The Electronic Text Corpus of Sumerian Literature

ETCSLtransliteration : c.4.19.1

A balbale to Ninĝišzida (Ninĝišzida A)

1.	[ur]-saĝ en šag₄-tum₂ a-gar₃ ur-maḫ kur sud-[da]
2.	^dnin-ĝiš-zid-da muš-maḫ ušumgal-a-/da\ [tab-ba]
3.	am gal šen-šen-na gaba guz-a-ba a-ĝi₆ X […]
4.	ama-ni ki aĝ₂ ^dnin-girid₂-<da>-a šag₄ ḫi-/li\-[a tud-da]
5.	[ubur] kug-ga-na ga zid gu₇-a uš₁₁ piriĝ sub-sub-ba
6.	abzu-a buluĝ₃-ĝa₂ išib maḫ-am₃ eš₂-da kug šu du₈
7.	saĝ₅-ĝa₂ dub kalag-ga-ba niĝ₂-zid zu₂ keše₂-da
8.	lugal am ur₅ un₃ eme si sa₂ niĝ₂-erim₂-e ḫul gig
9.	uru₂ idim ḫur nu-mu-un-gi₄-gi₄ šu suḫ₃-a di-de₃
10.	^dnin-ĝiš-zid-da idim ḫur nu-mu-un-gi₄-gi₄ šu suḫ₃-a di-de₃
11.	erim-erim-ma šu-zu ma-ra-ši-ĝal₂
12.	sipad saĝ gig₂-ga šid-bi mu-e-zu
13.	u₈ sila₄-bi kiĝ₂-kiĝ₂-de₃ ma-ra-ši-ĝen
14.	ud₅-de₃ maš₂-bi ĝidru ud su₃-ra₂ tum₂-tum₂-mu-bi mu-e-zu
15.	^dnin-ĝiš-zid-da ĝidru ud su₃-ra₂ tum₂-tum₂-mu-bi mu-e-zu
16.	lugal šag₄-la₂ sug₄ šag₄-ta e₃-a inim šudu₃-zu šu-a ḫe₂-eb-gi₄
17.	nam-til₃ u₃-tud za-da ša-mu-un-ĝal₂
18.	nun ḫi-li sud-sud ^dnin-ĝiš-zid-da
19.	/barag\ ki-tuš maḫ-a tuš-a-ni en diĝir šul a₂ zid-da
20.	[X] X-zu-ur tug₂ mur₁₀ ĝidru za-gin₃ šu u₃-mu-e-ti
21.	[šir₃]-/nam\-šub ad mi-ri-ib-dug₄ ni₂-te-na mi-ni-/ib\-[be₂]
	1 line missing
23.	[…]-/bi\ ka lul-la bal-bal-[am₃ šag₄] mu-na-te-en-[te-en]
24.	[X] X šar₂-šar₂-ra ša-mu-šub^ub-be₂-en izi-gin₇ ba-ra-ma₅-ma₅-an
25.	lugal en šag₄ su₃-ra₂ barag maḫ-za nam dug₃ mu-ri-in-tar
26.	diĝir niĝ₂-si-sa₂-e ki aĝ₂-e inim dug₃-bi mu-un-e
27.	palil gal-zu unken-na PA-PA-a ḫe₂-du₇
28.	lugal ni₂ ri-a ildum₂ ud-bi saĝ-ba du-a
29.	an-bar an-ta a-ba de-ĝen-ne₂ a-na an-da-sa₂-a
30.	ur-saĝ me₃ igi ĝal₂ taka₄-a kur un₃-na i₃-a-e₃
31.	^dnin-ĝiš-zid-da me₃ igi ĝal₂ taka₄-a kur un₃-na i₃-a-e₃
32.	lugal ki gu-la a₂ aĝ₂-ĝa₂ tum₂ ki DU-bi tum₂-mu-de₃
33.	šul diĝir tuku ki a₂ aĝ₂-ĝa₂-ni igi-bi ma-ra-ši-ĝal₂
34.	lugal ka lal₃ diĝir-re-e-ne ^den-ki za₃-mi₂
35.	^dnin-ĝiš-zid-da dumu ^dnin-a-zu
36.	a-a ^den-ki za₃-mi₂
37.	bal-bal-e ^dnin-ĝiš-zid-da-kam

Print sources

van Dijk 1960, p. 81-107: score transliteration, translation, commentary

Electronic sources

Krecher 1996b: translation, score transliteration

Cuneiform sources

AO 5390 (TCL 15 25; photo Parrot Assur fg. 352 mislabelled)

Revision history

30.vii.1999-11.viii.1999: JAB, editor: standardisation
10.viii.2000: GC, editor: proofreading
11.viii.2000: GC, editor: SGML tagging
08.xii.2000: ER, editor: proofreading SGML
28.x.2000: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published