bi ud e₃-ta ud šu-uš kur-kur-ra ši-im-dul
30.	ni₂ me-lem₄ muru₉ dugud-da-gin₇ an kug-ge ib₂-us₂
31.	e₂-kur ki-tuš kug an ^den-lil₂-la₂ su zig₃ im-du₈-du₈
32.	šag₄-ba ĝidru šum₂-mu me ḫal-ḫal-la diĝir gal-gal-e-ne-še₃
33.	X numun^? šar₂-ra im-dim₂-e nam-lu₂-ulu₃ u₃-tud til₃-le i₃-ĝal₂
34.	a-a ^den-ki barag nam-tar-ra-za dur₂ ĝar-ra-zu-ne
35.	sa-ĝar-ra-am₃

36.	lugal ^den-lil₂-le nir šum₂-ma ^dur-^dnin-urta-ke₄
37.	e₂ ĝeštug₂-ga nam-gal-an-zu dirig-še₃ niĝin ĝal₂-la-za
38.	ĝal₂ u₃-bi₂-in-taka₄ saĝ gig₂-ga mas-su gal-bi ḫe₂-em
39.	su zig₃ me-te nam-diĝir-ra ur-maḫ nam-lugal-la
40.	niĝ₂ šu dug₄-ga /ud\ saĝ-ĝa₂-na til₃-la-še₃ pa e₃-ni-ib
41.	gu₂-un dugud a-ab-ba sig igi-nim-ma saĝ-e-eš u₃-mu-e-ni-rig₇
42.	^dur-^dnin-urta-ke₄ ḫe₂-ni-ib-ku₄-ku₄ e₂-kur za-gin₃-še₃
43.	^den-lil₂-le igi ḫul₂-ḫul₂-la-ni e-ne-ra u₃-mu-un-ši-in-bar
44.	bal-a-na ud dug₃ mu giri₁₇-zal nam-til₃-la ḫa-ma-ab-taḫ-e
45.	a-a ^den-ki nam-gal ni₂ ri-a ka-ge dib-ba-zu-uš
46.	^da-nun-na diĝir /šeš\-zu-ne ḫe₂-me-da-ḫul₂-ḫul₂-le-eš
47.	dumu an-na maḫ nir-ĝal₂-bi tuku za₃-mi₂-zu dug₃-ga-am₃
48.	tigi ^den-ki-ka₃-kam

Print sources

Falkenstein 1950, p. 112-117, 138-145: translation, commentary, composite text

Kramer and Maier 1989, p. 89-92: translation, commentary

Electronic sources

Krecher 1996b: composite text, translation

Tinney 1998ooo: composite text

Cuneiform sources

BM 96738 (CT 36 31f.)

VAT 6706 (VAS 10 145)

Revision history

24.v.1999-07.vii.1999: JAB, editor: standardisation
15.ix.1999: GZ, editor: proofreading
20.x.1999: GC, editor: SGML tagging
22.x.1999: ER, editor: proofreading SGML
22.x.1999: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published